ដោយ វុត្ថា
ព្រះសីហនុ៖ អាជ្ញាធរខេត្តព្រះសីហនុបានបង្ហាញចំណាប់អារម្មណ៍ និងមានបំណងចង់រៀបចំសួនច្បារ៤កន្លែង នៅក្នុងក្រុងព្រះសីហនុ ឲ្យមានសោភ័ណភាពដើម្បីបំរើដល់ប្រជាពលរដ្ឋនៅក្នុងខេត្ត ក៏ដូចជាភ្ញៀវទេសចរណ៍ជាតិ និងអន្តរជាតិបានលមកលេកម្សាន្តសម្បាយរីករាយ។
លោកយន្ត មីនអភិបាលខេត្តរូបនេះ បានសរសេរនៅលើគេហទំព័រហ្វេសបុកផ្លូវការរបស់ខ្លួនកាលពីពេលថ្មីៗនេះថា “នៅពេលខាងមុខឆាប់ៗនេះខ្ញុំមានបំណងចង់រៀបចំសួនច្បារ៤កន្លែងក្នុងក្រុងព្រះសីហនុ ខេត្តព្រះសីហនុ រួមានទីតាំងទី១ គឺ សួនកូនសោរនៅក្បែរវិមានឯករាជ្យ សង្កាត់លេខ៣ ក្រុង-ព្រះសីហនុ។
ទីតាំងទី២ គឺ សួនច្បារនៅក្បែរអតីតមហោស្រព សង្កាត់លេខ២ ក្រុង-ខេត្តព្រះសីហនុ ដោយរដ្ឋបាលខេត្តនឹងរៀបចំឲ្យផ្លាស់ប្តូរចំណតរថយន្តបច្ចុប្បន្នទៅចំណតរថយន្តថ្មី នៅភូមិ១ (ក្បាលឆាយ) សង្កាត់លេខ១ ក្រុងព្រះសីហនុវិញ។ ទីតាំងទី៣ គឺ សួនច្បារកន្ទុយនាគ នៅសង្កាត់លេខ៤ ក្រង-ខេត្តព្រះសីហនុ។ និង ទីតាំងទី៤ គឺ សួនកុមារនៅឆ្នេរអូរឈើទាល សង្កាត់លេខ៤ កែលំអឲ្យទៅជាសួនកុមារថ្មី និងបន្ថែមឧបករណ៍ សម្រាប់ចៅៗ តូចៗលេងកំសាន្ត”។
លោកបន្តថា នៅក្នុងសួនច្បារនីមួយៗ គ្រោងនឹងរៀបចំឲ្យមាន ឧបករណ៍សម្រាប់បងប្អូន ហាត់ប្រាណ បំប៉នសុខភាព បន្ថយភាពតានតឹង ភាពហត់នឿយ និងបន្ថែម។ លោកក៏បានសួរយោបល់ពីពលរដ្ឋផងដែរថា “តើបងប្អូនប្រជាពលរដ្ឋមានយោបល់យ៉ាងណាដែរ ចំពោះការរៀបចំនេះ? មានក្មួយៗ ស្ថាបត្យករមានចំណាប់អារម្មណ៍ក្នុងការជួយក្នុងគំរោងទាំងនេះដែរទេ។
តាមរយៈចូលទៅខំមិន នៅក្នុងហ្វេសបុករបស់លោកមានប្រជាពលរដ្ឋជាច្រើនបានសម្តែងការស្វាគម៍ និងគាំទ្រចំពោះបំណងរបស់លោកអភិបាលខេត្ត ក្នុងកសាររៀបចំសួនច្បារ៤កន្លែងនៅក្នុងក្រុងព្រះសីហុនុនេះ។
ម្ចាស់ហ្វេសបុក ដែលមានឈ្មោះ Ly Chamnab បានសារសេរថា “ខ្ញុំបាទជាប្រជាពលរដ្ឋរស់នៅខេត្តព្រះសីហនុ សូមថ្លែងអំណរគុណឯកឧត្តមអភិបាលខេត្ត ដែលខិតខំប្រឹងប្រែងគ្មានពេលឈប់សម្រាក អភិវឌ្ឍន៍ខេត្តព្រះសីហនុ ពីមួយថ្ងៃទៅមួយថ្ងៃកាន់តែល្អ នឹងសូមជូនពរឯកឧត្តមមានកំលាំងមាំមួន និងប្រាជ្ញាវាងវៃដើម្បីដឹកនាំខេត្តបន្តទៅមុខទៀតកាន់តែទំនើបតាមសម័យកាល”។
ជាមួយគ្នានោះ ហ្វេសបុក ដែលមានឈ្មោះ Prak Samprathna បានឲ្យដឹងដែរថា “នេះជាគម្រោងមួយដ៏ល្អ ហើយវាអាចនឹងកែប្រែមុខមាត់ខេត្ត ឲ្យកាន់តែស្រស់ស្អាត ខ្ញុំបាទសូមថ្លែងអំណរគុណឯកឧត្តមអភិបាលខេត្ត ដែលខិតខំប្រឹងប្រែងគ្មានពេលឈប់សម្រាកអភិវឌ្ឍន៍ខេត្តព្រះសីហនុ ពីមួយថ្ងៃទៅមួយថ្ងៃកាន់តែល្អ៕
