វិភាគៈតើអ្នកនៅក្នុងវិស័យអចលនទ្រព្យគួរធ្វើបែបណាក្នុង ស្ថានភាពទីផ្សារបែបនេះ

0

        ដោយៈយិន​ លាងគង់អគ្គនាយកគេហទំព័រPropertyarea

        ភ្នំពេញៈ នៅពេលទីផ្សារ មានចំនួនអ្នកលក់ ច្រើនជាងអ្នកទិញ តម្លៃអចលនទ្រព្យនឹងធ្លាក់ចុះ ស្របពេលមនុស្សមួយចំនួនបង្ខំចិត្តលក់ ដើម្បីដោះបំណុលរបស់ពួកគេ ប៉ុន្តែការលក់បញ្ចុះតម្លៃពេលខ្លះមិនមែនជាដំណោះស្រាយទេ។

នៅពេលដែលមន្រ្តីជាន់ខ្ពស់រដ្ឋាភិបាល ហៅស្ថានភាពសេដ្ឋកិច្ចពិភពលោកថា Perfect Storm ច្បាស់ណាស់ពាក្យនេះពិតជាមានឥទ្ឋិពលអវិជ្ជមានដល់ទីផ្សារ ខណៈវិនិយោគិនបរទេសមួយចំនួនបានផ្អាកគំរោងរបស់ពួកគេ ហើយអ្នកវិនិយោគក្នុងស្រុកបាន និងកំពុងរង់ចាំមើលស្ថានភាព(Waiting& See)ទីផ្សារ និងសេដ្ឋកិច្ចមានភាពប្រសើរឡើង។

ស្ថានភាពសេដ្ឋកិច្ចសកល

        សង្រ្គាមមេរោគ(កូវីដ១៩) បានធ្វើឲ្យពិភពលោកក្រឡាប់ចាក់ ដែលអ្នកវិភាគធំៗ នៅលើពិភពលោកបានអះអាងថា សេដ្ឋកិច្ចពិភពលោកជួបមហន្តរាយ ធំជាងសង្រ្គាមលោកលើកទី២ទៅទៀត ខណៈមនុស្សរាប់លាននាក់បានឆ្លង និងស្លាប់ ដោយសារជម្ងឺដ៏កាចសាហាវប្រចាំសតវត្សរ៍នេះ។

ជាមួយនឹងការឈានទៅរកការបិទបញ្ចប់ នូវសោកនាដកម្មដ៏អាក្រក់នេះ វិ​បត្តិសង្រ្គាមរុស្ស៊ី និងអ៊ុយក្រែនបានផ្ទុះឡើង និងមិនដឹងបញ្ចប់នាពេលណា ស្របពេលសង្រ្គាមនេះ បានធ្វើឲ្យពិភពលោកជួបភាពចលាចល និងកលយុគជាថ្មី ដោយសារការកើនឡើងនូវអត្រាអតិផរណា ការកើនឡើងនូវតម្លៃប្រេងឥន្ឋនៈ ដែលនាំឲ្យអំណាចទិញធ្លាក់ចុះ។

សង្រ្គាមនេះ មិនបានធ្វើឲ្យបណ្តាបណ្តាប្រទេសទាំងអស់ ជួបហានិភ័យនៃការដាំក្បាលចុះសេដ្ឋកិច្ចនោះទេ។

ជាក់ស្តែងតំបន់អាស៊ាន ដែលមានភាពលេចធ្លោជាងគេលើពិភពលោក ជាមួយប្រជាជនជាង៦៥០លាននាក់ បានជួបនូវឱកាសមួយចំនួនផងដែរ។ ជាក់ស្តែងសេដ្ឋកិច្ចកម្ពុជា កាលពីឆ្នាំ២០២២សម្រេចបានកំណើន៥, ៥០ភាគរយ និងរំពឹងកើនដល់រង្វង់៥,៥ភាគរយនៅឆ្នាំ២០២៣នេះ។ នេះបើតាមការព្យាករណ៍របស់ស្ថាប័នអន្តរជាតិធំៗដូចជា ធនាគារពិភពលោក ធនាគារអភិវឌ្ឍន៍អាស៊ី មូលនិធិរូបប័ណ្ណអន្តរជាតិជាដើម។

