ភ្នំពេញ:ក្រុមហ៊ុន OCIC គឺជាក្រុមហ៊ុនវិនិយោគទុនអាណិកជនកម្ពុជា ដែលមានឯកទេសក្នុងការអភិវឌ្ឍន៍វិស័យចម្រុះ និងក្រុមហ៊ុន Big C ដែលជាបណ្តាញផ្សារទំនើបដ៏ធំបំផុតមួយរបស់អាស៊ីអាគ្នេយ៍ដែលមានប្រតិបត្តិការជាង 2000 ហាងនៅទូទាំងប្រទេសថៃ ហុងកុង វៀតណាម ឡាវ និងប្រទេសកម្ពុជា មានសេចក្តីរំភើបរីករាយក្នុងការចុះហត្ថលេខាលើកិច្ចព្រមព្រៀងសម្រាប់ភាពជាដៃគូយុទ្ធសាស្ត្រក្នុងការអភិវឌ្ឍន៍ផ្សារទំនើបទំហំ 2.7 ហិចតានៅតំបន់រង្វង់មូលសុវណ្ណមច្ឆាក្នុងទីក្រុងរណបជ្រោយចង្វាររាជធានីភ្នំពេញ ។
ការចុះហត្ថលេខាលើអនុស្សរណៈនៃកិច្ច ព្រមព្រៀងថ្មីនេះ គឺជាព្រឹត្តិការណ៍ដ៏អស្ចារ្យមួយដែលបានពន្លឹកអំពីការចុះកិច្ចព្រមព្រៀងនៃការយោគយល់គ្នា លើកដំបូងដែលបានចុះហត្ថលេខាកាលពីខែមេសា ឆ្នាំ 2023 ។ កិច្ចព្រមព្រៀងថ្មីនេះ នឹងឃើញពីការចាប់ផ្តើមនៃការសាងសង់ផ្សារទំនើបដើម្បីលើកកម្ពស់ការលក់រាយឲ្យកាន់តែប្រសើរឡើង និងរួមចំណែកលើកកម្ពស់ដល់កំណើនសេដ្ឋកិច្ច នៅរាជធានីភ្នំពេញ និងប្រទេសកម្ពុជាទាំងមូល ។
ពិធីចុះហត្ថលេខាជាផ្លូវការនេះអញ្ជើញចូលរួមដោយ គណៈប្រតិភូមកពីក្រុមហ៊ុនកាណាឌីយ៉ាគ្រុបដឹកនាំដោយ អ្នកឧកញ៉ាបណ្ឌិត ពុង ឃាវសែ, លោកស្រីវេជ្ជបណ្ឌិត លឹម លីណា ស្ថាបនិកក្រុមហ៊ុនកាណាឌីយ៉ាគ្រុប, លោកស្រី លឹម លីជិន នាយិកាក្រុមហ៊ុនមេហ្គាអាសិតមេនេចមេន, លោក អាំង អេងហ៊ុយ ប្រធាននាយកដ្ឋានផ្នែកហិរញ្ញវត្ថុ OCIC (CFO) និងលោក Thierry Tea អនុប្រធានក្រុមហ៊ុន OCIC ព្រមទាំង លោក Gary Hardy នាយកប្រតិបត្តិក្រុមហ៊ុន BIG C (COO), លោក Suwin Somsri អនុប្រធានក្រុមហ៊ុន BIG C, កញ្ញា Nattasuda Komoltham នាយកគ្រប់គ្រងជាន់ខ្ពស់ ផ្នែកអភិវឌ្ឍន៍អាជីវកម្មនៃក្រុមហ៊ុន Big C និង លោកស្រី សូនីតា សំណាង នាយកប្រតិបត្តិផ្នែកអភិវឌ្ឍន៍អាជីវកម្មក្រុមហ៊ុន Big C ។
ផ្សារទំនើបដែលនឹងចាប់ផ្តើមសាងសង់ក្នុងពេលឆាប់ៗនេះនឹងបង្កើនគំនិតនៃការដើរទិញឥវ៉ាន់ដោយផ្តល់ជូននូវជម្រើសដ៏ទូលំទូលាយនៃផលិតផលស្រស់ៗ ទំនិញស្ងួត និងផលិតផលនាំចូលសម្រាប់អ្នកទិញទំនិញពីផ្សារទំនើប Big C ផងដែរ ។ ជាមួយនឹងការប្តេជ្ញាចិត្តចំពោះសេវាកម្មអតិថិជន ផ្សារទំនើប Big C នឹងផ្តល់ជូនអ្នកទិញនូវបទពិសោធន៍ថ្មីក្នុងការទិញទំនិញជាមួយនឹងគម្រោងនេះ ដែលរំពឹងថានឹងបើកក្នុងរយៈពេល 18 ទៅ 24 ខែខាងមុខនេះ ។
