ដោយ: គង់ លាងហួរ
ភ្នំពេញ: រដ្ឋមន្ត្រីក្រសួងពាណិជ្ជកម្មកម្ពុជាបានសង្កត់ធ្ងន់លើតួនាទីដ៏សំខាន់នៃវិស័យពាណិជ្ជកម្ម និងទេសចរណ៍ក្នុងការអភិវឌ្ឍន៍សេដ្ឋកិច្ចសង្គមរបស់ប្រទេសឆ្ពោះទៅរកការស្តារឡើងវិញប្រកបដោយបរិយាប័ន្ន ភាពធន់ និងនិរន្តរភាព។
លោករដ្ឋមន្ត្រី ប៉ាន សូរស័ក្តិ បានលើកឡើងបែបនេះនៅពេលថ្លែងសុន្ទរកថាក្នុងពិធីបើកទស្សនវិស័យសេដ្ឋកិច្ចសម្រាប់តំបន់អាស៊ីអាគ្នេយ៍ ចិន និងឥណ្ឌា ឆ្នាំ២០២៣៖ ការងើបឡើងវិញនៃវិស័យទេសចរណ៍ក្រោយជំងឺរាតត្បាតនៃសិក្ខាសិលាអង្គការសហប្រតិបត្តិការសេដ្ឋកិច្ច និងការអភិវឌ្ឍន៍ (OECD)នាពេលថ្មីៗនេះ។

-->
លោកបានបន្តថា “វិស័យពាណិជ្ជកម្មបានបង្កើនឱកាសការងារ បង្កើតប្រាក់ចំណូល និងសម្រួលដល់ខ្សែសង្វាក់ផ្គត់ផ្គង់អាហារ និងទំនិញ”។
វិស័យទេសចរណ៍គឺជាកម្លាំងចលករសម្រាប់ពាណិជ្ជកម្មសេវាកម្ម ការអភិវឌ្ឍន៍ហេដ្ឋារចនាសម្ព័ន្ធ និងការលើកកម្ពស់ទំនាក់ទំនងរវាងប្រជាជន និងប្រជាជនផងដែរ។
រាជរដ្ឋាភិបាលកម្ពុជា កំពុងធ្វើពិពិធកម្មសេដ្ឋកិច្ចរបស់ប្រទេស តាមរយៈការបង្កើតកិច្ចព្រមព្រៀងពាណិជ្ជកម្មសេរីពហុភាគី តំបន់ អនុតំបន់ និងទ្វេរភាគី។
លោកបានបន្តទៀតថា “ការកសាងសមត្ថភាពស្ថាប័ន និងកំណែទម្រង់ច្បាប់ និងបទប្បញ្ញត្តិ និងក្របខ័ណ្ឌចាំបាច់ ក៏ត្រូវបានណែនាំផងដែរ ដើម្បីទាញយកសក្តានុពលកំណើន”។

លោករដ្ឋមន្ត្រីបានលើកឡើងពីទស្សនវិស័យសេដ្ឋកិច្ចរបស់អង្គការ OECD ដោយបញ្ជាក់ថា សេដ្ឋកិច្ចរបស់កម្ពុជាសម្រេចបានក្នុងរង្វង់៤,៥ភាគរយក្នុងឆ្នាំ២០២២ ហើយត្រូវបានគេរំពឹងថា នឹងកើនឡើងដល់៦,៣ភាគរយនៅឆ្នាំនេះ។
បញ្ហាប្រឈមចំពោះកំណើនសេដ្ឋកិច្ចរួមមានសម្ពាធអតិផរណាជាបន្តបន្ទាប់ និងការធ្លាក់ចុះសេដ្ឋកិច្ចសកល ដែលមួយផ្នែកអាចត្រូវបានដោះស្រាយដោយការបើកឡើងវិញនូវសេដ្ឋកិច្ចសំខាន់ៗក្នុងតំបន់ និងការសម្របខ្លួននៃវិស័យពាណិជ្ជកម្ម និងទេសចរណ៍ទៅនឹងនិន្នាការថ្មី រួមទាំងឌីជីថលនីយកម្ម។
លោក ប៉ាន សូរស័ក្តិ បានកោតសរសើរចំពោះសិក្ខាសាលា ដែលរៀបចំឡើងក្នុងគោលបំណងផ្តល់នូវបច្ចុប្បន្នភាពស្តីពីការងើបឡើងវិញនៃសេដ្ឋកិច្ចពិភពលោក និងលើកកម្ពស់ការយល់ដឹងអំពីសេដ្ឋកិច្ច ពាណិជ្ជកម្ម ការវិនិយោគ និងទេសចរណ៍៕