រដ្ឋមន្រ្តីកសិកម្មជម្រុញខ្សែច្រវ៉ាក់ផលិតកម្មពីអ្នកផលិត ដល់ទីផ្សារ

0

    ដោយៈ ម៉ាលីនណា

       ភ្នំពេញៈ រដ្ឋមន្ត្រី​ក្រសួងកសិកម្ម រុក្ខាប្រមាញ់ និង​នេសាទ លោក ឌិ​ត ទីណា បាន​ជម្រុញនូវការងារថ្មីមួយ ដែលចាប់ផ្តើមពីអ្នកផលិត ដល់ទីផ្សារ ដែលនេះជាផ្នែកមួយនៃការកាត់បន្ថយនិតិវិធីនានា។

ទោះជាយ៉ាងណា លោកមិនបានបញ្ជាក់ព៌តមានលំអិត ពីយន្តការការងារនេះ នឹងធ្វើដូចម្តេច និងចាប់ផ្តើមពីពេលណាឡើយ។

ថ្លែងក្នុងពិធីបើកសន្និបាតក្រសួងកសិកម្មឆ្នាំ២០២២ និងលើកទិសដៅសម្រាប់ឆ្នាំ២០២៣ លោកឌិត ទីណាបានណែនាំ​មន្ត្រី​ឱ្យ​យកចិត្តទុកដាក់ ​លើ​សហ​គម​ន៍​កសិកម្ម ដោយ​ផ្តល់​ការគាំទ្រ​ទាំង​បច្ចេក​ទេស និង​សេដ្ឋកិច្ច ក្នុងការ​ចងក្រង​សហគមន៍ និង​មាន​ក្បាលម៉ាស៊ីន​ដឹកនាំ​ឱ្យបាន​ល្អ។

លោកបានបន្តថា យើង​ត្រូវធ្វើ​ការកំណត់​ទីផ្សារ និង​មាន​ផែន​ការផលិត​ច្បាស់លាស់ ​តាម​កិច្ចសន្យា​ព្រោះ​ការងារ​នេះ ​នឹង​ជួយ​ដល់​កសិករ ដែល​មិនទាន់មាន​ទីផ្សារ ​និង​គ្មាន​ខ្សែបណ្តាញ​។​

ជាមួយគ្នានេះ លោក​រដ្ឋមន្ត្រី​បាន​ណែ​នាំ ឲ្យ​យកចិត្ត​ទុកដាក់​លើ​ចំណុច​គន្លឹះ​មួយចំនួន ដោយ​ក្នុងនោះ​ត្រូវ​ផ្តោត លើ​ការអភិវឌ្ឍ​ធនធា​ន​ទាំង​ក្នុង ​និង​ក្រៅ​ក្រសួង ​ដើម្បី​ទទួលបាន​ធនធាន​ប្រកបដោយ​សក្តានុពល​ពិតប្រាកដ​។ ត្រូវ​ជំរុញ​ការ​ស្រាវ​ជ្រាវ​បច្ចេកទេស ដើម្បី​អភិវឌ្ឍ​វិស័យ​កសិកម្ម​ ដោយ​ត្រូវ​គិតពី​ការបន្ថយ​ចំណាយ​បង្កើន​ផលចំណេញ មាន​ប្រសិទ្ធភាព​សេដ្ឋកិច្ច​ ដោយ​មិន​ប្រកួតប្រជែង​បរិមាណ​តែ​គិតពី​គុណភាព​ជាសំខាន់​។

លោកឌិ​ត ទីណា បញ្ជាក់ថា​ ​ត្រូវ​យកចិត្តទុកដាក់​លើ​សហគមន៍​កសិកម្ម ដោយ​ផ្តល់​ការគាំទ្រ​ទាំង​បច្ចេកទេស​ និង​សេដ្ឋកិច្ច ក្នុងការ​ចងក្រង​សហគមន៍ ​និង​មាន​ក្បាលម៉ាស៊ីន​ដឹក​នាំឱ្យ​បានល្អ ​ក្នុង​ខ្សែចង្វាក់​ផលិតកម្ម ​តាំងពី​អ្នក​ផលិត​រហូត​ទីផ្សារ ដោយ​ក្នុងនោះ​ត្រូវ​ធ្វើការ​កំណត់​ទីផ្សារ និង​មាន​ផែន​ការផលិត​ច្បាស់លាស់​តាម​កិច្ចសន្យា។

ជាមួយគ្នានេះ​លោក​រដ្ឋមន្ត្រី បាន​រំឭក​និង​លើក​ទឹក​ចិត្ត​ដល់​អង្គសន្និបាត​ប្រើប្រាស់​ពេលវេលា​ឱ្យមាន​ប្រសិទ្ធភាព ដើម្បី​ពិភាក្សា​ប្រមូ​ល​ធាតុ​ចូល ក្នុង​ការរៀបចំ​គោលនយោបាយ និង​ផែនការ​សកម្មភាព​សម្រាប់​ការអភិវឌ្ឍ​វិស័យ​កសិកម្ម​៕

LEAVE A REPLY

Please enter your comment!
Please enter your name here