ដោយវុត្ថា
ភ្នំពេញ៖ លក្ខណៈដូចគ្នានៃ ពន្ធ និង អាករ មានន័យទូទៅដូចគ្នា គឺជាកាតព្វកិច្ចរបស់ពលរដ្ឋ និងគ្រប់សមាសភាពសេដ្ឋកិច្ច ត្រូវបង់ជូនរដ្ឋ ទៅតាមច្បាប់កំណត់។
លក្ខណៈខុសគ្នា
ចំណេះដឹង! តើពន្ធ និងអាករ មានលក្ខណៈដូចគ្នា និងខុសគ្នាដូចម្តេចខ្លះ?
- ពាក្យ ពន្ធ សំដៅដល់កាតព្វកិច្ចរបស់ប្រជាពលរដ្ឋ និងគ្រប់សមាសភាពសេដ្ឋកិច្ចត្រូវបង់ (សាច់ប្រាក់ ឬវត្ថុ) ជូនរដ្ឋទៅតាមច្បាប់កំណត់ដោយផ្ទាល់។ និយាយឪ្យងាយយល់ ពន្ធ មានន័យពន្ធផ្ទាល់ ឬបន្ទុកផ្ទាល់ ឬកាតព្វកិច្ចផ្ទាល់ ដែលតម្រូវបង់ឱ្យផ្ទាល់ពីអ្នកជាប់ពន្ធ។
ឧទាហរណ៍៖ ពន្ធលើប្រាក់បៀវត្ស ជាពន្ធផ្ទាល់ព្រោះត្រូវទាផ្ទាល់ពីអ្នកជាប់ពន្ធ។ ពន្ធលើប្រាក់ចំណេញ ជាពន្ធផ្ទាល់ ព្រោះត្រូវទារផ្ទាល់ពីក្រុមហ៊ុន ឬ អាជីវករ ។ និងពន្ធលើធម្យោបាយ និងយានជំនិះជាពន្ធផ្ទាល់ព្រោះត្រូវទារពីម្ចាស់យានជំនិះ។
- ពាក្យ អាករ សំដៅដល់កាតព្វកិច្ចរបស់ប្រជាពលរដ្ឋ និងគ្រប់សមាសភាពសេដ្ឋកិច្ច ត្រូវបង់ (សាច់ប្រាក់ ឬវត្ថុ) ជូនរដ្ឋទៅតាមច្បាប់កំណត់ ដោយប្រយោល។ និយាយឪ្យងាយយល់ អាករ មានន័យថា ពន្ធប្រយោល ឬបន្ទុកប្រយោល ឬកាតព្វកិច្ចប្រយោលដែលតម្រូវឪ្យបង់ដោយប្រយោលពីអ្នកជាប់ពន្ធ។
ឧទាហរណ៍៖ អាករតម្លៃបន្ថែមជាពន្ធប្រយោល ព្រើត្រូវកំណត់តម្លៃបន្ថែមទៅលើទំនិញ ឬសេវាដែលបានទិញពីអ្នកប្រើប្រាស់ចុងក្រោយ។ អាករពិសេសលើទំនិញ និងសេវាមួយចំនួន ជាពន្ធប្រយោល ព្រោះត្រូវបង់ដោយអ្នកប្រើប្រាស់មិនមែនអ្នកផ្គត់ផ្គង់ទេ។ អាការលើការស្នាក់នៅជាពន្ធប្រយោល ព្រោះត្រូវបង់ដោយអ្នកស្នាក់នៅ សណ្ឋាគារ ផ្ទះសំណាក់ មិនមែនបង់ដោយម្ចាស់សណ្ឋាគារ ឬផ្ទះសំណាក់ទេ៕
