ដោយៈ គង់ សូរិយា
ភ្នំពេញៈ រដ្ឋាភិបាលតាមរយៈក្រសួងការងារ និងបណ្តុះបណ្តាលវិជ្ជាជីវៈ បានប្រកាសដាក់ឱ្យដំណើរការជាផ្លូវការ នូវប្រព័ន្ធជាតិវាយតម្លៃទទួលស្គាល់ការសិក្សាពីមុនពីចម្ងាយ សម្រាប់ការវាយតម្លៃផ្អែកលើសមត្ថភាព និងផ្តល់គុណវុឌ្ឍិជាតិកម្ពុជា (National E-RPL Platform) ដើម្បីបង្កភាពងាយស្រួល ទៅលើប្រព័ន្ធដែលមានស្រាប់ តាមរយៈការពង្រីកដំណើរការវាយតម្លៃ ឱ្យកាន់តែកៀកទៅនឹងកម្មករ និងពលករដែលមានជំនាញ។
រដ្ឋលេខាធិការក្រសួងការងារ និងបណ្តុះបណ្តាលវិជ្ជាជីវៈ លោកឡៅ ហ៊ីមបានមានប្រសាសន៍ក្នុងកម្មវិធីមួយនាព្រឹកថ្ងៃទី២៦ មិថុនានេះថា គោលបំណងនៃការបង្កើតប្រព័ន្ធជាតិវាយតម្លៃនេះ ដើម្បីជួយដល់សិស្សានុសិស្ស និស្សិត កម្មករ និងពលករដែលទទួលបានជំនាញពីការអប់រំបណ្តុះបណ្តាលក្រៅប្រព័ន្ធ និងមិនផ្លូវការ អាចមានឱកាសមកទទួល បានការវាយតម្លៃសមត្ថភាពផ្ទាល់ខ្លួន ដើម្បីទទួលបានវិញ្ញាបនបត្រគុណវុឌ្ឍិជាតិ ឬវិញ្ញាបនបត្រសមត្ថភាព ឬលិខិតបញ្ជាក់សមត្ថភាព ដែលអាចយកទៅប្រើប្រាស់ ក្នុងការស្វែងរកការងារ បង្កើនប្រាក់បៀវត្ស និងជាពិសេសអាចបន្តការអប់រំបណ្តុះបណ្តាលកម្រិតខ្ពស់បន្តបន្ទាប់ នៅតាមគ្រឹះស្ថានអប់រំបណ្តុះបណ្តាលបច្ចេកទេស និងវិជ្ជាជីវៈសាធារណៈ ឯកជន សមាគម-អង្គការមិនមែនរដ្ឋាភិបាល។
លោកបនុ្តថា “នេះជាការចូលរួមចំណែក ក្នុងដំណើរការសិក្សាពេញមួយជីវិត សម្រាប់ប្រជាពលរដ្ឋកម្ពុជា។ ប្រព័ន្ធថ្មីនេះ ក៏អាចផ្តល់ដំណឹងអំពីការជ្រើសរើសបេក្ខជនប្រឡង ឬបេក្ខជនអាចចុះឈ្មោះស្នើសុំប្រឡងដោយខ្លួនឯង ព្រមទាំងអាចវាយតម្លៃសមត្ថភាពផ្ទាល់ខ្លួន (ស្វ័យវាយតម្លៃ) ជាមុន ធៀបនឹងតម្រូវការសមត្ថភាពក្នុងស្តង់ដាជាតិសមត្ថភាព ដើម្បីបញ្ជាក់ថា ខ្លួនពិតជាមានសមត្ថភាពគ្រប់គ្រាន់សម្រាប់ការវាយតម្លៃនេះ”។
-->