កំនើនសេដ្ឋកិច្ចកម្ពុជាឆ្នាំ២០២៣ ដើរស្របគ្នានឹងសេដ្ឋកិច្ចរបស់វៀតណាម និងស្ថិតនៅពីក្រោយកំនើនសេដ្ឋកិច្ច របស់ប្រទេសហ្វីលីពីន បើទោះជាស្ថានភាពសេដ្ឋកិច្ចពិភពលោក កំពុងជួបភាពមិ​នប្រាកដប្រជាក្តី។

សុខភាពសេដ្ឋកិច្ចកម្ពុជា

        ការងើបឡើងវិញនៃវិស័យទេសចរណ៍នៅឆ្នាំនេះ បាននិងកំពុងបង្ហាញសញ្ញាវិជ្ជមានដល់វិស័យដទៃទៀត ដោយសារវិស័យនេះបានស្រោបស្រពផលដល់ផ្នែកផ្សេងទៀត នៃចរន្តសេដ្ឋកិច្ចជាតិ។

រដ្ឋមន្រ្តីក្រសួងទេសចរណ៍រំពឹងថា “កម្ពុជានឹងទទួលបានភ្ញៀវទេសចរណ៍អន្តរជាតិ ប្រមាណ៤លាននាក់នៅឆ្នាំនេះ ស្របពេលប្រទេសនេះ បានត្រៀមរៀបចំកីឡាស៊ីហ្គេម និងព្រឹត្តិការណ៍មួយចំនួនទៀតផងដែរ។

ជាមួយនឹងសញ្ញាវិជ្ជមាននេះ វិស័យកសិកម្មដែលតំណាងឲ្យកំលាំងចលករសំខាន់មួយទៀតរបស់កម្ពុជា ក៏មានសញ្ញាសុទិដ្ឋិនិយមជាមួយកំណើននៃការនាំចេញ ទៅកាន់ទីផ្សារប្រទេសចិន និងបណ្តាប្រទេសជាច្រើនទៀត តាមរយៈការចុះកិច្ចព្រមព្រៀងពាណិជ្ជកម្មសេរីជាមួយប្រទេសចិន ជាមួយសាធារណៈរដ្ឋកូរ៉េ និងការចូលជាធរមាននៃកិច្ចព្រមព្រៀង ភាពជាដៃគូសេដ្ឋកិច្ចតំបន់(RCEP) ដែលតំណាងឲ្យ៣០ភាគរយ នៃទំហំសេដ្ឋកិច្ចពិភពលោក។

ទោះជាយ៉ាងណាវិស័យវាយណភ័ណ្ឌកាត់ដេរ និងស្បែកជើងបានជួបវិបត្តិតិចតួចផងដែរ ដោយរោងចក្រជាច្រើនបានបិទទ្វារ និងកាត់បន្ថយផលិតភាព ដោយសារការបញ្ជាទិញធ្លាក់ចុះពីតំបន់អឺរ៉ុប ព្រោះវិបត្តិសង្រ្គាម​រុស្ស៊ី និងអ៊ុយក្រែន ប៉ុន្តែយ៉ាងណាវិស័កម្មន្តសាលនៅតែមានភាពល្អប្រសើរ ជាមួយនឹងកំណើនប្រកបដោយសុទិដ្ឋិនិ​យមផងដែរ។

