ដោយៈ សុខុម
ឌូបៃ: ក្នុងប៉ុន្មានឆ្នាំចុងក្រោយនេះ បច្ចេកវិទ្យាព្រីន 3D ត្រូវបានប្រើដើម្បីសាងសង់អ្វីៗគ្រប់យ៉ាង រាប់ចាប់ពីផ្ទះរហូតដល់ក្រុមហ៊ុន និងសូម្បីតែស្ពាន។
ពេលនេះ ក្រុងឌូបៃ នៃប្រទេសអារ៉ាប់រួមអេមីរ៉ាត គ្រោងសាងសង់ព្រះវិហារអ៊ិស្លាម ព្រីន3D ដំបូងបង្អស់របស់ពិភពលោក។លោក Ali Mohammad Alhalyan Alsuwaidi ប្រធានផ្នែកវិស្វកម្មនៅមន្ទីរកិច្ចការអ៊ិស្លាម និងសកម្មភាពសប្បុរសធម៌ (IACAD) នៃក្រុងឌូបៃ បានឱ្យដឹងថា ព្រះវិហារអ៊ិស្លាម ព្រីន3D កម្ពស់២ជាន់ដែលមានផ្ទៃ២.០០០ម៉ែត្រការ៉េនេះ នឹងអាចផ្ទុកអ្នកគោរពបូជា បានចំនួន៦០០នាក់។យោងតាមសារព័ត៌មាន CNN ចុះផ្សាយកាលពីថ្ងៃពុធ ទី៣ ខែឧសភា ឱ្យដឹងថា ព្រះវិហារនេះនឹងត្រូវសាងសង់ឡើង ពីបេតុងលាយ ដោយការសាងសង់គ្រោង នឹងចាប់ផ្តើមនៅចុងឆ្នាំ២០២៣ ហើយរំពឹងថានឹងបញ្ចប់ជាស្ថាពរនៅត្រីមាសទី១ ដើមឆ្នាំ២០២៥។ការសាងសង់អាគារ ដោយប្រើបច្ចេកវិទ្យាព្រីន 3D ត្រូវការម៉ាស៊ីនព្រីនធំៗដែលត្រូវបានបញ្ចូលកម្មវិធី ជាមួយនឹងព័ត៌មានឌីហ្សាញ។ ម៉ាស៊ីនព្រីនទាំងនោះ ច្របាច់បេតុងលាយចេញ តាមក្បាលទុយោ ហើយបេតុងលាយ នឹងបាញ់គរលើគ្នាជាស្រទាប់ៗ ដើម្បីឱ្យចេញជារូបរាងអគារ។
អគារព្រីន 3D ភាគច្រើនត្រូវបានសាងសង់ពីបេតុង ប៉ុន្តែក៏អាចព្រីនដោយប្រើសម្ភារៈផ្សេងទៀត ដូចជាដីឥដ្ឋជាដើមបានផងដែរ។ក្រុងឌូបៃ បានកំណត់គោលដៅក្លាយជារដ្ឋធានីព្រីន 3D របស់ពិភពលោក ហើយក្នុងឆ្នាំ២០១៨ ក្រុងឌូបៃ បានដាក់ចេញ “យុទ្ធសាស្រ្តព្រីន 3D” ដែល២៥%នៃសំណង់ថ្មីៗក្នុងក្រុងឌូបៃ គ្រោងសាងសង់ដោយព្រីន 3D នៅត្រឹមឆ្នាំ២០៣០៕ CNN៕
សូមទំនាក់ទំនងផ្សព្វផ្សាយពាណិជ្ជកម្មរបស់លោកអ្នកតាមរយៈទូរស័ព្ទលេខ៖ 086485566 សូមអរគុណ!