ដោយៈ គង់ សូរិយា
ភ្នំពេញៈ នៅក្នុងរយៈពេលប៉ុន្មានថ្ងៃមកនេះ មានការបង្ហោះតាមបណ្ដាញសង្គមព្រោងព្រាត ជុំវិញទិដ្ឋភាពភ្ញៀវទេសចរ នៅក្នុងខេត្តសៀមរាប ជាពិសេសភ្ញៀវទេសចរបរទេស។ ប៉ុន្តែក៏មានអ្នកខ្លះ បានយករូបភាពភ្ញៀវទេសចរ ដែលទៅចូលរួមថត និងទស្សនាព្រឹត្តិការណ៍សមរាត្រី (ព្រះអាទិត្យរះចំកំពូលប្រាសាទអង្គរវត្ត ) មកផុសហើយថាសៀមរាបមិនស្ងាត់ភ្ញៀវទេ។យ៉ាងណាក្ដីអ្នកជំនាញទេសចរណ៍កម្ពុជា បានទទួលស្គាល់ថា ក្នុងមួយរយៈចុងក្រោយនេះ សៀមរាបពិតជាស្ងាត់ភ្ញៀវមែន។
លោកហូ វណ្ឌី ទីប្រឹក្សាសមាគមទីភ្នាក់ងារទេសចរណ៍កម្ពុជា បានមានប្រសាសន៍ ប្រាប់អ្នកសារព័ត៌មានក្នុងស្រុកមួយឱ្យដឹងថា ខែនេះ ជារដូវកាលមានភ្ញៀវតិច ឬហៅថា Low Season ហើយមិនមែនតែខេត្តសៀមរាបទេ ដែលមានភ្ញៀវតិច គឺស្ទើរតែទូទាំងប្រទេសកម្ពុជាទៅហើយ ។
លោកបន្តថា កត្តាមួយផ្សេងទៀត ដែលនាំឱ្យភ្ញៀវទេសចរបរទេសទៅលេងប្រទេសថៃច្រើន ដោយសារថៃមានការទាក់ទាញខ្លាំង ក្នុងនោះថៃមានក្រុមហ៊ុនអាកាសចរ រហូតទៅដល់ជាង១០០ក្រុមហ៊ុនឯណោះ ហើយធនធានមនុស្ស និងធនធានទេសចរណ៍របស់គេក៏មានច្រើន សម្រាប់ទាក់ទាញដល់ភ្ញៀវទេសចរបរទេស។ក្រៅពីនេះ កត្តារៀបចំសណ្ដាប់ធ្នាប់ ការធ្វើចរាចរណ៍របស់ពលរដ្ឋគេក៏មានរបៀបរៀបរាយត្រឹមត្រូវ ។ ទាំងអស់នេះហើយ ដែលកម្ពុជាគួរតែមើលហើយអនុវត្តន៍តាមគេ ដើម្បីទាក់ទាញភ្ញៀវទេសចរបរទេស ។
លោកបន្តថា ចំពោះស្ថានភាពទេសចរ នៅក្នុងប្រទេសជិតខាងរបស់យើង ដែលមានចំនួនច្រើនជាងយើងនោះ គឺដោយសារតែគេមានទឹកដីធំជាងយើង គេមានផលិតផលទេសចរណ៍ច្រើនជាងយើង សំបូរបែបជាងយើង ហើយផលិតផលទេសចរណ៍ខ្លះ ក៏កម្ពុជាមិនអាចធ្វើបានដូចគេដែរ ដោយសារតែទាក់ទងនឹងទំនៀម ទម្លាប់ប្រពៃណីរបស់យើង ដែលមិនអាចឱ្យយើងត្រូវធ្វើដូចគេបាន។
លោកស៊ិន ចាន់សិរីវុត្ថាអនុរដ្ឋលេខាធិការ និងជាអ្នកនាំពាក្យនៃរដ្ឋលេខាធិការដ្ឋានអាកាសចរណ៍ស៊ីវិល បានអះអាងកាលពីពេលថ្មីៗនេះថា អាកាសយានដ្ឋានអន្តរជាតិ ខេត្តសៀមរាបទទួលបានជើងហោះហើរចំនួន៧លើកប៉ុណ្ណោះ ក្នុងមួយថ្ងៃ ជាអ្វីដែលផ្ទុយពីការលើកឡើងរបស់អ្នកនាំពាក្យក្រសួងទេសចរណ៍។ អ្នកតាមដានក្នុងវិស័យនេះឯករាជ្យ បាននិយាយក្នុងលក្ខខ័ណ្ឌមិនបញ្ចេញឈ្មោះថា បញ្ហាវិបត្តិភ្ញៀវទេសចរណ៍បរទេស មិនមកទស្សនាកម្ពុជាមានកត្តាខាងក្រៅ និងកត្តាខាងក្នុង។
ចំណែកកត្តាផ្ទៃក្នុងកម្ពុជាមាន ដូចជា ទី១ ការផ្សព្វផ្សាយមិនបានទូលំទូលាយពីសក្តានុពល ទេសចរណ៍កម្ពុជានៅក្រៅប្រទេស ទី២ មន្រ្តីអន្តោប្រវេសន៍ នៅតាមច្រកទ្វារព្រលានយន្តហោះ បានដាក់គំនាប ដោយទារប្រាក់ពីភ្ញៀវទេសចរណ៍យ៉ាងអាក្រក់ ទី៣ ការលក់ផលិតផលទេសចរណ៍កោភ្ញៀវ ដោយគ្មានការខ្មាស់អៀនពីម្ចាស់ហាងលក់វត្ថុអនុស្សាវរីយ៍នានា នៅក្នុងក្រុងសៀមរាប ទី៤ កម្ពុជាគ្មានផលិតផលទេសចរណ៍អ្វី ដែលមានភាពទាក់ទាញក្រៅពីទស្សនាប្រាសាទអង្គរវត្ត៕
