ដោយ: គង់ លាងហួរ
ប៉េកាំង: រដ្ឋមន្ត្រីការបរទេសថ្មីរបស់ប្រទេសចិន លោក Qin Gang បានមានប្រសាសន៍នៅថ្ងៃអង្គារ ទី៧ ខែមីនានេះ ថា សមាគមប្រជាជាតិអាស៊ីអាគ្នេយ៍ (អាស៊ាន) គួរតែជៀសវាងពីការប្រកួតប្រជែងអំណាចណាមួយរវាងបណ្តាប្រទេសធំៗ។
ថ្លែងនៅក្នុងកិច្ចប្រជុំសភាប្រចាំឆ្នាំនៅទីក្រុងប៉េកាំង លោក Qin Gang ក៏បានមានប្រសាសន៍ផងដែរថា អាស៊ានមិនអាចជាភ្នាក់ងារនៃកម្លាំងខាងក្រៅណាមួយឡើយ។
រដ្ឋមន្ត្រីការបរទេសរូបនេះបាន និងកំពុងឆ្លើយតបទៅនឹងសំណួរអំពីរបៀបដែលបណ្តាប្រទេស ក្នុងតំបន់កំពុងរងសម្ពាធ ហើយមើលឃើញថា វាមានការលំបាកកាន់តែខ្លាំងឡើង ក្នុងការពឹងផ្អែកលើសហរដ្ឋអាមេរិក សម្រាប់ការធានាសន្តិសុខ និងលើប្រទេសចិនសម្រាប់ផ្នែកសេដ្ឋកិច្ច។
លោក Qin បានបន្តថា “យុទ្ធសាស្ត្រឥណ្ឌូប៉ាស៊ីហ្វិករបស់សហរដ្ឋអាមេរិកគឺជាការប៉ុនប៉ង ដើម្បីបង្កើតជាចង្កោមផ្តាច់មុខ ដែលប៉ះពាល់ដល់ផលប្រយោជន៍ របស់ប្រទេសក្នុងតំបន់”។ លោកបន្ថែមថា“ការប៉ុនប៉ងណាមួយ ដើម្បីឡោមព័ទ្ធប្រទេសចិននឹងត្រូវបរាជ័យ”។
លោក Qin Gang បានកត់សម្គាល់ថា “ក្រុមមេដឹកនាំនៃប្រទេសក្នុងតំបន់មួយចំនួនបានថ្លែងថា អាស៊ានមិនគួរក្លាយជាអ្នកតំណាងសម្រាប់ភាគីណាមួយឡើយ ហើយគួរតែនៅឆ្ងាយពីការប្រជែងអំណាចដ៏ធំ”។
លោកបានមានប្រសាសន៍ថា នៅក្នុងនាមជាអ្នកជំរុញការអភិវឌ្ឍជាសកល អាមេរិកគួរតែរៀបចំវេទិកា សម្រាប់កិច្ចសហប្រតិបត្តិការឈ្នះឈ្នះ ជាជាងការប្រកួតអុកសម្រាប់ ការប្រកួតប្រជែងភូមិសាស្ត្រនយោបាយ។
លោក Qin Gang បានបន្ថែមថា “គ្មានសង្រ្គាមត្រជាក់ណាគួរតែត្រូវបានបញ្ឆេះនោះទេ ហើយវិបត្តិដូចនៅអ៊ុយក្រែន ក៏មិនគួរកើតឡើងម្តងទៀតនៅតំបន់អាស៊ីនោះដែរ”៕
