ដោយ: គង់ លាងហួរ
ភ្នំពេញ: ការងារលើផែនការមេ ដើម្បីអភិវឌ្ឍខេត្តព្រះសីហនុ ទៅជាតំបន់សេដ្ឋកិច្ចពិសេសគំរូពហុបំណង បានឈានដល់ពាក់កណ្តាលផ្លូវ ហើយពេលនេះ បានចូលដល់ដំណាក់កាលពិនិត្យ និងផ្តល់អនុសាសន៍តាមកម្រិតបច្ចេកទេស។ នេះបើតាមការបញ្ជាក់របស់លោក ឡុង ឌីម៉ង់ អភិបាលរងនៃគណៈអភិបាលខេត្តព្រះសីហនុ។
យោងតាមការបង្ហោះលើបណ្តាញ សង្គមហ្វេសប៊ុករបស់លោក ឡុង ឌីម៉ង់ បានធ្វើការកត់សម្គាល់ បន្ទាប់ពីកិច្ចប្រជុំត្រួតពិនិត្យមួយថា ផែនការមេនេះ បានឈានដល់ហួស៥០ភាគរយ ហើយនៅសល់ដំណាក់កាលធំៗចំនួន៣ទៀត រហូតដល់ការអនុម័តជាផ្លូវការ។
តំបន់សេដ្ឋកិច្ចពិសេស SEZ ពហុបំណងមានគោលដៅច្បាស់លាស់ក្នុងការប្រែក្លាយក្រុងព្រះសីហនុទៅជាទីក្រុង Shenzhenទី២។
ទីក្រុងShenzhen គឺជាឧទាហរណ៍ដ៏ជោគជ័យបំផុត នៃតំបន់សេដ្ឋកិច្ចពិសេសរបស់ប្រទេសចិន ដោយសារវាបានជួយប្រែក្លាយភូមិនេសាទដ៏តូចមួយនេះ ទៅជាមជ្ឈមណ្ឌលផលិតថាមពល និងច្នៃប្រឌិតបច្ចេកវិទ្យាជាន់ខ្ពស់។
ជាមួយនឹងការអនុវត្តផែនការមេនេះ ប្រជាជនទីក្រុងក៏ត្រូវបានគេរំពឹងថា នឹងកើនឡើងដល់១លាននាក់ ពី៣០០.០០០នាក់នាពេលបច្ចុប្បន្ន ខណៈតំបន់សេដ្ឋកិច្ចពិសេសពហុបំណង (SEZ) ចង់ប្រែក្លាយជាតំបន់សេដ្ឋកិច្ចដ៏សំខាន់នៅក្នុងតំបន់អាស៊ីអាគ្នេយ៍។
យោងតាមក្រុមអ្នកជំនាញបានឱ្យដឹងថា ការអភិវឌ្ឍន៍តំបន់សេដ្ឋកិច្ចពិសេសនេះ ត្រៀមនឹងដើរតួយ៉ាងសំខាន់ ក្នុងការស្តារឡើងវិញរបស់កម្ពុជាពីផលប៉ះពាល់សេដ្ឋកិច្ចនៃជំងឺកូវីដ-១៩ផងដែរ។ បច្ចុប្បន្ន ខេត្តព្រះសីហនុបានបញ្ចប់ការសាងសង់ផ្លូវថ្មីចំនួន៣៤ខ្សែ ហើយនិងកំពុងពង្រីកកំពង់ផែ និងព្រលានយន្តហោះ។
ផ្លូវល្បឿនលឿនភ្នំពេញ-ព្រះសីហនុ ដែលមានតម្លៃ២ពាន់លានដុល្លារសម្រាប់ការតភ្ជាប់ក្នុងខេត្តនេះ ក៏បានបើកដំណើរការរួចហើយដែរ កាលពីខែតុលា ឆ្នាំ២០២២។
ការសម្រេចចិត្តធ្វើឱ្យប្រសើរឡើង ក្រុងព្រះសីហនុទៅជាតំបន់សេដ្ឋកិច្ចពិសេសពហុគោលបំណង កើតឡើងទន្ទឹមនឹងការខិតខំប្រឹងប្រែងផ្សេងទៀតក្នុងការអភិវឌ្ឍន៍បន្ថែមទៀត នូវកំពង់ផែស្វយ័តក្រុងព្រះសីហនុ។
ដោយសាងសង់ក្រោមកម្ចីជាង២០០លានដុល្លារ ពីទីភ្នាក់ងារសហប្រតិបត្តិការអន្តរជាតិជប៉ុន (JICA) កំពង់ផែសមុទ្រទឹកជ្រៅ ខេត្តព្រះសីហនុត្រូវបានគេរំពឹងថា នឹងបញ្ចប់ការសាងសង់នៅឆ្នាំ២០២៥។
ជាមួយគ្នានេះ រដ្ឋបាលខេត្តក៏បានចាប់ផ្តើម ចាត់វិធានការដោះស្រាយបញ្ហាអគារជាប់គាំង នៅក្នុងខេត្តព្រះសីហនុផងដែរ។ រហូតមកដល់ពេលនេះ អគារចំនួន៣៥៩ ដែលត្រូវបានសម្គាល់ដោយរដ្ឋបាល កំពុងធ្វើការលើកញ្ចប់នៃការលើកទឹកចិត្ត សម្រាប់អ្នកអភិវឌ្ឍន៍ និងអ្នកវិនិយោគ។
លោក ឡោ វិចិត្រ អនុប្រធានសមាគមពាណិជ្ជកម្មចិន កម្ពុជា (CCCA) បានមានប្រសាសន៍ថា “នាពេលនេះ វិនិយោគិនចិននឹងត្រលប់មកខេត្តព្រះសីហនុវិញ ដោយសារហេដ្ឋារចនាសម្ព័ន្ធ ត្រូវបានកែលម្អជាលំដាប់ ជាមួយនឹងផ្លូវល្បឿនលឿនថ្មី ដែលតភ្ជាប់ពីភ្នំពេញទៅទីក្រុងព្រះសីហនុ និងការបញ្ចប់ការសាងសង់ផ្លូវថ្មីៗ”៕
