ដោយ: គង់ លាងហួរ
អន្តរជាតិ: លោក Michael Bayley នាយកប្រតិបត្តិក្រុមហ៊ុន Royal Caribbean International បានបញ្ជាក់ប្រាប់សារពត៌មាន CNN ថា កប៉ាល់ទេសចរណ៍ធំ ជាងគេបំផុតលើពិភពលោក Icon of the Seas នឹងចាប់ផ្តើមដំណើរកម្សាន្ត លើកដំបូងរបស់ខ្លួននៅខែមករា ឆ្នាំ២០២៤ខាងមុខ។
ជាមួយនឹងសមត្ថភាពទទួលភ្ញៀវ បានចំនួន៥.៦១០នាក់ និងនាវិកចំនួន២.៣៥០នាក់ កប៉ាល់នេះនឹងរៀបចំសួនទឹក ដ៏ធំបំផុតនៅសមុទ្រ អាងហែលទឹកចំនួនប្រាំពីរ និងតូងរអិលចូលទឹក(Water slides)បំបែកកំណត់ត្រាចំនួន៦ផងដែរ។
កប៉ាល់ទេសចរណ៍ Icon of the Seas នឹងបំពេញតាមតម្រូវរបស់ក្រុមភ្ញៀវ ដែលធ្វើដំណើរជាមួយក្រុមគ្រួសារ ដោយលោក Bayley បានប្រកាសថា កប៉ាល់ទេសចរណ៍ Icon of the Seas នេះគឺជា ការបើកដំណើរការផលិតផលថ្មី ដែលដំណើរការល្អបំផុតមិនធ្លាប់មានរបស់ក្រុមហ៊ុន ។
នាវាទេសចរណ៍នេះ ត្រូវបានសាងសង់នៅឯកន្លែងផលិតកប៉ាល់ Meyer Turku ក្នុងទីក្រុង Turku ប្រទេសហ្វាំងឡង់ ហើយបានបញ្ចប់ការសាកល្បង លើកដំបូងនៅថ្ងៃទី២២ ខែមិថុនា ដោយមានកម្មករប្រហែល២.៦០០នាក់ បានចូលរួមក្នុងការសាងសង់នាវាខ្នាតយក្សនេះ។
នៅពេលដែលដំណើរការ កប៉ាល់នេះនឹងចាប់ផ្តើមដំណើរកម្សាន្តពេញមួយឆ្នាំ ដោយផ្តល់ជូននូវការធ្វើដំណើររយៈពេលប្រាំពីរថ្ងៃ ពីទីក្រុងម៉ៃអាមី សហរដ្ឋអាមេរិក ទៅកាន់តំបន់ការាបៀនខាងកើត និងខាងលិច និងត្រឡប់បកមកវិញ។ នេះបើយោងតាមការឱ្យដឹងពីសារព័ត៌មាន CNN ។
ចំណែក តម្លៃបន្ទប់ប្រែប្រួល អាស្រ័យលើកាលវិភាគ និងកាលបរិច្ឆេទធ្វើដំណើរ។ ការធ្វើដំណើរដែលមានតម្លៃខ្ពស់បំផុត គឺការជិះនាវាកម្សាន្តនៅតំបន់ការីបៀន ខាងលិចនៅថ្ងៃទី១៧ ខែកុម្ភៈ ឆ្នាំ២០២៤ ជាមួយនឹងបន្ទប់ ដែលមានតម្លៃថោកបំផុតចាប់ពី១.៥៨១ដុល្លារ ក្នុងមនុស្សម្នាក់។
ការធ្វើដំណើរកម្សាន្តរយៈពេល៧យប់ ទៅកាន់តំបន់ការាបៀន ភាគខាងកើតនៅថ្ងៃទី១៩ ខែតុលា ឆ្នាំ២០២៤ ចាប់ផ្តើមពីតម្លៃ១.០០៧ដុល្លារក្នុងមនុស្សម្នាក់ ខណៈបន្ទប់ដ៏កាន់តែប្រណីតជាងនេះមានតម្លៃ២.៨៧៩ដុល្លារ៕
