ដោយ: គង់ លាងហួរ
ភ្នំពេញ: ក្រុមប្រឹក្សាអភិវឌ្ឍន៍កម្ពុជា (CDC) បានអនុម័តគម្រោងវិនិយោគលើទ្រព្យសកម្មថេរចំនួន៦៥ ដែលមានតម្លៃជាង៥៨៨លានដុល្លារនៅក្នុងរយៈពេល៤ខែដំបូង ដើមឆ្នាំ២០២៣នេះ ខណៈវិនិយោគិនចិន គឺជាប្រភពនៃលំហូរវិនិយោគផ្ទាល់ពីបរទេស (FDI) ដ៏ធំបំផុតនៅកម្ពុជា។
លោក ជា វុទ្ធី អគ្គលេខាធិការរងក្រុមCDC បានមានប្រសាសន៍ថា លំហូរFDI បានដើរតួនាទីយ៉ាងសំខាន់ ក្នុងការអភិវឌ្ឍន៍សេដ្ឋកិច្ចសង្គមរបស់កម្ពុជា។
លោកបានថ្លែងក្នុងវេទិកាធុរកិច្ចកម្ពុជា -ចិនកាលពីពេលថ្មីៗនេះថា “ការវិនិយោគផ្ទាល់ពីបរទេស ជាពិសេសពីប្រទេសចិន បានដើរតួនាទីយ៉ាងសំខាន់ ក្នុងការរួមចំណែកដល់ការអភិវឌ្ឍន៍សេដ្ឋកិច្ច ការលើកកម្ពស់ជីវភាពប្រជាជន តាមរយៈលំហូរមូលធន បង្កើតការងារសម្រាប់ប្រជាជនក្នុងស្រុក និងការបង្កើនការនាំចេញ”។
លោក ជា វុទ្ធី ក៏បានលើកឡើងផងដែរថា ការកើនឡើងនៃការវិនិយោគរបស់ចិន ជាការឆ្លុះបញ្ចាំងពីទំនុកចិត្ត របស់អ្នកវិនិយោគនៅក្នុងប្រទេសកម្ពុជា។ លោកបានចាត់ទុកថា ទំនុកចិត្តនេះជំរុញមកពីកិច្ចសហប្រតិបត្តិការរវាងរដ្ឋាភិបាល បរិយាកាសវិនិយោគអំណោយផល និងទស្សនវិស័យសេដ្ឋកិច្ចជាវិជ្ជមានរបស់ប្រទេសកម្ពុជា។
លោកអះអាងថា កម្ពុជាមានកត្តាមួយចំនួន ដែលធ្វើឲ្យប្រទេសនេះ ក្លាយជាគោលដៅទាក់ទាញ សម្រាប់ការវិនិយោគបរទេស។ កត្តាទាំងនេះរួមមានសន្តិភាព កម្លាំងពលកម្មប្រកួតប្រជែង ធនធានធម្មជាតិដ៏សម្បូរបែប និងការចូលទៅកាន់ទីផ្សារដ៏ធំ តាមរយៈកិច្ចព្រមព្រៀងពាណិជ្ជកម្មសេរីទ្វេរភាគី ជាមួយប្រទេសចិន និងកូរ៉េខាងត្បូង និងភាពជាដៃគូសេដ្ឋកិច្ចគ្រប់ជ្រុងជ្រោយក្នុងតំបន់ (RCEP)។
លោកឧកញ៉ា លឹម ហេង អនុប្រធានសភាពាណិជ្ជកម្មកម្ពុជាបានមានប្រសាសន៍ថា “ច្បាប់វិនិយោគថ្មី រួមជាមួយនឹងការអនុគ្រោះពន្ធពាណិជ្ជកម្មដូចជា កិច្ចព្រមព្រៀង FTA កម្ពុជា-ចិន FTA កម្ពុជា-កូរ៉េ និងកិច្ចព្រមព្រៀង RCEP កំពុងផ្តល់កម្លាំងរុញច្រានដ៏ធំមួយក្នុងការទាក់ទាញការវិនិយោគមកកាន់កម្ពុជា”។
លោក សុខ ចិន្តាសោភា អគ្គលេខាធិការ CDC មានប្រសាសន៍ថា “ការកើនឡើងនៃការវិនិយោគ គឺជាសញ្ញាមួយដែលបង្ហាញថា ការខិតខំប្រឹងប្រែងរបស់រដ្ឋាភិបាលកំពុងដំណើរការ”។
លោកបន្ថែមថា “ការកើនឡើងនេះ មិនមែនជារឿងចៃដន្យនោះទេ ប៉ុន្តែដោយសារតែការខិតខំប្រឹងប្រែង របស់រដ្ឋាភិបាល ដែលបានយកឈ្នះលើការប្រយុទ្ធនឹងជំងឺកូវីដ-១៩ ដោយប្រើវ៉ាក់សាំងជាអាវុធយុទ្ធសាស្ត្រដ៏សំខាន់ ដើម្បីជួយកម្ពុជាឱ្យមានឱកាសអភិវឌ្ឍសេដ្ឋកិច្ចសង្គមឡើងវិញលើគ្រប់វិស័យ”៕