លោកស្រី លឹម លីជិន នាយិកាក្រុមហ៊ុនមេហ្គាអាសិតមេនេចមេនបានលើកឡើងថា “ យើងមានសេចក្តី សោមនស្សរីករាយក្នុងការចុះកិច្ចព្រមព្រៀងនេះជាមួយក្រុមហ៊ុន Big C និងក្រុមហ៊ុន Berli Jucker Company (BJC) របស់ប្រទេសថៃក្នុងការនាំយកសេវាកម្មផ្សារទំនើបធំៗខ្នាតយក្សចូលមកក្នុងរាជធានីភ្នំពេញ ប្រទេសកម្ពុជា ។ ជាមួយនឹងការប្តេជ្ញាចិត្តរួមគ្នារបស់យើងចំពោះឧត្តមភាព ស្របតាមចក្ខុវិស័យរបស់ស្ថាបនិក និងជាប្រធានក្រុមហ៊ុន អ្នកឧកញ៉ាបណ្ឌិត ពុង ឃាវសែ ខណៈពេលដែលយើងមានបំណងក្នុងការអភិវឌ្ឍបទពិសោធន៍ នៃការលក់រាយសម្រាប់អ្នករស់នៅដោយផ្តល់នូវផលិតផលគុណភាពខ្ពស់ជាច្រើនប្រភេទនៅក្នុងបរិយាកាសផ្សារទំនើបដែលស្រស់ស្អាត និងមានទីតាំងធំទូលាយ ។ កិច្ចសហការនេះឆ្លុះបញ្ចាំងពីការយកចិត្តទុកដាក់របស់ OCIC Group ក្នុងការជំរុញកំណើនសេដ្ឋកិច្ច និងលើកកម្ពស់សុខុមាលភាពរបស់សហគមន៍”។ 
ក្រុមហ៊ុន Big C ត្រូវបានគេស្គាល់ថា គឺជាក្រុមហ៊ុនដែរឈរលើការប្តេជ្ញាចិត្តរបស់ខ្លួនចំពោះគុណភាព និងការពេញចិត្តរបស់អតិថិជន គឺមានភាពសាទរខ្លាំងដូចគ្នាចំពោះគម្រោងនេះ ។ លោក Gary Hardy នាយកប្រតិបត្តិនៃក្រុមហ៊ុន Big C បានមានប្រសាសន៍ថា “ យើងមានសេចក្តីសោមនស្សរីករាយដែលបានចាប់ដៃគូជាមួយក្រុមហ៊ុន OCIC Group ក្នុងការបង្ហាញនូវគំនិតផ្តួចផ្តើមផ្សារទំនើបរបស់យើងទៅកាន់ខណ្ឌជ្រោយចង្វារ ។ ជាមួយនឹងផលិតផល និងសេវាកម្មសម្រាប់អតិថិជនដ៏សម្បូរបែបរបស់យើង យើងមានទំនុកចិត្តថាកិច្ចសហការ នេះនឹងបង្កើតស្តង់ដារថ្មីសម្រាប់ឧត្តមភាពនៃការលក់រាយ ។ ជារួមយើងនឹងបង្កើតគោលដៅទិញទំនិញដែលលើសពីការរំពឹងទុករបស់សហគមន៍ ។
កិច្ចព្រមព្រៀងរវាងក្រុមហ៊ុន OCIC Group និងក្រុមហ៊ុន Big C បានបង្ហាញពីការរួមគ្នាដ៏ខ្លាំងរវាងអ្នកដឹកនាំក្នុង ឧស្សាហកម្មទាំងពីរតាមរយៈការចែករំលែកនូវចក្ខុវិស័យរួមនៃការជំរុញកំណើនសេដ្ឋកិច្ច និងការផ្តល់នូវបទពិសោធន៍លក់រាយដែលមិនអាចប្រៀបផ្ទឹមបាន ។ តាមរយៈការរួមបញ្ចូលគ្នានូវជំនាញធនធាន និងការលះបង់របស់ក្រុមហ៊ុន OCIC Group និងក្រុមហ៊ុន Big C ត្រៀមរៀបចំឡើងវិញនូវទិដ្ឋភាពលក់ទំនិញរាយនៃខណ្ឌជ្រោយចង្វារ ដោយធ្វើអោយរឹងមាំនូវទីផ្សារអាជីវកម្ម និងលើកកម្ពស់ជីវភាពរស់នៅរបស់ប្រជាជនក្នុងតំបន់ ។ 
