ដោយៈ គង់ សូរិយា
ភ្នំពេញៈ តំបន់សេដ្ឋកិច្ចពិសេសជាច្រើន បានកើតមាននៅកម្ពុជា តាំងពីក្រោយឆ្នាំ២០០៥ ដែលរហូតដល់បច្ចុប្បន្ននេះ ចំនួនតំបន់សេដ្ឋកិច្ចពិសេសបានកើនដល់២៤ទីតាំង។
អគ្គលេខាធិការរងក្រុមប្រឹក្សាអភិវឌ្ឍន៍កម្ពុជា លោកជា វុទ្ឋីបានមានប្រសាសន៍ឲ្យដឹង ក្នុងវេទិការៀបចំដោយសមាគមឧកញ៉ាកម្ពុជា និងក្រុមប្រឹក្សាអភិវឌ្ឍន៍កម្ពុជា នៅសប្តាហ៍នេះថា ជាមួយគំនិតផ្តួចផ្តើម និងគោលនយោបាយច្បាស់លាស់ របស់សម្តេចតេជោហ៊ុន សែននាយករដ្ឋមន្រ្តីកម្ពុជាតាំងពីឆ្នាំ២០០៥ សម្តេចតេជោបានដាក់ចេញគោលនយោបាយសំខាន់ពីរ សម្រាប់ការបង្កើតឲ្យមានតំបន់សេដ្ឋកិច្ចពិសេស។
ទី១ ទាក់ទាញឲ្យក្រុមហ៊ុនវិនិយោគ តំបន់សេដ្ឋកិច្ចពិសេសកសាងហេដ្ឋារចនាសម្ព័ន្ឋនៅមូលដ្ឋាន ដែលរាជរដ្ឋាភិបាលមានលទ្ឋភាពនៅមានកម្រិត ទី២ ការសាកល្បងនៃការធ្វើសាមញ្ញកម្ម នៅក្នុងនិតិវិធីពាក់ព័ន្ឋការវិនិយោគ។
លោកជា វុទ្ឋីបានបន្តថា តំបន់សេដ្ឋកិច្ចពិសេសទាំងនោះបានទាក់ទាញក្រុមហ៊ុនចំនួន៦៥៥ បានបោះទីតាំងវិនិយោគជាមួយការនាំចេញចាប់ពីឆ្នាំ២០១១ ដល់ឆ្នាំ២០២៣នេះ មានទំហំទឹកប្រាក់ជាង២៥ពាន់លានដុល្លារអាមេរិក និងបង្កើនការងារជាង១៧៥,០០០កន្លែង ពិសេសបានបង្កើតពិពិធកម្មការវិនិយោគនៅកម្ពុជា៕
