ឥណ្ឌូនេស៊ីទទួលបានឋានៈជាប្រទេសមានប្រាក់ចំណូលមធ្យមកម្រិតខ្ពស់ឡើងវិញហើយ

ដោយ: គង់ លាងហួរ

ហ្សាការតា: ឥណ្ឌូនេស៊ីបានទទួលឋានៈរបស់ខ្លួន ជាប្រទេស ដែលមានប្រាក់ចំណូល មធ្យមកម្រិតខ្ពស់ឡើងវិញ ដោយសារការស្ទុះងើបឡើងវិញ នៃសេដ្ឋកិច្ចរបស់ប្រទេសនេះ បន្ទាប់ពីវិបត្តិជំងឺរាតត្បាតកូវីដ-១៩។

យោងតាមទិន្នន័យ របស់ធនាគារពិភពលោកបានឱ្យដឹងថា ប្រាក់ចំណូលជាតិសរុប របស់ប្រទេសឥណ្ឌូនេស៊ី (GNI) សម្រាប់មនុស្សម្នាក់ ដែលវាស់វែង ផលបូកនៃប្រាក់ ដែលប្រជាជាតិរកបាន និងយកមកចែកជាមួយចំនួនប្រជាជន បានឈានដល់៤.៥៨០ដុល្លា​រអាមេរិកកាលពីឆ្នាំ២០២២ ពោលគឺបានកើនឡើង៩,៨% ធៀបនឹងឆ្នាំ២០២១។ឥណ្ឌូណេស៊ីឈរជាប្រទេស ដែលមានចំណូលមធ្យមកម្រិតខ្ពស់ដោយផ្អែកលើGNI ក្នុងមនុស្សម្នាក់ៗ កាលពីឆ្នាំ២០១៩ ប៉ុន្តែឥណ្ឌូនេស៊ី បានវិលទៅកាន់ស្ថានភាព ជាប្រទេសមានប្រាក់ចំណូលមធ្យមកម្រិតទាបវិញ ដោយសារផលប៉ះពាល់សេដ្ឋកិច្ច ពីវិបត្តិជំងឺកូវីដ-១៩។