ដោយ: គង់ លាងហួរ
ភ្នំពេញ: នៅក្នុងរយៈពេលប្រាំខែដំបូងនៃឆ្នាំ២០២៣នេះ គម្រោងវិនិយោគចំនួន៦៤ ក្រោមទុនវិនិយោគសរុបចំនួន៥៤០,៧៤លានដុល្លារត្រូវបានអនុម័តដោយក្រុមប្រឹក្សាអភិវឌ្ឍន៍កម្ពុជា (CDC) និងបង្កើតការងារបានចំនួន៧៨.២៩២កន្លែង។
ចំនួននេះបើធៀបនឹងរយៈពេលដូចគ្នាក្នុងឆ្នាំ២០២២ មានការថយចុះគួរឱ្យកត់សម្គាល់ ខណៈដែលក្នុងរយៈពេល៥ខែដំបូងនៃឆ្នាំ២០២២ CDC បានអនុម័តគម្រោងវិនិយោគចំនួន៧២ ដែលមានទុនវិនិយោគសរុបជាង២,៦៤៨ពាន់លានដុល្លារ និងផ្តល់ឱកាសការងារដល់ប្រជាពលរដ្ឋចំនួន៤៤.៦៥៩កន្លែង។
យោងតាមរបាយការណ៍របស់ CDC បានឱ្យដឹងថា ក្នុងចំណោមគម្រោងវិនិយោគចំនួន៦៤ ដែលក្នុងខែមករា មានគម្រោងវិនិយោគចំនួន១០ ជាមួយទុនវិនិយោគសរុប៩៩,៤លានដុល្លារ ផ្តល់ឱកាសការងារចំនួន១៧.១២៩កន្លែង ហើយក្នុងខែកុម្ភៈ មានគម្រោងវិនិយោគចំនួន១៧ ក្រោមទុនវិនិយោគចំនួន៩៨,៨លានដុល្លារ និងផ្តល់ឱកាសការងារ២២.៧៨៤កន្លែង។
នៅក្នុងខែមីនា មានគម្រោងវិនិយោគចំនួន៧ ដែលមានទុនវិនិយោគចំនួន៣៣,៧លានដុល្លារ និងបានផ្តល់ឱកាសការងារចំនួន៦.៦៦៩កន្លែង។ ក្នុងខែមេសា មានគម្រោងវិនិយោគចំនួន២០ ដែលមានទុនវិនិយោគចំនួន២៤៧,៧លានដុល្លារ និងបានផ្តល់ឱកាសការងារចំនួន១៧.៧២៣កន្លែង ហើយនៅក្នុងខែឧសភា មានគម្រោងវិនិយោគចំនួន១០ ក្រោមទុនវិនិយោគចំនួន៦០,១៤លានដុល្លារអាមេរិក និងបានផ្តល់ការងារចំនួន១៣.៩៨៧កន្លែង។
