សុខុម
អន្តរជាតិ: លោក វ្ល៉ាឌីមៀ ពូទីន បញ្ជាក់ថា លោកនឹងពិភាក្សាអំពីផែនការសន្តិភាព១២ចំណុចរបស់លោក ស៊ី ជីនពីង ដើម្បី “ដោះស្រាយវិបត្តិដ៏ស្រួចស្រាល់នៅអ៊ុយក្រែន” អំឡុងដំណើរទស្សនកិច្ចរបស់ប្រធានាធិបតីចិន រូបនេះទៅកាន់ទីក្រុងមូស្គូ។
លោក ពូទីន លើកឡើងថា “យើងតែងតែបើកទ្វារចំហស្វាគមន៍ដំណើរការចរចា” ខណៈមេដឹកនាំកំពូលទាំង២បានហៅគ្នាទៅវិញទៅមកថា “មិត្តសម្លាញ់”។ នេះបើយោងតាមសារព័ត៌មាន BBC ចុះផ្សាយនៅថ្ងៃអង្គារ ទី២១ ខែមីនា នេះ។
ប្រទេសចិន បានបញ្ចេញផែនការបញ្ចប់សង្រ្គាមនៅអ៊ុយក្រែន កាលពីខែមុន ដែលផែនការនោះរួមបញ្ចូលទាំង “ការបញ្ឈប់យកគ្នាធ្វើជាសត្រូវ” និងការបន្តការចរចាសន្តិភាពផងដែរ។
ទោះជាយ៉ាងណា កាលពីថ្ងៃសុក្រ សប្ដាហ៍កន្លងទៅ សហរដ្ឋអាមេរិក បានព្រមានថា ផែនការសន្តិភាពដែលផ្ដួចផ្ដើមឡើងដោយមហាយក្សចិន ជា “យុទ្ធសាស្ត្រជាប់គាំង”។
រដ្ឋមន្ត្រីការបរទេសអាមេរិក លោក Antony Blinken ថ្លែងថា “ពិភពលោកមិនគួរចាញ់បោកឧបាយកលយុទ្ធសាស្ត្រណាមួយរបស់រុស្ស៊ី ដែលគាំទ្រដោយប្រទេសចិន ឬប្រទេសផ្សេងទៀតដើម្បីបញ្ឈប់សង្រ្គាមដោយលក្ខខណ្ឌផ្ទាល់ខ្លួននោះឡើយ”។
លោកបានបន្ថែមទៀតថា “ការអំពាវនាវឱ្យមានបទឈប់បាញ់ដែលមិនរាប់បញ្ចូលការដកកងកម្លាំងរុស្ស៊ី ចេញពីទឹកដីអ៊ុយក្រែន គឺស្មើនឹងជួយគាំទ្រដល់សំណើរបស់រុស្ស៊ី”។
ផែនការសន្តិភាព១២ចំណុចរបស់ប្រទេសចិន មិនបានបញ្ជាក់ថា រុស្ស៊ី ត្រូវតែដកទ័ពចេញពីទឹកដីអ៊ុយក្រែន នោះឡើយ ខណៈអ៊ុយក្រែន ទទូចថា មុននឹងឈានដល់ការចរចាណាមួយ រុស្ស៊ី ត្រូវតែដកទ័ពចេញពីទឹកដីរបស់ខ្លួនជាមុនសិន។
ផែនការរបស់ចិន គ្រាន់តែនិយាយអំពី “ការគោរពអធិបតេយ្យភាពរបស់ប្រទេសទាំងអស់” ហើយថា “ភាគីទាំងអស់ត្រូវមានហេតុផល និងរក្សាភាពអត់ធ្មត់” និង “សម្រាលស្ថានការណ៍បន្តិចម្តងៗ” តែប៉ុណ្ណោះ។
ផែនការរបស់ចិន នេះក៏បានថ្កោលទោសចំពោះការប្រើប្រាស់ “ទណ្ឌកម្មជាឯកតោភាគី” ផងដែរ ដែលគេមើលឃើញថាជាការរិះគន់ឥតលាក់លៀមចំពោះលោកខាងលិច ដែលជាសម្ព័ន្ធមិត្តរបស់អ៊ុយក្រែន៕ BBC៕
