ដោយ: គង់ លាងហួរ
អន្តរជាតិ: ទីផ្សារអចលនទ្រព្យលំនៅដ្ឋានថៃ បានសង្កេតឃើញការដាំក្បាលចុះយ៉ាងខ្លាំង រហូតដល់ទៅ២៩,១% នៃការលក់ផ្ទះថ្មីនៅក្នុងឆមាសទី១ ឆ្នាំ២០២៣នេះ ខណៈខុនដូគឺជាកត្តាចម្បងដែលរួមចំណែកដល់លទ្ធផលនេះ។
លោក Vichai Viratkapan អគ្គនាយកស្តីទីនៃមជ្ឈមណ្ឌលព័ត៌មានអចលនទ្រព្យ (REIC) បានមានប្រសាសន៍ថា ចំនួនលំនៅដ្ឋានទើបលក់ដាច់ថ្មី នៅទីក្រុងបាងកកក្នុងឆមាសទី១ មានចំនួន២១.២៩១យូនីត ដែលមានតម្លៃសរុប១០៥,៧ពាន់លានបាត។
តួលេខខាងលើនេះ តំណាងឱ្យការថយចុះចំនួន២៩,១% បើគិតជាបរិមាណ និងតំណាងឱ្យការថយចុះ២២%គិតជាតម្លៃ បើធៀបទៅនឹងត្រីមាសទីមួយនៃឆ្នាំ២០២២កន្លងទៅ។
លោកVichai បានបន្តទៀតថា “ទីផ្សារលំនៅដ្ឋាននៅដើមឆ្នាំនេះបានដាំក្បាលចុះយ៉ាងខ្លាំង បើធៀបនឹងរយៈពេលដូចគ្នាកាលពីឆ្នាំមុន ជាពិសេសបរិមាណលក់ខុនដូ មានការថយចុះខ្លាំងគួរឱ្យកត់សម្គាល់”។