អំណាចនៃការជម្រុញកំនើនសេដ្ឋកិច្ចមួយទៀត ក៏បាននិងកំពុងជួបហានិភ័យផងដែរ នោះគឺវិស័យសំណង់ និងអចលនទ្រព្យ ដែលត្រូវការពេលវេលាបន្ថែមទៀត ប៉ុន្តែយ៉ាងណាវិស័យនេះ នៅតែមានសភាពធន់ទ្រាំ នឹងការវាយ​ប្រហារពីវិបត្តិផងដែរ ដោយសារកត្តាមួយចំនួនដូចជា ទី១ អ្នកវិនិយោគក្នុងស្រុកភាគច្រើន មិនប្រើប្រាស់លុយពីស្ថាប័នហិរញ្ញវត្ថុសម្រាប់វិនិយោគ។

ទី២ ពួកគេនៅតែមានទំនុកចិត្ត លើបរិស្ថាននយោបាយ សេដ្ឋកិច្ច សង្គម ដែលពួកគេមិនជួ​បភាគចលាចល ទី៣ ស្ថាប័នហិរញ្ញវត្ថុនានានៅតែបន្តផ្តល់ឥណទាន ទី៤ ទំនុកចិត្ត និងភាពសុទិដ្ឋិនិយមនៅតែមានក្នុងចិត្តរបស់ប្រជាពលរដ្ឋ ដោយសារពួកគេមានទំនុកចិត្តលើការដឹកនាំរបស់ប្រមុខរដ្ឋាភិបាល ទី៥ សេដ្ឋកិច្ចកម្ពុជានៅតែមានសញ្ញាវិជ្ជមាន និងងើបឡើងឆាប់រហ័ស ដែលធ្វើឲ្យអំណាចទិញក្នុងទីផ្សារកើនឡើង។

អចលនទ្រព្យត្រូវការពេលវេលា ខណៈអំណាចទីផ្សារនៅតែល្អ

        មានកត្តាអំណោយផលជាច្រើន បន្ថែមពីការលើកឡើងខាងលើ សម្រាប់ទីផ្សារអចលនទ្រព្យនៅកម្ពុជា ព្រោះកម្ពុជាមានកត្តាអំណោ​យផលជាច្រើនទៀត ដែលលើកទឹកចិត្តដល់វិនិយោគិនអន្តរជាតិ ដូចជា ទី១ ជនបរទេសមានសិទ្ឋបើកក្រុមហ៊ុននៅកម្ពុជា ដោយអាចកាន់កាប់ភាគហ៊ុន១០០ភាគរយដោយខ្លួនឯង ទី២ ច្បាប់ពន្ឋដែលលើកទឹកចិត្តដល់ជនបរទេស អាចបង្វិលប្រាក់ចំណេញពីកម្ពុជាបាន១០០ភាគរយ ទី៣ ច្បាប់ស្តីពីសហកម្មសិទ្ឋ ដែលអនុញ្ញាត្តឲ្យជនបរទេសទិញអចលនទ្រព្យចាប់ពីជាន់ទី១ឡើង។

ទី៤ ផលចំណេញពីការវិនិយោគអចលនទ្រព្យនៅកម្ពុជា នៅតែខ្ពស់ជាងបណ្តាប្រទេសក្នុងតំបន់ ទី៤ ការអភិវឌ្ឍន៍ហេដ្ឋារចនាសម្ព័ន្ឋ​រដ្ឋាភិបាល ដែលបានបង្ហូរទុនរាប់រយលានដុល្លារ ជារៀងរាល់ឆ្នាំ កំពុងជួយដល់វិស័យនេះដោយផ្ទាល់ និងប្រយោលផងដែរ។ ទី៥ផ្អែកលើកត្តាភូមិសាស្រ្ត នយោបាយ នៅតែជាទីតាំងដែលរដ្ឋាភិបាក និងអ្នកវិនិយោគចិន នៅតែបន្តគាំទ្រ និងជម្រុញការអភិវឌ្ឍន៍កម្ពុជា ស្របពេលអ្នកវិនិយោគបរទេសជាច្រើនទៀត បាននិងកំពុងបង្កើនការវិនិយោគនៅកម្ពុជាផងដែរ។

