ដោយ: គង់ លាងហួរ
ប៉ាតាយ៉ា: ប្រទេសថៃគ្រោងអភិវឌ្ឍអចលនទ្រព្យ ដ៏សំខាន់នៅជុំវិញស្ថានីយ៍ថ្មី ដែលនឹងត្រូវសាងសង់នៅទីក្រុងប៉ាតាយ៉ា សម្រាប់បម្រើដល់ខ្សែរថភ្លើងល្បឿនលឿន តភ្ជាប់អាកាសយានដ្ឋានចំនួន៣។
លោក Manote Nongyai អភិបាលរងនៃទីក្រុងរមណីយដ្ឋានប៉ាតាយ៉ា បានមានប្រសាសន៍ថា “ការផ្តោតសំខាន់នៃការអភិវឌ្ឍន៍នឹងស្ថិតនៅជុំវិញ Soi Chaiyaporn Withee នៅក្នុង tambon Nong Prue នៃស្រុក Bang Lamung”។
ខ្សែរថភ្លើងល្បឿនលឿនប្រវែង២២០គីឡូម៉ែត្រ ដែលតភ្ជាប់អាកាសយានដ្ឋានចំនួន២របស់ទីក្រុងបាងកក គឺដុនមឿង និងសុវណ្ណភូមិ ជាមួយអាកាសយានដ្ឋានអ៊ូតាប៉ាវ ក្នុងខេត្តរ៉ាយ៉ង គឺជាធាតុសំខាន់មួយនៃការអភិវឌ្ឍន៍ច្រករបៀងសេដ្ឋកិច្ចខាងកើត (EEC) របស់រដ្ឋាភិបាលថៃ។
ខ្សែផ្លូវដែកនេះ នឹងត្រូវចំណាយទឹកប្រាក់ ប្រហែល៦,៤៨ពាន់លានដុល្លារដើម្បីអភិវឌ្ឍ ហើយគ្រោងនឹងបញ្ចប់នៅឆ្នាំ២០២៩។
លោកManote Nongyai បានមានប្រសាសន៍ថា “បណ្តុំនៃស្ថានីយ៍ប៉ាតាយ៉ា និងការអភិវឌ្ឍន៍ពាក់ព័ន្ធ នឹងគ្របដណ្តប់លើផ្ទៃដីទំហំ១៤៤ហិកតា ហើយគម្រោងប្រើប្រាស់ចម្រុះនេះ នឹងរួមបញ្ចូលមិនត្រឹមតែស្ថានីយ៍ប៉ុណ្ណោះទេ ប៉ុន្តែក៏មានខុនដូ និងហាងលក់រាយផងដែរ”។
លោកManote ក៏បានផ្តល់ការធ្វើបច្ចុប្បន្នភាព លើប្រព័ន្ធរថភ្លើងធុនស្រាល ដែលបានគ្រោងទុកសម្រាប់ទីក្រុងប៉ាតាយ៉ា ដែលជាប្រធានបទនៃសវនាការសាធារណៈជាច្រើនផងដែរ។
លោកបានបញ្ជាក់ថា ខ្សែមេប្រវែង៨,៣ គីឡូម៉ែត្រនឹងមានចំណតចំនួន១៣ ដោយនឹងពង្រីក១,៨គីឡូម៉ែត្រទៅកំពង់ផែ Laem Bali Hai ហើយនឹងត្រូវបានភ្ជាប់ទៅនឹងខ្សែរថភ្លើងល្បឿនលឿនEEC ។
លោកបានបន្ថែមថា “គម្រោងនេះ នឹងចំណាយប្រាក់យ៉ាងតិច២០,៨ពាន់លានបាត ក្នុងការបណ្តាក់ទុនរួមគ្នាជាមួយវិនិយោគិនឯកជន”៕