លោករដ្ឋលេខាធិការបានឲ្យដឹងថា គិតក្នុងរយៈពេលជាង២ឆ្នាំកន្លងមកនេះ ក្រសួងការងារ បានដាក់ឲ្យប្រើប្រាស់ជាផ្លូវការប្រព័ន្ធជាតិធំៗចំនួន២ តាមបែបឌីជីថលទី១ ប្រព័ន្ធជាតិអប់រំបណ្តុះបណ្តាលបចេ្ចសទេស និងវិជ្ជាជីវៈពីចម្ងាយ ឬតាមអនឡាញ និងទី២ ប្រព័ន្ធជាតិវាយតម្លៃ ទទួលស្គាល់ការសិក្សាពីមុនពីចម្ងាយ សម្រាប់ការវាយតម្លៃផ្អែកលើសមត្ថភាព និងផ្តល់គុណវឌ្ឍិជាតិកម្ពុជានាពេលនេះ។
ជាមទួយគ្នានេះ លោកស្រីGWYNETH WONG នាយិកាប្រចាំប្រទេស អង្គការភ្លែនអន្តរជាតិកម្ពុជាបានចាត់ទុកប្រព័ន្ធនេះ ពិតជាមានសារៈសំខាន់ ហើយនឹងជួយដល់សិស្សានុសិស្ស និស្សិត កម្មករ និងពលករដែលទទួលបានជំនាញ ពីការអប់រំបណ្តុះបណ្តាលក្រៅប្រព័ន្ធ និងមិនផ្លូវការ អាចមានឱកាសមកទទួលការវាយតម្លៃសមត្ថភាពផ្ទាល់ខ្លួន ដើម្បីទទួលបានវិញ្ញាបនបត្រគុណវុឌ្ឍិជាតិ ឬវិញ្ញាបនបត្រសមត្ថភាព ឬលិខិតបញ្ជាក់សមត្ថភាព ដែលអាចយកទៅប្រើប្រាស់ក្នុងការស្វែងរកការងារ។
ប្រព័ន្ធជាតិវាយតម្លៃទទួលស្គាល់ ការសិក្សាពីចម្ងាយនេះ មានតួអង្គសំខាន់ៗចំនួន៣ រួមមាន ១.ក្រសួងការងារ និងបណ្តុះបណ្តាលវិជ្ជាជីវៈ ២.មជ្ឈមណ្ឌលវាយតម្លៃសមត្ថភាព និង៣.បេក្ខជន ឬអ្នកធ្វើតេស្ត (យុវជន កម្មករនិយោជិត។ល។ ក្នុងនោះ តួអង្គនីមួយៗមានភារកិច្ច ដូចជា៖
-ក្រសួងការងារ និងបណ្តុះបណ្តាលវិជ្ជាជីវៈ មានភារកិច្ចគ្រប់គ្រង ថែទាំ និងធ្វើបច្ចុប្បន្នភាពប្រព័ន្ធជាតិទាំងមូល។ រៀបចំរបាយការណ៍រួម ត្រួតពិនិត្យ តាមដាន និងវាយតម្លៃលើការអនុវត្តការងាររបស់មជ្ឈមណ្ឌលវាយតម្លៃសមត្ថភាព។
-មជ្ឈមណ្ឌលវាយតម្លៃសមត្ថភាព មានភារកិច្ចរៀបចំកម្រងសំណួរ ចម្លើយ, រៀបចំធ្វើតេស្តផ្នែកទ្រឹស្តី, គ្រប់គ្រងបេក្ខជន, ប្រកាសលទ្ធផល, ណែនាំនិងរៀបចំធ្វើតេស្តអនុវត្តន៍ជាក់ស្តែង ដល់បេក្ខជន និងផ្សព្វផ្សាយព័ត៌មានផ្សេងៗ។
-បេក្ខជន ឬអ្នកធ្វើតេស្ត ត្រូវធ្វើការចុះឈ្មោះ និងធ្វើតេស្តសមត្ថភាពទ្រឹស្តីក្នុងប្រព័ន្ធ រួចបន្តធ្វើតេស្តសមត្ថភាពអនុវត្តន៍ នៅតាមមជ្ឈមណ្ឌលវាយតម្លៃសមត្ថភាព៕