អំណាចទិញក្នុងទីផ្សារ

នៅពេលនិយាយពីអំណាចទិញក្នុងទីផ្សារ គេនិយាយអំពីសេដ្ឋកិច្ច និងប្រជាសាស្រ្ត។

លោក Li Junji ប្រធានកិត្តិយសនៃសមាគមសហគ្រិនចិន កម្ពុជាបានពន្យល់ ពីស្ថានភាពបច្ចុប្បន្ននៅកម្ពុជា នៅវេទិកាសេដ្ឋកិច្ច និងពាណិជ្ជកម្ម ដែលប្រារព្ធឡើងនៅទីក្រុងKaohsiung បានលើកហេតុផលសម្រាប់អនុសាសន៍ របស់លោកដែលវិនិយោគិនអន្តរជាតិគួរមក​វិនិយោគនៅកម្ពុជា ដោយឈរលើមូលដ្ឋានមួយចំនួន ដូចជា ទី១ ប្រ​ទេសកម្ពុជា មានស្ថានភាពនយោបាយ ស្ថិរភាពបំផុតក្នុងអាស៊ាន។ បើប្រៀបធៀបជាមួយកងទ័ពអាវលឿង កងទ័ពអាវក្រហម និងចលាច​លនយោបាយរបស់វៀតណាម ក្នុងប៉ុន្មានឆ្នាំចុងក្រោយនេះ កម្ពុជាមានស្ថិរភាពល្អណាស់។

លោកបន្តថា ប្រសិនបើអ្នកចង់ធ្វើប្រតិបត្តិការលក់ផ្ទះ ពន្ធប្រតិ​បត្តិការគឺមានត្រឹមតែ៤%ប៉ុណ្ណោះ នៃតម្លៃអចលនទ្រព្យ ហើយពន្ធលើអចលនទ្រព្យប្រចាំឆ្នាំមានត្រឹមតែ០,១% ប៉ុណ្ណោះនៅកម្ពុជា។

យោងតាមស្ថិតិរបស់ការិយាល័យ​ ជំរឿន​សហរដ្ឋ​អាមេរិកបានឱ្យដឹងថា ដោយ​សារ​ហេតុផល​មិន​យក​ពន្ធ សហរដ្ឋ​អាមេរិក​នៅ​តែ​ជា​ទីផ្សារ​នាំ​ចេញដ៏ធំបំផុតរបស់កម្ពុជា។

លោកLi Junjiបានពន្យល់ថា អត្ថប្រយោជន៍ចុងក្រោយ គឺភាគលាភប្រជាសាស្ត្រ​។  បច្ចុប្បន្ន​អាយុ​មធ្យម​របស់​ប្រជាជន​កម្ពុជា ​គឺស្ថិតនៅត្រឹមអាយុ​២៧​ឆ្នាំ​ ក្នុង​នោះ​យុវជន​ក្រោម​អាយុ​៣៤​ឆ្នាំ ​មាន​ចំនួន​៧០%​នៃ​ចំនួន​ប្រជាជន​សរុប​ ហើយកម្ពុជាមិនមាន​ការ​ខ្វះខាត ​ក្នុង​ការ​ផ្គត់ផ្គង់​កម្លាំង​ពលកម្ម​នោះទេ។

អ្នកវិនិយោគអចលនទ្រព្យគួរតែមានសុទិដ្ឋិយម

        នៅក្នុងវិបត្តិដែលបានអូសបន្លាយចូលឆ្នាំទី៤ វាជាពេលវេលានៃវិបត្តិយូរជាងគេ បើធៀបនឹងវិបត្តិឆ្នាំ១៩៨៧ វិបត្តិឆ្នាំ១៩៩៧ វិបត្តិឆ្នាំ២០០៨។

