ដោយ: គង់ លាងហួរ
គូឡាឡាំពួរ: នាយករដ្ឋមន្ត្រីម៉ាឡេស៊ី លោក អាន់វ៉ា អ៊ីប្រាហ៊ីម បានអះអាងថា ប្រទេសចិននឹងបោះទុនវិនិយោគប្រមាណ៣៨,៦៤ពាន់លានដុល្លារ នៅក្នុងប្រទេសម៉ាឡេស៊ី រួមទាំងឧស្សាហកម្មគីមីឥន្ធនៈ និងរថយន្តផងដែរ។
លោក Anwar បានថ្លែងនៅក្នុងសភាថា ក្រុមហ៊ុន Rongsheng Petrochemical របស់ប្រទេសចិននឹងបោះទុនវិនិយោគ ប្រមាណ៨០ពាន់លានRM នៅក្នុងរោងចក្រចម្រាញ់គីមីឥន្ធនៈ នៅភាគខាងត្បូងប្រទេសម៉ាឡេស៊ី។
លោកបានបន្តថា “ក្រុមហ៊ុនផលិតរថយន្ត Geely នឹងបណ្តាក់ទុនចំនួន២ពាន់លានRMពីដំបូង ហើយក្រោយមកនឹងកើនឡើងដល់៣២ពាន់លាន RM ។
លោក Anwar ដែលបានបំពេញទស្សនកិច្ចជាផ្លូវការ នៅប្រទេសចិនកាលពីសប្តាហ៍មុន មិនបានផ្តល់ពេលវេលាជាក់លាក់ សម្រាប់ការសន្យាវិនិយោគសរុបនោះទេ។
លោកនាយករដ្ឋមន្ត្រី ក៏បានមានប្រសាសន៍ផងដែរថា លោកបានពិភាក្សាជាមួយប្រទេសចិន ដើម្បីកាត់បន្ថយការពឹងផ្អែករបស់តំបន់អាស៊ីលើប្រាក់ដុល្លារអាមេរិក។
លោកបានបញ្ជាក់ថា ធនាគារកណ្តាលរបស់ប្រទេសម៉ាឡេស៊ីកំពុងធ្វើការលើគំនិតផ្តួចផ្តើមមួយ ដើម្បីអនុញ្ញាតឱ្យទីក្រុងគូឡាឡាំពួ និងប្រទេសចិន ធ្វើពាណិជ្ជកម្មដោយប្រើប្រាក់រីងហ្គីតនិងប្រាក់យ័ន។
លោក Anwar បានមានប្រសាសន៍ថា “គ្មានហេតុផលសម្រាប់ប្រទេសមួយ ដូចជាម៉ាឡេស៊ី ដើម្បីបន្តពឹងផ្អែកលើប្រាក់ដុល្លារអាមេរិកនោះទេ”។
លោកAnwar បានស្នើឱ្យបង្កើតមូលនិធិរូបិយវត្ថុអាស៊ី នៅវេទិកាBoao ក្នុងប្រទេសចិនកាលពីសប្តាហ៍មុន ហើយនៅក្នុងកិច្ចប្រជុំទ្វេរភាគី ប្រធានាធិបតីចិនលោកស៊ី ជីនពីង ក៏បានស្វាគមន៍គំនិតដែលនឹងត្រូវបានពិភាក្សាបន្ថែមទៀតផងដែរ៕
