ដោយៈ ហ្វីអូណា
ភ្នំពេញៈ ក្រុមហ៊ុនវិនិយោគ កំពុងសិក្សាបន្ថែមលើលទ្ធភាពសាងសង់ផ្លូវរថភ្លើងក្រោមដី តភ្ជាប់រាជធានីភ្នំពេញ ទៅកាន់ព្រលានយន្តហោះថ្មីនៅក្រុងតាខ្មៅ។
លោកទេសរដ្ឋមន្រ្តី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូនបានរំពឹងថា ការសិក្សាបន្ថែមនេះ នឹងអាចបញ្ចប់នៅដំណាច់ឆ្នាំ២០២៣នេះ។
នៅក្នុងពិធីសម្ពោធឱ្យប្រើប្រាស់ មណ្ឌលផ្ដល់សេវាសាធារណៈ នាថ្ងៃទី២៩ មិថុនា នៅផ្សារអ៊ីអនមានជ័យ លោករដ្ឋមន្ត្រី បានគូសបញ្ជាក់ថា កន្លងមកការសិក្សាលើគម្រោង សាងសង់ផ្លូវរថភ្លើងក្រោមដី នៅក្នុងរាជធានីភ្នំពេញបានបញ្ចប់ហើយ ។ តែដោយសាររដ្ឋាភិបាលចង់បាន ការតភ្ជាប់ផ្លូវរថភ្លើងក្រោមដី ទៅនឹងព្រលានយន្តហោះថ្មី ទើបក្រុមហ៊ុនវិនិយោគ ត្រូវការសិក្សាបន្ថែមទាំងគន្លងផ្លូវរត់ ទុនវិនិយោគ និងស្ថានីយរថភ្លើងបន្ថែម។
លោកបន្តថា “យើងកំពុងសិក្សាជាមួយអ្នកវិនិយោគ ដែលគេកំពុងគិតពិចារណាអំពីការដាក់ទុក លើការរៀបចំផ្លូវរទេះភ្លើងក្រោមដី និងរទេះភ្លើងធុនស្រាល តភ្ជាប់ទៅព្រលានយន្តហោះថ្មី របស់យើង និងស្ថានីយឈប់មួយចំនួន”។
កាលពីឆ្នាំ២០២២ ក្រសួងសាធារណការបានបង្ហើប ពីគម្រោងសាងសង់ផ្លូវរថភ្លើងក្រោមថ្មី ឬរថភ្លើងលើអាកាសនៅក្នុងរាជធានីភ្នំពេញ ដើម្បីកាត់បន្ថយការកកស្ទះចរាចរណ៍ និងកាត់បន្ថយគ្រោះថ្នាក់ក្នុងរាជធានី ក៏ដូចជាជួយបង្កើនសេដ្ឋកិច្ចជាតិ។ 
តាមរបាយការណ៍សិក្សា ដែលក្រសួងសាធារណការ បានផ្សព្វផ្សាយកន្លងមក ក្នុងរាជធានីភ្នំពេញ មានផ្លូវរថភ្លើងក្រោមដីចំនួន៤ខ្សែ ដែលខ្សែផ្លូវនីមួយៗ មានប្រវែងពី១៦គីឡូម៉ែត្រ ទៅ២៩គីឡូម៉ែត្រ៕
