ដោយ: គង់ លាងហួរ
អន្តរជាតិ: មូលនិធិរូបិយវត្ថុអន្តរជាតិ (IMF) លើកឡើងថា ផលក្នុងទុនសរុបស្រុកសរុបបន្ទាប់បន្សំ(Nominal GDP)របស់ប្រទេសជប៉ុនក្នុងឆ្នាំនេះ ត្រូវបានគេរំពឹងថា នឹងធ្លាក់ចុះពីចំណាត់ថ្នាក់លេខ៣ មកនៅចំណាត់ថ្នាក់លេខ៤ នៅលើពិភពលោក។
ការធ្លាក់ចំណាត់ថ្នាក់នេះ ដោយការវ៉ាដាច់ពីប្រទេសអាល្លឺម៉ង់ ខណៈប្រាក់យ៉េនកំពុងធ្លាក់ថ្លៃខ្លាំង។ Nominal GDP គឺជាផលិតផលក្នុងស្រុកសរុប ដែលត្រូវបានគណនាជាមួយនឹងអតិផរណា ហើយតម្លៃទំនិញ និងសេវាកម្មត្រូវបានគណនាតាមកម្រិតតម្លៃបច្ចុប្បន្ន។
ស្របពេលដែលតួលេខផលិតផល ក្នុងស្រុកសរុបបន្ទាប់បន្សំ(Nominal GDP)បានរងផលប៉ះពាល់ ដោយសារអត្រាអតិផរណា។ ដូច្នេះប្រទេសជប៉ុន ត្រូវបានមូលនិធិIMFព្យាករណ៍ថា នឹងធ្លាក់ចុះពីចំណាត់ថ្នាក់លេខ៣ មកនៅចំណាត់ថ្នាក់លេខ៤វិញ ក្នុងនាមជាប្រទេស ដែលមានសេដ្ឋកិច្ចធំបំផុត នៅលើពិភពលោក នៅឆ្នាំ២០២៣នេះ បន្ទាប់ពីប្រទេសជប៉ុន បានកាន់កាប់តំណែងនេះអស់ រយៈពេលជាង១ទសវត្សរ៍រួចមកហើយ។
ជាមួយគ្នានេះ ប្រទេសជប៉ុនត្រូវបានគេរំពឹងថា នឹងក្លាយជាប្រទេស ដែលមានសេដ្ឋកិច្ចធំជាងគេទី៥ របស់ពិភពលោកនៅចន្លោះឆ្នាំ២០២៦ និងឆ្នាំ២០២៨ ហើយទំហំសេដ្ឋកិច្ចរបស់ឥណ្ឌា ត្រូវបានគេព្យាករណ៍ថា នឹងឡើងមកកាន់ចំណាត់ថ្នាក់ទី៤ នៅលើពិភពលោក ក្នុងឆ្នាំ២០២៦ និងចំណាត់ថ្នាក់ទី៣នៅឆ្នាំ២០២៧។
នៅឆ្នាំ១៩៦៨ ប្រទេសជប៉ុនបានដណ្តើម យកតំណែងរបស់ប្រទេសអាល្លឺម៉ង់ខាងលិច ដោយបានវ៉ាដាច់ទំហំផលិតផលជាតិសរុបរបស់អាល្លឺម៉ង់នៅពេលនោះ ហើយជប៉ុនបានក្លាយជាប្រទេសដែលមានសេដ្ឋកិច្ចធំជាងគេទីពីរ របស់ពិភពលោក បន្ទាប់ពីសហរដ្ឋអាមេរិក។
ប្រទេសជប៉ុនបានកាន់កាប់តំណែង ជាប្រទេសដែលមានសេដ្ឋកិច្ចធំជាងគេទីពីររបស់ពិភពលោក ចាប់តាំងពីឆ្នាំ១៩៦៨នោះមក រហូតដល់ប្រទេសចិន បានដណ្តើមយកតំណែងនេះ ក្នុងឆ្នាំ២០១០ ដោយទាញទម្លាក់ប្រទេសជប៉ុន មកនៅត្រឹមចំណាត់ថ្នាក់លេខ៣វិញ៕
