ក្រុមហ៊ុន Domino’s Pizza នឹងបិទហាងភីហ្សាទាំងអស់របស់ខ្លួនដែលមានរាប់រយកន្លែងនៅរុស្ស៊ី

0

តែម សុខុម

ក្រុងឡុងដ៍: ក្រុមហ៊ុន Domino’s Pizza នឹងបិទហាងភីហ្សាទាំងអស់របស់ខ្លួនរុស្ស៊ី ដោយធ្វើឱ្យវាស្ថិតក្នុងចំណោមក្រុមហ៊ុនខ្សែសង្វាក់អាហាររហ័សលោកខាងលិច ធំៗដំបូងគេដែលបានចាកចេញពីប្រទេសនេះចាប់តាំងពីក្រុមហ៊ុន McDonald’s និង Starbucks បានចាកចេញពីប្រទេសនេះកាលពីជាងមួយឆ្នាំមុន។

ក្រុមហ៊ុន DP Eurasia ដែលជាក្រុមហ៊ុនលក់សិទ្ធិអាជីវកម្មបន្ត (Franchise) សម្រាប់យីហោ Domino’s Pizza នៅក្នុងប្រទេសរុស្ស៊ី តួកគី អាស៊ែបៃហ្សង់ និងហ្សកហ្ស៊ី បាននិយាយកាលពីថ្ងៃច័ន្ទ ទី២១ ខែសីហា ថា ខ្លួននឹងដាក់ពាក្យប្រកាសក្ស័យធនសម្រាប់ក្រុមហ៊ុនបុត្រសម្ព័ន្ធរបស់ខ្លួន DPRussia នៅក្នុងប្រទេសរុស្ស៊ី។

-->

ចំណាត់ការនេះឆ្លុះបញ្ចាំងពីជម្រើសកាន់តែពិបាកខ្លាំងឡើងរបស់បណ្ដាក្រុមហ៊ុនលោកខាងលិច ដែលបាននៅបន្តក្នុងប្រទេសរុស្ស៊ី បន្ទាប់ពីរុស្ស៊ី បានបញ្ឆេះភ្លើងសង្រ្គាមចូលឈ្លានពានប្រទេសអ៊ុយក្រែន នៅថ្ងៃទី២៤ ខែកុម្ភៈ ឆ្នាំ២០២២។

វិមានក្រឹមឡាំង បានធ្វើឱ្យបណ្ដាក្រុមហ៊ុនលោកខាងលិច កាន់តែពិបាក និងកាន់តែខាតបង់ខ្លាំងឡើងនៅក្នុងការអាជីវកម្មរបស់ពួកគេនៅក្នុងប្រទេសរុស្ស៊ី។

ក្នុងករណីខ្លះ រដ្ឋាភិបាលរុស្ស៊ី ថែមទាំងបានដណ្ដើមកាន់កាប់ទ្រព្យសកម្មរបស់ក្រុមហ៊ុនទាំងនោះនៅក្នុងប្រទេសរុស្ស៊ី ទៀតផង តួយ៉ាងដូចជាក្រុមហ៊ុនផលិតស្រាបៀរដាណឺម៉ាក Carlsberg និងក្រុមហ៊ុនផលិតទឹកដោះគោជូរបារាំង Danone ជាដើម៕ CNN៕