ប្រទេសថៃក្លាយជាអ្នកនាំចេញត្រីខកំប៉ុង និងត្រីកែច្នៃធំបំផុតទី២ របស់ពិភពលោក

ដោយៈ តែម សុខុម

បាងកក: ប្រទេសថៃ បានក្លាយជាអ្នកនាំចេញត្រីខកំប៉ុង និងផលិតផលត្រីកែច្នៃធំបំផុត ក្នុងតំបន់អាស៊ាន និងធំបំផុតទី២ របស់ពិភពលោក បន្ទាប់ពីមហាយក្សចិន។ នេះបើយោងតាមសារព័ត៌មាន The Nation ចុះផ្សាយកាលពីថ្ងៃច័ន្ទ ទី១៧ ខែកក្កដា។

ក្រសួងពាណិជ្ជកម្មថៃបាននិយាយថា កំណើននៃការនាំចេញត្រីខកំប៉ុង និងផលិតផលត្រីកែច្នៃនេះ ត្រូវបានជំរុញដោយកិច្ចព្រមព្រៀ​ងពាណិជ្ជកម្មសេរី (FTA) ជាមួយប្រទេសមួយចំនួន ដូចជា ប្រទេសជប៉ុន ប្រទេសស៊ីលី ប្រទេសប៉េរូ និងប្រទេសចិន ជាដើម។ការនាំចេញត្រីខកំប៉ុង និងត្រីកែច្នៃរបស់ប្រទេសថៃ មានទំហំសរុប១,១៤ពាន់លានដុល្លារអាមេរិក ក្នុងរយៈពេល៥ខែដើមឆ្នាំនេះ។ ទន្ទឹមនឹងនេះដែរ ទំហំនៃការនាំចេញទៅកាន់ទីផ្សារនានាក្រោមកិច្ចព្រមព្រៀង FTA មានចំនួន៣៥១,៧លានដុល្លារអាមេរិក ដោយកើនឡើង១៥,៧% បើធៀបនឹងរយៈពេលដូចគ្នា កាលពីឆ្នាំមុន។

ទីផ្សារ FTA ដែលមានកំណើនជាបន្តបន្ទាប់ រួមមាន ប្រទេសជប៉ុន (កើនឡើង២២,៧%) ប្រទេសស៊ីលី (កើនឡើង៩៦,៧%) ប្រទេសប៉េរូ (កើនឡើង១៨៣,១%) ប្រទេសចិន (កើនឡើង២៥,៧%) ប្រទេសកម្ពុជា (កើនឡើង១១,៩%) និងប្រទេសហ្វីលីពីន (កើនឡើង១៣៨,១)។

ទីផ្សារនាំចេញសំខាន់ៗផ្សេងទៀត សម្រាប់ប្រទេសថៃ រួមមានប្រទេសជប៉ុន ប្រទេសអូស្ត្រាលី ប្រទេសស៊ីលី និងប្រទេសកូរ៉េខាងត្បូង៕ The Nation៕