ដោយៈ តែម សុខុម
សេអ៊ូល: វាជាដំណឹងដ៏ល្អ ដែលខេត្តគ្យុងសាងខាងជើង (North Gyeongsang) នៃប្រទេសកូរ៉េខាងត្បូង កំពុងជំរុញលើកទឹកចិត្តឱ្យយុវជនខ្មែរ រួសរាន់ដាក់ពាក្យប្រលង ដើម្បីចូលរៀននៅតាមវិទ្យាល័យរបស់ខ្លួន ដើម្បីបណ្តុះប្រជាជន ដែលមានសក្តានុពលនាពេលអនាគត។
ក្រៅពីយុវជនខ្មែរ យុវជនមកពីប្រទេសមួយចំនួនទៀត ក្នុងតំបន់អាស៊ី ក៏មានសិទ្ធិដាក់ពាក្យប្រលង ក្នុងកម្មវីធីនេះដែរ ដើម្បីមានឱកាសទៅសិក្សា នៅក្នុងប្រទេសកូរ៉េខាងត្បូង។ នេះបើយោងតាមសារព័ត៌មាន The Nation ចុះផ្សាយនៅថ្ងៃព្រហស្បតិ៍ ទី៣១ ខែសីហា នេះ។ 
បច្ចុប្បន្នខេត្តគ្យុងសាងខាងជើង កំពុងស្ថិតក្នុងដំណើរការជ្រើសរើសយុវជនចំនួន៧២នាក់ មកពី៦ប្រទេសក្នុងអាស៊ី រួមមានចិន វៀតណាម ថៃ ឥណ្ឌូនេស៊ី ម៉ុងហ្គោលី និងកម្ពុជា សម្រាប់ការចូលរៀននៅតាមសាលាក្នុងខេត្តនេះ សម្រាប់ឆ្នាំសិក្សាខាងមុខ ដែលនឹងចាប់ផ្តើមនៅខែមីនា ឆ្នាំ២០២៤។
លោកស្រី គីម មីចុង (Kim Mi-jeong) ប្រធានកម្មវិធីនេះនៅការិយាល័យអប់រំខេត្តខាងលើនេះ បានប្រាប់សារព័ត៌មាន The Korea Herald ថា “ដូចសិស្សជនជាតិកូរ៉េ ដទៃទៀតដែរ គឺសិស្សបរទេស នឹងមិនត្រូវតម្រូវឱ្យបង់ថ្លៃសិក្សាឡើយ ប៉ុន្តែពួកគេនឹងត្រូវចេញថ្លៃចំណាយ លើការរស់នៅផ្ទាល់ខ្លួន ដូចជា ថ្លៃអន្តេវាសិកដ្ឋានជាដើម”។
លោកស្រីបញ្ជាក់ថា “ការអប់រំតាមសាលារដ្ឋ ក្នុងប្រទេសកូរ៉េខាងត្បូង មិនគិតថ្លៃចាប់ពីកម្រិតបឋមសិក្សាដល់កម្រិតវិទ្យាល័យ”។សាលាចំនួន៩ដែលភាគច្រើន ជាសាលាបណ្ដុះបណ្ដាលវិជ្ជាជីវៈ នឹងទទួលសិស្សបរទេសតាមរយៈកម្មវិធីនេះ។
បេក្ខជនដាក់ពាក្យក្នុងកម្មវិធីនេះ ត្រូវដាក់ជូនកំណត់ត្រាសិក្សាពីអនុវិទ្យាល័យ និងពិន្ទុកម្រិត២ ឬខ្ពស់ជាងនេះ នៅក្នុងការតេស្តសមត្ថភាពភាសាកូរ៉េ ដែលគេស្គាល់យ៉ាងទូលំទូលាយថា TOPIK៕ The Nation៕
