កីឡា៣ប្រភេទនឹងរៀបចំនៅខេត្តព្រះសីហនុ សម្រាប់ព្រឹត្តិ ការណ៍ស៊ីហ្គេម

ខេត្តព្រះសីហនុ ត្រូវបានរាជរដ្ឋាភិបាលជ្រើសរើស នៃការប្រកួតកីឡាស៊ីហ្គេមផងដែរ ដែលមានកីឡា ៣ប្រភេទ ក្នុងនោះមានដូចជា កីឡាទូកក្តោង កីឡាម៉ូតូទឹក និងកីឡាបាល់ទះលើឆ្នេរខ្សាច់។

លោកគួច ចំរើន​បានបន្តថា ការប្រកួតកីឡាស៊ីហ្គេមនៅខេត្តព្រះសីហនុ ក៏បានបង្ហាញសញ្ញាល្អមួយ សម្រាប់ទាក់ទាញភ្ញៀវទេសចរ និងអ្នកវិនិយោគមកកាន់ខេត្តព្រះសីហនុ។ ក្រោយពីការប្រកួតកីឡាស៊ីហ្គេមចប់ យើងនឹងយកទីតាំងនេះ សម្រាប់ឱ្យយុវជនរបស់យើងនាំគ្នាលេងកីឡា ដើម្បីសុខភាព សាមគ្គីភាព និងជម្រុញវិស័យកីឡានៅខេត្តព្រះសីហនុឱ្យកាន់តែច្រើនបន្ថែមទៀត ម្យ៉ាងទៀតការលេងកីឡានាំមកនូវមិត្តភាព សាមគ្គីភាព និងសុខភាពជាចំបងសម្រាប់យុវជនរបស់យើង និងចៀសផុតពីការសេពគ្រឿងញៀន។

លោក ជ្រា ថាវរិទ្ធ ប្រធានការិយាល័យបចេ្ចកទេស នៃមន្ទីរសា​ធារណការ និងដឹកជញ្ជូនខេត្តព្រះសីហនុ បានឱ្យដឹងថា ការសម្អាតទីលានបាល់ទះនេះ យើងជីកកាយដី០.៤០ម៉ែត្រ ចេញយកមកទុកដោយឡែក ក្នុងគោលបំណងរក្សាដីឱ្យវាស្ងួត រួចយើងចាប់ផ្តើមរែងដីយកស្មៅ និងកម្ទេចឈើចេញ រួចដាក់ចូលវិញជាសន្ទាប់ៗ ០.១០ម៉ែត្រម្តង និងចាក់បន្ថែមរហូតនៅសល់ ០.១០ម៉ែត្រមុខលើ។

លោកបន្តថា យើងនឹងយកខ្សាច់សរដាក់មុខខាងលើ បន្ទាប់ពីការងារចាក់ខ្សាច់បំពេញរួចរាល់ យើងយកសំណាញ់រែងវាបន្តទៀត ដើម្បីឱ្យប្រាកដថា មិនមានកំទេចស្មៅ ឬឈើនៅក្នុងទីលានការប្រកួតរបស់យើងឱ្យបានស្អាត យើងនឹងនៅតែបន្តការពារទីតាំងនេះរហូតដល់ថ្ងៃប្រកួត មុនពេលប្រកួតយើងនឹងរៀបចំ ធ្វើការសម្អាតម្តងទៀត ដើម្បីឱ្យកម្រាស់ខ្សាច់ ដែលយើងត្រូវក្រាលរួចធ្វើការប្រកួតកីឡានៅលើឆ្នេរខ្សាច់ឱ្យមានភាពទាក់ទាញ បន្ទាប់មកយើងត្រូវប្រើរនាស់វែង ដើម្បីធ្វើការជ្រោយសម្អាតដី ថ្លឹងវាឱ្យរាបស្មើរសម្រាប់បំរើឱ្យការប្រកួត នៅពេលខាងមុខទទួលបានលទ្ធផល តាមការគ្រោងទុក។

លោកបន្តឱ្យដឹងបន្ថែមថា ទីតាំងនេះយើងធ្វើ ៣តារាងប្រកួត ក្នុងតារាងប្រកួតនិមួយៗមានទំហំ ២១x២៨ម៉ែត្រ នៅសល់ចន្លោះយើងទុកស្បេស ៣ម៉ែត្រ សម្រាប់កីឡាករលោតវៃបាល់បានងាយស្រួល ដោយឡែកតារាងបាល់ ដែលត្រូវប្រកួតជាក់ស្តែងមានទំហំ ៨x១៦ម៉ែត្រ៕