ដោយ: គង់ លាងហួរ
ភ្នំពេញ: កម្ពុជា ចិន ម៉ាឡេស៊ី និងឥណ្ឌូណេស៊ី បានព្រមព្រៀងគ្នាបង្កើតស្តង់ដាររួមគ្នាសម្រាប់សំបុកត្រចៀកកាំសម្រាប់ទីផ្សារប្រទេសចិន ក្នុងគោលបំណងកសាងទំនុកចិត្តក្នុងចំណោមអតិថិជន និងជំរុញការនាំចេញ។
លោកស្រី វ៉ា សុជិន ប្រធានសមាគមអ្នកផលិត និងនាំចេញសំបុកសត្វត្រចៀកកាំកម្ពុជា បានមានប្រសាសន៍ថា “កិច្ចព្រមព្រៀងនេះត្រូវបានធ្វើឡើងនៅក្នុងកិច្ចប្រជុំនៅទីក្រុងប៉េកាំងកាលពីសប្តាហ៍មុនជាមួយតំណាងសមាគមសំបុកសត្វស្លាបមកពីប្រទេសម៉ាឡេស៊ី ឥណ្ឌូនេស៊ី កម្ពុជា និងប្រទេសចិន”។
ស្ថានអគ្គកុងស៊ុលកម្ពុជាប្រចាំទីក្រុង Chongqing និងសមាគមអ្នកផលិតចំណីអាហារកម្ពុជា បានដឹកនាំសមាជិក និងពាណិជ្ជករក្នុងឧស្សាហកម្មសំបុកសត្វស្លាបកម្ពុជា ជួបពិភាក្សាជាមួយក្រុមគយចិន និងប្រធានសមាគមសំបុកសត្វស្លាបចិន ម៉ាឡេស៊ី និងឥណ្ឌូនេស៊ី។
លោកស្រីបន្តថា “លទ្ធផលនៃកិច្ចពិភាក្សាគឺកម្ពុជា ចិន ម៉ាឡេស៊ី និងឥណ្ឌូណេស៊ីបានព្រមព្រៀងគ្នាក្នុងការបង្កើតស្តង់ដាររួមសម្រាប់សំបុកត្រចៀកកាំដើម្បីនាំមកកាន់ទីផ្សារចិន និងអាស៊ាន”។
សមាគមនេះបានអះអាងថា “ស្តង់ដារទូទៅត្រូវបានពិនិត្យសម្រាប់កម្រិតសំណើមផលិតផល ការកំណត់អត្តសញ្ញាណផលិតផល និងវិធីសាស្ត្រសម្លាប់មេរោគ ដោយកាលពីមុន ផលិតផលដែលមានអាជ្ញាប័ណ្ណនាំចូលត្រឹមត្រូវ មានការលំបាកក្នុងការប្រកួតប្រជែងជាមួយផលិតផលនាំចូលខុសច្បាប់”។
ប្រទេសចិនបានប្រកាសគាំទ្រដល់ផលិតផលសំបុកសត្វត្រចៀកកម្មកម្ពុជាក្នុងទីផ្សារនាំចូលរបស់ខ្លួន ដោយសារបរិស្ថាននៅកម្ពុជាល្អ និងធានាបាននូវផលិតផលគុណភាពខ្ពស់។
នៅក្នុងអំឡុងពេលស្នាក់នៅក្នុងប្រទេសចិន សមាគមកម្ពុជាក៏បានជួបពិភាក្សាជាមួយក្រុមហ៊ុនចែកចាយផលិតផលសំបុកត្រចៀកដ៏ធំបំផុតនៅក្នុងប្រទេសចិន និងបានចុះហត្ថលេខាលើ MOU ដើម្បីទិញ និងលក់សំបុកត្រចៀកកាំពីកម្ពុជាផងដែរ។
សមាគមនេះនឹងបន្តពិភាក្សាបន្ថែមស្តីអំពីវិធីពន្លឿនការអនុវត្តអាជ្ញាប័ណ្ណនាំចូលទៅកាន់ប្រទេសចិន និងខិតខំប្រឹងប្រែងលើកកម្ពស់ និងអភិវឌ្ឍវិស័យសំបុកត្រចៀកាំកម្ពុជា ដើម្បីបង្កើនកេរ្តិ៍ឈ្មោះផលិតផលរបស់កម្ពុជា៕