លោក Thierry Tea អនុប្រធានក្រុមហ៊ុន OCIC Group បានបញ្ជាក់ថា គម្រោងនេះមានទស្សនវិស័យវិនិយោគរយៈពេល 30ឆ្នាំ សម្រាប់ក្រុមហ៊ុនទាំងពីរដោយផ្តោតលើការផ្តល់ជម្រើសកាន់តែច្រើនសម្រាប់បម្រើប្រជាជនកម្ពុជាឲ្យមានការរីកចម្រើនយ៉ាងឆាប់រហ័ស ។ លោក Thierry Tea បានបន្ថែមថា “ យើងត្រូវតែមានភាពច្នៃប្រឌិតជាងមុន ហើយជាមួយនឹងភាពខុសគ្នា យើងកំពុងឈានចូលយុគសម័យថ្មីសម្រាប់ប្រទេសកម្ពុជា ហើយអតិថិជនរបស់យើងកំពុងស្វែងរកនិន្នាការផ្លាស់ប្តូរយ៉ាងឆាប់រហ័ស និងបំណងប្រាថ្នានៃការរស់នៅដែលស្រដៀងទៅនឹងប្រទេសអាស៊ីដែលមានភាពចាស់ទុំ ប៉ុន្តែនៅតែប្រកាន់ខ្ជាប់យ៉ាងខ្លាំងជាមួយនឹងវប្បធម៌ និងប្រពៃណីខ្មែរ ”
លោក Thierry Tea អនុប្រធានក្រុមហ៊ុន OCIC Group បានបន្តទៀតថា “ ការចំណាយពេលច្រើនជាមួយគ្រួសារ តុល្យភាពជីវិតការងារ ការអប់រំសម្រាប់កុមារ កីឡា ការថែរក្សាបរិស្ថាន ខណៈពេលដែលមានជម្រើសកាន់តែទូលំទូលាយ គឺជាលក្ខណៈវិនិច្ឆ័យសំខាន់ៗមួយចំនួននៅក្នុងតំរូវការអ្នកប្រើប្រាស់របស់យុវជនជំនាន់ក្រោយ ។ ប្រជាជនដែលមានអាយុក្រោម៣០ឆ្នាំតំណាងឲ្យជិត ៧០% នៃប្រជាជនកម្ពុជា។ ដូច្នេះហើយទីផ្សារលក់រាយដែលចាប់ផ្តើម ប៉ុន្តែមានការប្រកួតប្រជែងរួចហើយគឺស្ថិតនៅក្នុងតម្រូវការសម្រាប់គំនិតថ្មីៗ” ។
ខណ្ឌជ្រោយចង្វារ ដែលមានប្រជាជនរស់នៅជាង 200,000 នាក់ ត្រូវបានហ៊ុំព័ទ្ធដោយទន្លេធំពីររបស់ប្រទេសកម្ពុជាគឺទន្លេមេគង្គ និងទន្លេសាប ។ តំបន់នេះផ្តល់នូវកំណើនតម្លៃសេដ្ឋកិច្ចពិសេសមួយសម្រាប់តំបន់ដែលកំពុងរីកចម្រើនយ៉ាងឆាប់រហ័ស ដែលបានឃើញក្នុងប៉ុន្មានឆ្នាំថ្មីៗនេះ ការអភិវឌ្ឍន៍តាមទីក្រុងជាច្រើន និងជម្រើសកន្លែងកម្សាន្តដូចជា សួនដាយណូស័រ និងកន្លែងជិះស្គីទឹកកក ដែលមានលក្ខណៈជាលក្ខណៈគ្រួសារ និងសម្រាប់កុមារ ប៉ុន្តែក៏មានអគាររបស់រដ្ឋាភិបាលសំខាន់ៗជាច្រើនដែលផ្លាស់ប្តូរទីតាំងក្នុងតំបន់នេះផងដែរ ។អាគារស្ថាប័នភ្នាក់ងាររដ្ឋាភិបាលសកម្មមួយចំនួនដែលមានទីតាំងនៅជ្រោយចង្វារ រួមមានដូចជាមជ្ឈមណ្ឌលអភិវឌ្ឍធុរិះកិច្ច ដែលស្ថិតនៅក្រោមក្រសួងសេដ្ឋកិច្ច និងហិរញ្ញវត្ថុ ។ លើសពីនេះយានដ្ឋានរថយន្ត និងកន្លែងតាំងបង្ហាញរថយន្ត និងទីកន្លែងលក់ និងគ្រឹះស្ថានអប់រំដូចជា សាកលវិទ្យាល័យវិទ្យាសាស្ត្រ និងបច្ចេកវិទ្យាកម្ពុជា (ខេមតិច) ហាងកាហ្វេម៉ាកល្បីៗដូចជា Starbucks ឬ Amazon ក៏ចាប់ផ្តើមផ្លាស់ទៅ OCIC ខណ្ឌជ្រោយចង្វារផងដែរ ។
