ដោយ: គង់ លាងហួរ
ភ្នំពេញ: ក្រុមហ៊ុនទេសចរណ៍អនឡាញ Trip.com Group បានចាប់ដៃគូ ជាមួយក្រុមហ៊ុនអាកាសចរណ៍ជាតិ Cambodia Angkor Air ដើម្បីកំណត់ទីតាំងអាកាសយានដ្ឋាន អន្តរជាតិសៀមរាប-អង្គរថ្មីជាអាកាសយានដ្ឋានឆ្លាតវៃក្នុងតំបន់។
ជាផ្នែកមួយនៃកិច្ចព្រមព្រៀងនេះ ក្រុមហ៊ុន Trip.com Group នឹងរួមចំណែក ក្នុងការលើកកម្ពស់សេវាកម្មឌីជីថល នៃព្រលានយន្តហោះថ្មីនេះ ដែលគ្រោងនឹងចាប់ផ្តើមប្រតិបត្តិការ នៅខែតុលាខាងមុខ។
ភាពជាដៃគូនេះ ក៏បម្រើដល់ការចាត់តាំងភាពប្រកួតប្រជែងរបស់កម្ពុជាជាគោលដៅសកលផងដែរ ព្រោះវាមានគោលបំណងពង្រឹងកិច្ចសហប្រតិបត្តិការ ក្នុងវិស័យទេសចរណ៍ផ្សេងៗ។ ភាពជាដៃគូនេះនឹងពង្រីកដល់យុទ្ធនាការទីផ្សារ ការអភិវឌ្ឍន៍សណ្ឋាគារ សេវាកម្មទិដ្ឋាការធ្វើដំណើរ និងកម្មវិធីបណ្តុះបណ្តាលទេពកោសល្យទេសចរណ៍នៅក្នុងប្រទេសទាំងពីរ។
ដោយបង្ហាញពីសារៈសំខាន់ នៃអាកាសយានដ្ឋានអន្តរជាតិអង្គរថ្មី នៅក្នុងយុទ្ធសាស្ត្រទេសចរណ៍ពិភពលោករបស់កម្ពុជា លោក តឹករ៉េត សំរេច ប្រធានក្រុមហ៊ុនអាកាសចរណ៍ Cambodia Angkor Air មានប្រសាសន៍ថា កិច្ចសហការជាមួយ Trip.com Group ក្នុងការបង្កើនសេវាកម្ម និងសាងសង់ព្រលានយន្តហោះឆ្លាតវៃ បង្ហាញពីឱកាសមួយសម្រាប់ការងើបឡើងវិញនៃទេសចរណ៍ពិភពលោក។
កាលពីខែមីនាកន្លងទៅ គណៈកម្មាធិការដឹកនាំសម្រាប់ការសាងសង់អាកាសយានដ្ឋាន អន្តរជាតិសៀមរាបអង្គរ ដឹកនាំដោយលោក តឹករ៉េត សំរេចបានប្រកាសថា អាកាសយានដ្ឋាននឹងសាងសង់រួចរាល់ទាន់ពេលវេលា សម្រាប់ការដាក់ឱ្យដំណើរការ នៅខែតុលាខាងមុខ៕
