ដោយ: គង់ លាងហួរ
ក្រុងតៃប៉ិ: ក្រុមហ៊ុនរថភ្លើងល្បឿនលឿនរបស់តៃវ៉ាន់ គ្រោងនឹងទិញរថភ្លើងចំនួន១២ឈុត ពីក្រុមហ៊ុនជប៉ុនHitachi និង Toshiba នៅក្នុងតម្លៃ៩៣២លានដុល្លារអាមេរិក។
យោងតាមការចុះផ្សាយដោយសារពត៌មាន Nikkei Asia បានឱ្យដឹងថា តៃវ៉ាន់គឺជាទីផ្សារក្រៅប្រទេសដំបូងគេ ដែលទទួលយកបច្ចេកវិទ្យា រថភ្លើងល្បឿនលឿនShinkansen របស់ប្រទេសជប៉ុន ហើយសេវាកម្មរថភ្លើងល្បឿនលឿន បានបើកដំណើរការក្នុងឆ្នាំ២០០៧ ដោយក្រុមហ៊ុនជប៉ុន បានផ្គត់ផ្គង់ទូររថភ្លើង ប្រព័ន្ធសញ្ញា និងឧបករណ៍ផ្សេងទៀត។
ចំពេលមានការកើនឡើងនៃចំនួនអ្នកដំណើរ ក្រុមហ៊ុនរថភ្លើងល្បឿនលឿនតៃវ៉ាន់ គ្រោងនឹងកែលម្អសេវាកម្មរបស់ខ្លួន តាមរយៈការដាក់ឱ្យប្រើប្រាស់រថយន្តថ្មីៗ។
រថភ្លើងឈ្មោះ 700T shinkansen ដែលប្រើប្រាស់នៅតៃវ៉ាន់គឺជាកំណែដែលបានកែប្រែពីស៊េរី ដែលបានប្រើប្រាស់នៅក្នុងប្រទេសជប៉ុន។
ប្រតិបត្តិករផ្លូវដែកតៃវ៉ាន់បាន និងកំពុងធ្វើការ ដើម្បីទិញរថភ្លើងថ្មីចាប់តាំងពីឆ្នាំ២០១៩ ប៉ុន្តែការដេញថ្លៃកន្លងមកមិនបាន នាំឱ្យមានកិច្ចព្រមព្រៀងនោះទេ ដោយសារតែមានការខ្វែងគំនិតគ្នា លើតម្លៃ និងលក្ខខណ្ឌផ្សេងទៀត។
តៃវ៉ាន់បានកត់សម្គាល់ថា ខ្លួនបានជ្រើសរើសទិញរថភ្លើងពីក្រុមហ៊ុន Hitachi-Toshiba duo បន្ទាប់ពីការដេញថ្លៃជុំទី៣ ដែលបានរៀបចំធ្វើឡើងនៅក្នុងខែមីនា ឆ្នាំ២០២២ ប៉ុន្តែភាគីទាំង២មិនទាន់បានចុះហត្ថលេខា លើកិច្ចព្រមព្រៀងជាផ្លូវការនៅឡើយទេ៕