ប៉ុន្តែការអូសបន្លាយរយៈពេលវែង នៃវិបត្តិនាពេលនេះ បាននិងកំពុងឆ្លុះបញ្ចាំងថា អចលនទ្រព្យបែបណាគួរវិនិយោគ ម្ចាស់គំរោងណាដែលអាចឈរជើងបានរ៉ឹងមាំ និងគំរោងមួយណាដែលស័ក្តិសម​នឹងបោះទុនជាមួយ។

ការបង្អាក់ការវិនិយោគ ក្នុងស្ថានភាពនេះមានរឿងត្រូវពិចារណាមួយចំនួន ទី១ ការទុកលុយក្នុងទូ នឹងធ្វើឲ្យសេដ្ឋកិច្ចទាំងអស់គ្នាជួបបញ្ហា និងប្រឈមនឹងវិបត្តិ កាន់តែមានរយៈពេលវែង ទី២ ការព្យា​យាមលក់អចលនទ្រព្យក្រោមតម្លៃទីផ្សារ នឹងធ្វើឲ្យទីផ្សារកាន់តែជួបភាពអាប់អួរ ទី៣ ការភ័យខ្លាច វានឹងនាំឲ្យមានវិបត្តិកាន់តែអូសបន្លា​យ ទី៤ ការវិនិយោគនាពេលនេះ គួរជាពេលវេលាល្អបំផុតសម្រាប់ផលចំណេញនាពេលអនាគត។

ដំណោះស្រាយសម្រាប់រយៈពេលនេះ និងវិបត្តិពិភពលោកនៅតែមិនអាចព្យាករណ៍បានថា នឹងបញ្ច​ប់នាពេលណា សុទ្ឋតែជាភាពមិនច្បាស់លាស់ សុទ្ឋតែស្ថិតនៅក្នុងមូលដ្ឋាន នៃការសម្រេចចិត្តវិនិយោគឬមិនបន្ត ប៉ុន្តែឱកាសសម្រាប់ការវិនិយោគនាពេលនេះ នៅតែល្អជាងពេលណាទាំងអស់។

ហេតុផលនៅត្រង់ថា ទី១ សេដ្ឋកិច្ចកម្ពុជា កំពុងមានសញ្ញាកើនឡើងដោយសុទិដ្ឋិនិយម ជាមួយនឹងរូបភាពសាជីផ្ងា និងភាពធន់ទ្រាំទី២ ការគាំទ្ររបស់រដ្ឋាភិបាល លើវិស័យឯកជនទាំងផ្ទាល់ និងប្រយោលកើនឡើង ទី៣ ផលចំណេញរយៈពេលវែងនៅតែស្ថិតក្នុងសុទិដ្ឋិនិយម សម្រាប់អ្នកវិនិយោគជាតិ និងអន្តរជាតិ។

ទី៤ ភូមិសាស្រ្តនយោបាយ ការប្រកាន់យកនយោបាយកាទូតបែបចម្រុះព៌ណ នៅតែរក្សាស្ថេរភាពនយោបាយកម្ពុជា និងទី៥ ការរៀបចំអ្នកបន្តវេនដឹកនាំរបស់សម្តេ​ចតេជោ គឺជាកត្តាប្រវត្តិសាស្រ្ត និងជាព្រំក្រហម សម្រាប់កម្ពុជាឈានឡើង ទៅកាន់ប្រទេសមានប្រាក់ចំណូលមធ្យម កម្រិតខ្ពស់នៅឆ្នាំ២០៣០ និងប្រទេសមានប្រាក់​ចំណូលខ្ពស់នៅឆ្នាំ២០៥០ នៅតែស្ថិតក្នុងសុទិដ្ឋិនិយមពីអ្នកវិភាគ និងសេដ្ឋវិទូនានា៕

 

LEAVE A REPLY

Please enter your comment!
Please enter your name here