ដោយ: គង់ លាងហួរ
អន្តរជាតិ: យោងតាមអាជ្ញាធរឧស្សាហកម្មនៃប្រទេសថៃ (IEAT) បានឱ្យដឹងថា ក្រុមហ៊ុនកូរ៉េខាងត្បូងចំនួន៥គ្រោងចាប់ផ្តើមគម្រោងវិនិយោគថ្មីនៅក្នុងប្រទេសថៃ រាប់ចាប់ពីអាជីវកម្មរថយន្តអគ្គិសនី (EV) រហូតដល់ការសាងសង់អចលនទ្រព្យឧស្សាហកម្មថ្មីមួយ។
លោក Veeris Ammarapala ទេសាភិបាលនៃអាជ្ញាធរ IEAT បានលើកឡើង បន្ទាប់ពីពិភាក្សាជាមួយក្រុមនាយកប្រតិបត្តិក្នុងអំឡុងពេលនៃកម្មវិធីបង្ហាញផ្លូវនាពេលថ្មីៗនេះនៅក្នុងប្រទេសកូរ៉េខាងត្បូងថា ក្រុមវិនិយោគិនកូរ៉េអាចនឹងបែងចែកប្រាក់ប្រហែល២០១,៥៥លានបាតសម្រាប់គម្រោងទាំងនេះ។
លោកបានបន្តថា “ក្រុមហ៊ុនកូរ៉េចំនួន ៤ ចាប់អារម្មណ៍វិនិយោគលើរថយន្តអគ្គិសនី EV និងគ្រឿងអេឡិចត្រូនិកសម្រាប់រថយន្ត ឬឧបករណ៍ពេទ្យ ហើយតម្លៃសម្រាប់អភិវឌ្ឍគម្រោងទាំងនេះត្រូវបានប៉ាន់ប្រមាណថាមានចំនួន២ពាន់លានបាត”។
ចំណែកឯ ក្រុមហ៊ុនកូរ៉េមួយទៀតចង់បង្កើតការបណ្តាក់ទុនរួមគ្នាជាមួយអាជ្ញាធរឧស្សាហកម្មនៃប្រទេសថៃ (IEAT) ដើម្បីសាងសង់អចលនទ្រព្យបែបឧស្សាហកម្មថ្មីមួយដែលនឹងត្រូវការទឹកប្រាក់ចំនួន៥ពាន់លានបាតសម្រាប់ការអភិវឌ្ឍ។
ក្រុមហ៊ុនកូរ៉េខាងត្បូងភាគច្រើនចង់វិនិយោគនៅក្នុងច្រករបៀងសេដ្ឋកិច្ចភាគខាងកើត (EEC) ខណៈរដ្ឋាភិបាលថៃគ្រោងប្រែក្លាយច្រករបៀងនេះ ដែលគ្របដណ្តប់ផ្នែកខ្លះនៃខេត្ត Chon Buri ខេត្ត Rayong និងខេត្ត Chachoengsao ទៅជាមជ្ឈមណ្ឌលឧស្សាហកម្មបច្ចេកវិទ្យាជាន់ខ្ពស់៕
