ដោយៈជេស៊ីកា
ភ្នំពេញៈ ក្រុមហ៊ុនលំដាប់យក្សក្នុងស្រុកOCIC បាននិងកំពុងបោះទុនជិត១០០លានដុល្លារ ដើម្បីរៀបចំបើកដំណើរការមជ្ឈមណ្ឌលពាណិជ្ជកម្មចម្រុះ នាកណ្តាលទីក្រុងកោះពេជ្រ។ គំរោងនេះរួមបញ្ចូលនូវផ្សារទំនើប ការិយាល័យសម្រាប់ជួល ទីលានកីឡា ក្លឹបហាត់ប្រាណ មជ្ឈមណ្ឌលកំសាន្ត ជាដើម។
The Connecxion ជាឈ្មោះគំរោងមជ្ឈមណ្ឌលពាណិជ្ជកម្មនេះ ដែលស្ថិតនៅចំកណ្តាលគំរោងDiamond Bay Garden ដែលមានខុនដូចំនួន៤អាគារ ក្នុងនោះអាគារចំនួន២មានកំពស់២៨ជាន់ បានបញ្ចប់ការសាងសង់ និងអាគារចំនួន២ទៀតកំពស់៣៨ជាន់ កំពុងដំណើរការសាងសង់។
លោកជិន ហុកប្រធានគ្រប់គ្រងគំរោងអភិវឌ្ឍន៍ទីក្រុងកោះពេជ្រ នៃក្រុមហ៊ុនOCICបានមានប្រសាសន៍ឲ្យដឹងតាមបណ្តាញតេឡេក្រាម កាលពីរាត្រីថ្ងៃទី២៤ តុលាថា មជ្ឈមណ្ឌ លពាណិជ្ជកម្មចម្រុះកំពស់៧ជាន់នេះ បើគិតតែគ្រោងអាគារ និងការស្ថាបត្យកម្មមួយចប់ សព្វគ្រប់ជិត២៨លានដុល្លារ ប៉ុន្តែបើគិតរួមបញ្ចួលទាំងតម្លៃដីគំរោងនេះ ចំណាយទុនជិត១០០លានដុល្លារ។
លោកបន្តថា ក្នុងចំណោមអាគារកំពស់៧ជាន់នេះ មាន ២ជាន់ស្ថិតនៅក្រោមដី ជាទីតាំងសម្រាប់ចំណតយានយន្ត ខណៈទំហំអាគារសរុបមានចំនួន៣ម៉ឺនម៉ែត្រការ៉េ។ លោកបន្តថា គំរោងនេះសាងសង់លើផ្ទៃដី ទំហំ១៥,០០០ម៉ែត្រការ៉េ ដែ លគិតជាទុនវិនិយោគទាំងដី និងអាគារមានជិត១០០លានដុល្លារអាមេរិក។
លោកបន្តថា ដំណាក់កាលទី១ នឹងបញ្ចប់នៅចុងឆ្នាំនេះ និងគ្រោងបើកដំណើរការ នៅចុងឆ្នាំ២០២៣នេះផងដែរ ប្រសិនជាគ្មានការប្រែប្រួលទេនោះ៕
