ដោយ វុត្ថា
ភ្នំពេញ៖ មន្ត្រីជាន់ខ្ពស់សាលាខេត្តព្រះសីហនុបានអះអាងថា ក្រោមការវិនិយោគទុនដ៏ច្រើនលានដុល្លារពីសំណាក់អ្នកវិនិយោគទុនចិន អនាគតទីក្រុងព្រះសីហនុនឹងក្លាយទៅជាទីក្រុងគុជមួយ ដែលគ្រប់គ្នានឹកស្មានមិនដល់។
លោក Norngdy Nara ពិធីការរដ្ឋបាលខេត្តព្រះសីហនុ បានសរសេរនៅក្នុងហ្វេសបុកផ្លូវផ្លូវរបស់ខ្លួននៅថ្ងៃទី៩ ខែកុម្ភៈនេះថា “ប្រជាជនចិន និងរដ្ឋាភិបាលចិន មានចក្ខុវិស័យវែងឆ្ងាយ ក្នុងការធ្វើអ្វីមួយ ។ ទិសដៅផែការរបស់ជនជាតិចិន គឺតែងតែទទួលបានជោគជ័យហួសពីការរំពឹងទុក”។
-->
លោកបន្តថា “ដូច្នេះសម្រាប់ខេត្តព្រះសីហនុ ពិសេសក្រុងព្រះសីហនុ ដែលពោរពេញដោយសក្តានុពលយ៉ាងសំបូរបែប នឹងបង្ហាញភាពរីកចម្រើនយ៉ាងអស្ចារ្យ នាពេលដ៏ខ្លីខាមុខនេះ ក្រោមការបណ្តាក់ទុនប្រកបដោយចិរភាព នៃអ្នកវិនិយោគទុនចិន” ។
លោក យន្ត មីន អភិបាលខេត្តព្រះសីហនុធ្លាប់មានប្រសាសន៍ថា ការវិនិយោគរបស់ចិននៅខេត្តព្រះសីហនុ ផ្តល់ផលវិជ្ជមានយ៉ាងច្រើន ជួយឱ្យខេត្តបង្កើនកំណើនសេដ្ឋកិច្ចយ៉ាងឆាប់រហ័ស ក៏ប៉ុន្តែវាមានផលអវិជ្ជមានតិចតួចដែរ។ លោកប៉ាន់ប្រមាណថាមាន ប្រជាពលរដ្ឋពី៩០ ទៅ៩៥ភាគរយ អបអរសាទរចំពោះការវិនិយោគ និងទេសចរចិនមកខេត្តព្រះសីហនុ។
លោកអភិបាលខេត្តរូបនេះបានបន្តថា អាជ្ញារធរខេត្ត បានអនុវត្តគោលនយោបាយការគៀងគរចំពោះអ្នកវិនិយោគ និងទេសចរណ៍ ដើម្បីបង្កើនចំណូលថវិកាជាតិ បន្តជម្រុញគ្រប់គ្រងជនបរទេស ធានាការពារសន្តិសុខ សុវត្ថិភាពដល់វិនិយោគ និងទេសចរធ្វើឱ្យខេត្តមានការអភិវឌ្ឍលឿន ថ្វីត្បិតការវិនិយោគវាមាន ផលប៉ះពាល់ដល់ហេដ្ឋារចនាសម័្ពន្ធ បរិស្ថាន ប្រព័ន្ធលូ។
លោកបញ្ជាក់ថា បច្ចុប្បន្នមានសំណង់អគារធំខ្ពស់ប្រមាណជាង២០០អគារ កំពុងតែកើតឡើងនៅលើទឹកដីខេត្តព្រះសីហនុ ហើយសង្ឃឹមថា នៅមានសំណង់ជាច្រើនទៀតបន្តកើតឡើងជាបន្តបន្ទាប់នាពេលខាងមុខ៕
