មណ្ឌលគិរី ៖ ភ្នំណាមលៀរ ត្រូវបានជនានុជនធ្លាប់មកទស្សនា និងលេងកម្សាន្តយ៉ាងច្រើនកុះករ ហើយបានបង្ហាញនូវរូបភាពដ៏ស្រស់ស្អាតនៃសម្រស់ព្រៃព្រឹក្សា និងផ្ទាំងថ្មដ៏គួរឲ្យទាក់ទាញ និងលម្ហែអារម្មណ៍សម្រាប់អ្នកទេសចរ ជាពិសេសអ្នកនិយមតំបន់ទេសចរណ៍ធម្មជាតិ។
លោកជំទាវ ចាន់ សុម៉ាលី អគ្គលេខាធិការរង នៃក្រុមប្រឹក្សាជាតិអភិវឌ្ឍន៍ដោយចីរភាព និងជានាយិកាគម្រោង “ពង្រឹងការអភិរក្សជីវៈចម្រុះ និងព្រៃស្តុកកាបូននៃប្រព័ន្ធតំបន់ការពារធម្មជាតិកម្ពុជាតាមរយៈកិច្ចសហការគ្រប់គ្រង និងអនុវត្តបង្ហាញពីការអភិរក្សតំបន់ទេសភាពខាងកើតទន្លេមេគង្គ ហៅកាត់ថា CAMPAS កាលពីថ្ងៃព្រហស្បតិ៍ ១០កើត ខែមាឃ ឆ្នាំច សំរឹទ្ធិស័ក ព.ស.២៥៦២ ត្រូវនឹងថ្ងៃទី១៤ ខែកុម្ភៈ ឆ្នាំ២០១៩ បានដឹកនាំក្រុមការងារគម្រោង CAMPAS ចុះទៅទស្សនកិច្ចនៅភ្នំណាមលៀរ ហើយបានធ្វើដំណើរឡើងទៅកាន់កំពូលភ្នំដែលមានសម្រស់គួរឲ្យទាក់ទាញនេះ។
លោកជំទាវអគ្គលេខាធិការរងបានមានប្រសាសន៍ឲ្យដឹងថា គម្រោង CAMPAS និងក្រសួងបរិស្ថាន រួមជាមួយនឹងអាជ្ញាធរមូលដ្ឋាន គ្រោងនឹងជួបប្រជុំពិភាក្សាពីការរៀបចំជាអេកូទេសចរណ៍ធម្មជាតិ។
ភ្នំណាមលៀរ មានទីតាំងឋិតក្នុងភូមិទី១ ឃុំប៊ូស្រា ស្រុកពេជ្រាដា ខេត្តមណ្ឌលគិរី និងជាតំបន់ការពារធម្មជាតិក្នុងដែនជម្រកសត្វព្រៃភ្នំណាមលៀរ មានចម្ងាយប្រមាណជា៥០គីឡូម៉ែត្រពីចំណុចរង្វង់មូលគោព្រៃ ដោយត្រូវធ្វើដំណើរឆ្លងកាត់ចម្ការកៅស៊ូដ៏ធំឆ្ងាយដាច់កន្ទុយភ្នែក ហើយរង់ចាំទទួលភ្ញៀវទេសចរចូលមកកម្សាន្ត និងលម្ហែអារម្មណ៍ជានិច្ច៕
