ដោយ: គង់ លាងហួរ
ភ្នំពេញ: រដ្ឋមន្ត្រីក្រសួងទេសចរណ៍ោកថោង ខុន បានបញ្ជាក់ថា រយៈពេល៥ខែដើមឆ្នាំ២០២៣ មានភ្ញៀវទេសចរអន្តរជាតិជាង២,១៦លាននាក់បានមកទស្សនាកម្ពុជា ហើយលោកក៏បានបង្ហាញការរំពឹងទុកថា ពេញមួយឆ្នាំ២០២៣នេះ កម្ពុជានឹងទទួលភ្ញៀវទេសចរអន្តរជាតិប្រមាណ៤,៥លាននាក់ និងទេសចរក្នុងស្រុកប្រមាណ១៦លាននាក់។
ការថ្លែងបែបនេះរបស់លោក ថោង ខុន ត្រូវបានធ្វើឡើងក្នុងសន្និបាតបូកសរុបការងារទេសចរណ៍ ការបូកសរុបផែនការស្តារ និងលើកស្ទួយវិស័យទេសចរណ៍កម្ពុជាក្នុង និងក្រោយវិបត្តិជំងឺកូវីដ-១៩ ឆមាសទី២ ឆ្នាំ២០២២ ឆមាសទី១ ឆ្នាំ២០២៣ និងលើកទិសដៅអនុវត្តបន្ត ឆ្នាំ២០២៣-២០២៤នាថ្ងៃទី២១ ខែមិថុនា ឆ្នាំ២០២៣ នៅសណ្ឋាគារសុខារ៉េស៊ីដង់ភ្នំពេញ។
លោកថោង ខុន បានបញ្ជាក់ទៀតថា នៅឆ្នាំ២០២២ កម្ពុជាទទួលបានភ្ញៀវទេសចរអន្តរជាតិ ចំនួនជាង២,២លាននាក់ កើនឡើង១,០៥៩% ធៀបនឹងឆ្នាំ២០២១ និងភ្ញៀវទេសចរជាតិបានកើនឡើងលឿន និងកើនលើសចំនួនមុនពេលវិបត្តិជំងឺកូវីដ-១៩ ដោយមានចំនួនប្រមាណ១៣,៩លាននាក់ កើនឡើង១៩៩% បើធៀបនឹងឆ្នាំ២០២១។
ផ្តើមចេញពីឯកសារផែនទីចង្អុលផ្លូវនេះ រាជរដ្ឋាភិបាលបានដាក់ចេញនូវឯកសារដ៏មានសារៈសំខាន់៣ទៀត រួមមាន ទី១-វិធានការគោលនយោបាយជំរុញចលនាទេសចរណ៍ផ្ទៃក្នុង ឆ្នាំ២០២១-២០២៣ ទី២-ផែនការយុទ្ធសាស្រ្តស្តីពី ការបើកទទួលទេសចរណ៍វ៉ាក់សាំង និងទី៣-វិធានការគោលនយោបាយអនុវត្តន៍ យុទ្ធនាការឆ្នាំទស្សនាកម្ពុជា២០២៣។
