ដោយ: គង់ លាងហួរ
ហ្សាការតា: រដ្ឋាភិបាលឥណ្ឌូនេស៊ី កំពុងដាក់ចេញវិធានការលើកទឹកចិត្ត ដើម្បីទាក់ទាញក្រុមហ៊ុនថៃ និងក្រុមហ៊ុនបរទេសផ្សេងទៀត ឱ្យមកបណ្តាក់ទុន ក្នុងគម្រោងរដ្ឋធានីថ្មីរបស់ខ្លួន ដែលមានឈ្មោះថា Nusantara។
វិធានការលើកទឹកចិត្តរួមមានដូចជា ការផ្អាកបង់ពន្ធចំនួន៣០ឆ្នាំ សម្រាប់ការវិនិយោគក្នុងឧស្សាហកម្មគោលដៅ ដូចជា ហេដ្ឋារចនាសម្ព័ន្ធ និងសេវាកម្មសាធារណៈ និងការកាត់ពន្ធ៣៥០% សម្រាប់ការវិនិយោគក្នុងការស្រាវជ្រាវ និងការអភិវឌ្ឍ។
វិធានការលើកទឹកចិត្តទាំងនេះ ត្រូវបានប្រកាសដោយលោក Agung Wicaksono អនុប្រធានផ្នែកហិរញ្ញវត្ថុ និងការវិនិយោគនៅរដ្ឋធានី Nusantara នៅលើវេទិកាធុរកិច្ចឆ្នាំ២០២៣ ស្តីពីឱកាសវិនិយោគនៅក្នុងរដ្ឋធានីថ្មី បន្ទាប់របស់ប្រទេសឥណ្ឌូនេស៊ី។ព្រឹត្តិការណ៍នេះ ត្រូវបានរៀបចំឡើង ដោយស្ថានទូតឥណ្ឌូនេស៊ី មជ្ឈមណ្ឌលជំរុញការវិនិយោគឥណ្ឌូនេស៊ី និងអាជ្ញាធររដ្ឋធានីជាតិ Nusantara កាលពីថ្ងៃសុក្រសប្តាហ៍មុន។
លោក Wicaksono បានមានប្រសាសន៍ថា “យើងនឹងចាប់ផ្តើមសាងសង់ការិយាល័យរដ្ឋាភិបាល ក្នុងពេលឆាប់ៗនេះ ហើយយើងនឹងធ្វើឱ្យវាក្លាយជាទីក្រុងដ៏ឆ្លាតវៃ និងមាននិរន្តរភាព ដោយលោកជំរុញឱ្យអ្នកវិនិយោគថៃ ចូលរួមជាមួយបណ្តាក្រុមហ៊ុន មកពីប្រទេសជប៉ុន ម៉ាឡេស៊ី និងសិង្ហបុរីក្នុងការអភិវឌ្ឍទីក្រុងនេះផងដែរ”។លោកបានបន្តថា ចន្លោះឆ្នាំ២០១៧ និងឆ្នាំ២០២២ អ្នកវិនិយោគថៃ បានចាក់បញ្ចូលទឹកប្រាក់ ចំនួន១,៥២ពាន់លានដុល្លារអាមេរិក ទៅក្នុងគម្រោងប្រហែល១.៥០០ នៅទូទាំងប្រទេសឥណ្ឌូនេស៊ី។
ទន្ទឹមគ្នានេះ ក្រុមហ៊ុនចំនួន២៨៤ បានបង្ហាញពីចំណាប់អារម្មណ៍ ក្នុងការវិនិយោគនៅក្នុងរដ្ឋធានីថ្មី ក្នុងនោះមាន២៧ក្រុមហ៊ុនមកពីប្រទេសសិង្ហបុរី ២៥ក្រុមហ៊ុនមកពីប្រទេសជប៉ុន និង១៩ក្រុមហ៊ុនមកពីប្រទេសម៉ាឡេស៊ី។លោក Wicaksono បញ្ជាក់ថា “យើងក៏ទន្ទឹងរង់ចាំស្វាគមន៍អ្នកវិនិយោគថៃ មកបណ្តាក់ទុនក្នុងគម្រោងនេះផងដែរ”៕
