ដោយៈ គង់ ហ្វីអូណា
ភ្នំពេញៈ សណ្ឋាគារRosewood Phnom Penh បានទទួលពានរង្វាន់ “សណ្ឋាគារល្អបំផុតនៅអាស៊ី” ពីTravel + Leisure’s Luxury Awards Asia Pacific ឆ្នាំ ២០២៣។
ពានរង្វាន់នេះ ក៏ឆ្លុះបញ្ជាំងឱ្យឃើញផងដែរថា Rosewood កំពុងក្លាយជាសណ្ឋាគារមួយ ដែលកំពុងតែមានប្រជាប្រិយភាពខ្លាំង ហើយក៏ជាគោលដៅស្នាក់នៅដ៏ទាក់ទាញមួយ នៅក្នុងប្រទេសកម្ពុជា។
លោក Daniel Simon នាយកគ្រប់គ្រងសណ្ឋាគារ Rosewood Phnom Penhបានមានប្រសាសន៍ថា ពានរង្វាន់ “សណ្ឋាគារល្អបំផុតនៅអាស៊ី” ឆ្លុះបញ្ចាំងពីការបំពេញការងារមិនចេះហត់នឿយ ដែលបានប្រកាន់ខ្ជាប់នូវបេសកកម្មរួមគ្នា ក្នុងការផ្លាស់ប្តូររបៀបដែលអ្នកធ្វើដំណើរទទួលបានបទពិសោធន៍ នៅប្រទេសកម្ពុជានាពេលបច្ចុប្បន្ននេះ។
លោក Daniel Simon បន្តថា ជាមួយសោភ័ណភាពដ៏ល្អប្រណីត រួមនឹងទីតាំងដ៏គួរឱ្យទាក់ទាញ នៅលើកំពូលអគារវឌ្ឍនៈ កាពីតាល់ និងសេវាកម្មបំពេញតម្រូវការផ្ទាល់ខ្លួននានា ប្រកបដោយការយកចិត្តទុកដាក់ សណ្ឋាគារ រ៉ូសវូដ ភ្នំពេញ បានក្លាយជាទីកន្លែងមួយដ៏មានកិត្យានុភាពបំផុតរបស់ពិភពលោក ចាប់តាំងពីបើកដំណើរការក្នុងឆ្នាំ ២០១៨ រហូតមកទល់ពេលបច្ចុប្បន្ន៕
