ដោយៈ គង់ សូរិយា
ភ្នំពេញៈ ប្រធានសមាគមសណ្ឋាគារកម្ពុជា(Cambodia Hotel Association) លោកឌិន សុមេធារិទ្ឋបានថ្លែងថា ទីផ្សារសណ្ឋាគារនៅកម្ពុជា កំពុងមានភាពប្រសើរឡើងពីមួយខែទៅមួយខែ។
លោកបានមានប្រសាសន៍ឲ្យដឹង តាមបណ្តាញតេឡេក្រាមកាលពីចុងសប្តាហ៍មុនថា អត្រាគ្របដណ្តប់នៃការប្រើប្រាស់ បន្ទប់សណ្ឋាគារទាំងនៅរាជធានីភ្នំពេញ ខេត្តសៀមរាប និងក្រុងព្រះសីហនុមានការកើនឡើងជាប្រចាំ ដោយសារការវិលត្រលប់ របស់ភ្ញៀវទេសចរណ៍អន្តរជាតិ មកទស្សនាកម្ពុជាបានកើនឡើងជាប្រចាំ។
លោកបន្តថា “ជាក់ស្តែងរយៈពេល៥ខែដើមឆ្នាំនេះ កម្ពុជាទទួលបានភ្ញៀវទេសចរណ៍អន្តរជាតិជាង២លាននាក់ ដែលនេះជាតួលេខអាចជឿជាក់បាន និងជាការអបអរសាទរសម្រាប់កម្ពុជា”។ លោកបញ្ជាក់ថា “តួលេខភ្ញៀវទេសចរណ៍ត្រូវបានកត់ត្រា នៅតាមច្រកព្រំដែននានា និងតាមអាកាសយានដ្ឋានទាំងបីរបស់កម្ពុជា”។
យោងតាមរបាយការណ៍ របស់រដ្ឋលេខាធិការដ្ឋានអាកាសចរណ៍ស៊ីវិលបានបង្ហាញថា បច្ចុប្បន្នកម្ពុជាទទួលបាន ជើងហោះហើរពីបណ្តាប្រទេសនានាកើនឡើងជាប្រចាំ ដោយមួយសប្តាហ៍កម្ពុជាទទួលបានជើងហោះហើរ អន្តរជាតិជាង៤០០លើក និងរំពឹងកើនឡើងនាពេលខាងមុខជាបន្តបន្ទាប់ទៀត៕
