ដោយ: គង់ លាងហួរ
អន្តរជាតិ: បណ្តាមេដឹកនាំតំបន់អាស៊ាន កំពុងបង្កើនកិច្ចពិភាក្សាជាមួយចក្រភពអង់គ្លេស និងប្រទេសរុស្ស៊ី ក្នុងគោលបំណង ដើម្បីជំរុញកិច្ចសហប្រតិបត្តិការខាងផ្នែកសេដ្ឋកិច្ច។
លោកស្រី Auramon Supthaweethum អគ្គនាយកនៃនាយកដ្ឋានចរចាពាណិជ្ជកម្មបានលើកឡើងថា លោក Duangarthit Nidhi-u-tai អគ្គនាយករងនៃនាយកដ្ឋាននេះ ត្រូវបានចាត់តាំងឱ្យចូលរួមក្នុងកិច្ចប្រជុំ មន្ត្រីសេដ្ឋកិច្ចជាន់ខ្ពស់អាស៊ាន -ចក្រភពអង់គ្លេសលើកទី៤ (SEOM) កិច្ចប្រជុំមន្ត្រីសេដ្ឋកិច្ចជាន់ខ្ពស់អាស៊ាន- រុស្ស៊ីលើកទី១៥ និងកិច្ចប្រជុំគណៈកម្មាធិការពាណិជ្ជកម្មអាស៊ាន -អឺរ៉ុបលើកទី៣១ ដែលធ្វើឡើងក្នុងអំឡុងថ្ងៃទី១៤-១៦ ខែកក្កដា នៅទីក្រុង Surabaya ប្រទេសឥណ្ឌូនេស៊ី។
លោក Duangarthit បានមានប្រសាសន៍ក្នុងអំឡុងកិច្ចប្រជុំអាស៊ាន-អង់គ្លេស(SEOM)ថា ភាគីទាំងពីរបានពិនិត្យវឌ្ឍនភាព នៃផែនការសហប្រតិបត្តិការរវាងឆ្នាំ ២០២២-២០២៣ ដោយផ្តោតលើការពង្រឹងទំនាក់ទំនងសេដ្ឋកិច្ច ពាណិជ្ជកម្ម និងការវិនិយោគ តាមរយៈកិច្ចសហប្រតិបត្តិការចំនួន១១ ដូចជា ការតភ្ជាប់ខ្សែសង្វាក់ផ្គត់ផ្គង់អាស៊ាន-ចក្រភពអង់គ្លេស ការបើកទីផ្សារ ការច្នៃប្រឌិតឌីជីថល និងការអភិវឌ្ឍសហគ្រាសធុនតូច និងមធ្យម (MSMEs)។
លើសពីនេះទៀត ភាគីទាំង២ក៏បានពិភាក្សាគ្នា អំពីគម្រោងដែលមានគោលបំណង លើកកម្ពស់ភាពជាដៃគូសាធារណៈ និងឯកជន សេវាកម្មហិរញ្ញវត្ថុ និងកំណើនប្រកបដោយចីរភាពផងដែរ។ លទ្ធផលនៃការពិភាក្សាទាំងនេះ នឹងត្រូវបង្ហាញជូនរដ្ឋមន្ត្រីសេដ្ឋកិច្ចអាស៊ាន-អង់គ្លេស ដើម្បីពិចារណាក្នុងខែសីហា។
ទាក់ទងទៅនឹង កិច្ចប្រជុំ ASEAN-Russia SEOM អ្នកចូលរួមបានពិភាក្សាអំពីផែនការ សម្រាប់កិច្ចសហប្រតិបត្តិការពាណិជ្ជកម្ម និងវិនិយោគរវាងអាស៊ាន និងរុស្ស៊ី និងផែនការសហប្រតិបត្តិការសេដ្ឋកិច្ចរវាងអាស៊ាន និងគណៈកម្មការសេដ្ឋកិច្ចអឺរ៉ាស៊ី៕
