ដោយៈវឌ្ឍនៈ
ភ្នំពេញ ដើម្បីចូលរួមក្នុងការអនុវត្តគម្រោងកែលម្អ ស្ដារប្រព័ន្ធស្រោចស្រព និងប្រព័ន្ធរំដោះទឹកប៉ែកនិរតីនៃរាជធានីភ្នំពេញ រាជរដ្ឋាភិបាលនៃប្រទេសជប៉ុនបានផ្ដល់ឥណទានជាង១៨លានដុល្លារអាមេរិកដល់កម្ពុជា ក្នុងកិច្ចការវិនិយោគសាធារណៈមួយនេះ ។ នេះ បើតាមសេចក្ដីប្រកាសព័ត៌មានរបស់ក្រសួងការបរទេសនិងសហប្រតិបត្តិការអន្តរជាតិ ។
នៅព្រឹកថ្ងៃទី១០ មេសា ២០២៣នេះ លោកប្រាក់ សុខុន ឧបនាយករដ្ឋមន្ត្រី រដ្ឋមន្ត្រីការបរទេសនិងសហប្រតិបត្តិការអន្តរជាតិ និង លោកUENO Atsushi ឯកអគ្គរាជទូតជប៉ុន ប្រចាំកម្ពុជា ក៏បានចុះ ហត្ថលេខា លើលិខិតប្ដូរសារ និងឯកសារពាក់ព័ន្ធ នៃឥណទានសម្បទាន សម្រាប់អនុវត្ត គម្រោងកែលម្អ និងស្ដារប្រព័ន្ធស្រោចស្រព និងប្រព័ន្ធរំដោះទឹកភាគនិរតី នៃរាជធានីភ្នំពេញ ដំណាក់កាលទី២ ។
លោកUENO Atsushi ឯកអគ្គរាជទូតជប៉ុនប្រចាំកម្ពុជា បានថ្លែងថា ថវិកាប្រមាណ១៨លានដុល្លារអាមេរិក នឹងធ្វើការកែលម្អគម្រោងនិងស្តារប្រព័ន្ធស្រោចស្រពនិងរំដោះទឹកភាគនិរនីនៃរាជធានីភ្នំពេញ ជាប់នឹងខេត្តកណ្តាល កំពង់ស្ពឺនិងតាកែវ។ តាមគម្រោងនេះ លោកជឿថា ប្រជាកសិករនឹងមានភាពងាយស្រួល ក្នុងការដឹកជញ្ជូនកសិផលរបស់ពួកគាត់ ដើម្បីលក់នៅក្នុងទីផ្សារនានានៅរាជធានីភ្នំពេញ ។ ហើយចាប់តាំងពីមានទំនាក់ទំនងនិងកិច្ចសហប្រតិបត្តិការរវាងប្រទេសទាំងពីរមក មានសមិទ្ធិផលជាច្រើន ដែលទទួលបានតាមរយៈកិច្ចសហប្រតិបត្តិការនេះ។
លោកបញ្ជាក់ថា តាមរយៈការចុះហត្ថលេខា ផ្តល់ឥណទាននាពេលនេះបានបង្ហាញពីកិច្ចសហប្រតិបត្តិការកាន់តែរឹងមាំបន្ថែមទៀត រវាងប្រទេសទាំងពីរ។ហើយឯកឧត្តមមានជំនឿជឿជាក់ថា រាជរដ្ឋាភិបាលជប៉ុននឹងបន្តផ្តល់ជំនួយនានាបន្ថែមមកដល់កម្ពុជា។
លោកប្រាក់ សុខុន រដ្ឋមន្ត្រីក្រសួងការបរទេសនិងសហប្រតិបត្តិការអន្តរជាតិបានថ្លែងអំណរគុណដល់ប្រទេសជប៉ុន ដែលបានផ្តល់ជំនួយជាច្រើនចាប់តាំងពីឆ្នាំ១៩៩៣មកដល់ពេលបច្ចុប្បន្ន។ លោកថា”ឥណទានដែលរាជរដ្ឋាភិបាលជប៉ុនប្រមាណជាង១៨លានដុល្លារអាមេរិកនេះគឺ ដើម្បីកែលម្អគម្រោងស្រោចស្រពដែលស្ថិតនៅបែកខាងនិរតីរាជធានីភ្នំពេញ ។ ហើយគម្រោងឥណទាននេះដែរ ជាផ្នែកមួយ ដែលប្រទេសទាំងពីរបានចុះហត្ថលេខា កាលពី៧ឆ្នាំមុន ដែលមានថវិកាប្រមាណ៤លានដុល្លារអាមេរិក។
លោកបន្តថា ប្រទេសកម្ពុជា ជាប្រទេសកសិកម្ម ប៉ុន្តែដោយសារតែការប្រែប្រួលអាកាសធាតុបានធ្វើឱ្យមានការប្រឈមជាច្រើន ។ ជំនួយនេះនឹងផ្តល់គម្រោងអភិវឌ្ឍន៍កាន់តែមានភាពប្រសើរ និងបង្កើនដល់វិស័យកសិកម្មកាន់តែប្រសើរឡើងថែមទៀត ៕