ទន្ទឹមនឹងការកើនឡើងនៃចំនួនប្រជាជន និងការចាប់អារម្មណ៍ចំពោះតំបន់នេះស្ពានឫស្សីកែវដែលទើបនឹងសាងសង់រួច ឆ្លងកាត់ទន្លេសាបត្រូវបានបើកដំណើរការ និងដំណើរការតាំងពីខែមិថុនា ឆ្នាំ២០២៣ ។OCIC Group មានសេចក្តីសោមនស្សរីករាយក្នុងការចែករំលែកនូវការអភិវឌ្ឍន៍ និងភាពជាដៃគូនាពេលខាងមុខដ៏គួរឱ្យចាប់អារម្មណ៍ន្ថែមទៀត ខណៈដែលក្រុមហ៊ុនមានគោលបំណងនាំយកផលិតផល និងសេវាកម្មបន្ថែមដល់អតិថិជនរបស់យើងដោយនាំអ្នកទាំងអស់គ្នាមានទំនាក់ទំនងតែជិតស្និទ្ធជាមួយគ្នា និងបន្ថែមតម្លៃដល់សហគមន៍ដ៍រស់រវើករបស់យើង ។
អំពីក្រុមហ៊ុនOCIC
OCIC គឺជាក្រុមហ៊ុនអភិវឌ្ឍន៍វិស័យចម្រុះដែលឈានមុខគេមួយនៅប្រទេសកម្ពុជា ។ ក្រុមហ៊ុនសម្ព័ន្ធ OCIC គឺជាក្រុមហ៊ុនវិនិយោគជាច្រើន ដែលមានទំនាក់ទំនងពាណិជ្ជកម្មរួមគ្នា ផ្តោតទៅលើការអភិវឌ្ឍន៍ វិស័យជាច្រើនដូចជា វិស័យអចលនទ្រព្យ វិស័យអប់រំ វិស័យសុខាភិបាល ការសាងសង់អកាសយានដ្ឋានអន្តរជាតិតេជោ សំណង់អគារពាណិជ្ជកម្ម ប្រព័ន្ធផ្សព្វផ្សាយ និងការកំសាន្តផ្សេងៗ ។ ការអភិវឌ្ឍន៍ដែលជាគោលសំខាន់ៗរបស់ក្រុមហ៊ុន OCIC មានដូចជា អាកាសយានដ្ឋានអន្តរជាតិតេជោ ទីក្រុងកោះពេជ្រ ទីក្រុងកោះនរា ទីក្រុងរណបជ្រោយចង្វារ និងទីក្រុងអូឡាំព្យាជាដើម ។ OCIC Group គឺបុត្រសម្ព័ន្ធរបស់កាណាឌីយ៉ាគ្រុប សូមចូលទៅកាន់គេហទំព័រ www.ocic.com.kh
អំពីផ្សារទំនើប BIG C
ផ្សារទំនើប BIG C គឺជាផ្សារទំនើបលក់រាយសម្ភារះ និងផលិតផលគ្រប់មុខធំជាងគេមួយនៅក្នុងតំបន់អាស៊ីអាគ្នេយ៍ ជាមួយនឹងប្រាក់ចំណូលសរុបចំនួន ៤.៤ ពាន់លានដុល្លារកាលពីឆ្នាំទៅមុននេះ។ ផ្សារទំនើប BIG C គឺជាផ្នែកមួយនៃក្រុមហ៊ុន Berli Jucker Public Company Limited ឬ BJC ដែលជាក្រុមហ៊ុនអាជីវកម្មដ៏ធំបំផុតមួយនៅក្នុងប្រទេសថៃ។ BIG C បានដំណើរការហាងលក់រាយចំនួន 1,810 កន្លែងនៅក្នុងប្រទេសថៃ ដែលក្នុងនោះមានចំនួន ១,៤៤៩ កន្លែងគឺជាហាងប្រភេទ BIG C MINI ១៥៤ កន្លែងគឺផ្សារទំនើប BIG C ខ្នាតយក្ស និង ៦១ កន្លែងទៀតជា BIG C Market ។ សម្រាប់វត្តមាននៅប្រទេសឡាវវិញ ផ្សារទំនើប BIG C ក៏បានដំណើរការអាជីវកម្មចំនួន ៦០ កន្លែងជា BIG C Mini និង មួយទីតាំងទៀតជា ផ្សារទំនើបខ្នាតយក្ស Hypermarket ដែលកំពុងស្តិតក្នុងការសាងសង់។
