ដោយៈគង់ សូរិយា
ភ្នំពេញៈ អតីតវីរៈស្ថាបត្យករកម្ពុជា លោកសាស្រ្តាចារ្យវណ្ណ ម៉ូលីវណ្ណ បានលើកឡើងនូវទស្សនទាន នៃការអភិវឌ្ឍន៍នាទិសទាំង៤នៅរាជធានីភ្នំពេញ។
តើលោកសាស្រ្តាចារ្យ ដែលជាស្ថាបត្យករដ៏ល្បីល្បាញលំដាប់អន្តរជាតិរូបនេះលើកឡើងបែបណាខ្លះ? ពីសក្តានុពលនៃទិសទាំង៤ជុំវិញរាជធានីភ្នំពេញ?។
១. ទីក្រុងភ្នំពេញ ត្រូវតែរីកទៅទិសខាងត្បូង ព្រោះជាដីតំបន់ខ្ពស់ អត់លិចទឹក ងាយស្រួលរៀបបណ្តាញទឹកស្អុយ រំដោះទឹកជំនន់ ជាទីទួលខ្ពស់ចាក់លុបតិច ដីមានជីវជាតិល្អសម្រាប់កសិកម្មផងដែរ។
២. ប្រយ័ត្នតំបន់ខាងជើង ព្រោះជាតំបន់វាលទំនាប ងាយប្រឈមទឹកជំនន់ ជាតំបន់រង្វង់ស្នែងក្របី ដីទាប មានជំនន់ធំកើតឡើងជារៀងរាល់២៥ឆ្នាំម្តង កើតចេញពីជួរភ្នំក្រវាញ និងភ្នំដងរែក។
៣. ទិសខាងកើត គួរក្សាទុកជាតំបន់បៃតង ទុកផ្គត់ផ្គងបន្លែបៃតង មិនត្រូវអនុញ្ញាតឱ្យមានការរីកក្រុងទៅទិសនោះទេ ព្រោះខ្សែទឹកខាងលើ ទន្លេមេគង្គ ជាប្រភពទឹកស្អាតសម្រាប់ផ្គត់ផ្គង់ឱ្យអ្នកក្រុងទាំងមូល ម្យ៉ាងវិញទៀត គ្មាន ប្រភពទទួលទឹកស្អុយ លំបាករៀបបណ្តាញលូទឹកស្អុយបញ្ចេញចោល។
៤. ទិសខាងលិច ត្រូវរៀបចំជាតំបន់ឧស្សាហកម្ម សិប្បកម្ម ព្រោះងាយស្រួលដឹកជញ្ជូន ភ្ជាប់ទៅកាន់ តំបន់កំពង់ផែនាំចេញ ។ល។
ក្រុងស្អាតទៅបាន ឬ ក្រុងអេកូឡូស៊ី វាអាស្រ័យទៅលើការប៉ិនប្រសប់រៀបឱ្យមាន តុល្យភាពនៃការរក្សាឱ្យមានតំបន់ ខៀវ (ទឹក) និងបៃតង (សួន) ប្រភពបឹងមិនមែនដើម្បីលុបទេ ត្រូវស្គាល់សាវតាតំបន់ គោរពអតីតកាល ឱ្យតម្លៃអតីតកាល បានធ្វើឱ្យក្រុងរៀបថ្មីនិងមានអនាគតល្អ។
លោកសាស្រ្តាចារ្យវណ្ណ ម៉ូលីវណ្ណបានបញ្ជាក់ថា “អ្នកដឹកនាំក្រុងល្អ គឺជាអ្នកដឹកនាំមិនមែនជាអ្នកនយោបាយទេ គឺជាមនុស្សបច្ចេកទេសសុទ្ធសាធ យល់លើការងារអភិវឌ្ឍហេដ្ឋារចនាសម្ព័ន្ធ និងសេដ្ឋកិច្ចច្បាស់លាស់ ជាមនុស្សមានផែនការ និងយល់ស្ថានការល្អឥតខ្ចោះ”៕
