ដោយ: គង់ លាងហួរ
អន្តរជាតិ: យោងសារពត៌មានVNexpress បានចុះផ្សាយឱ្យដឹងថា រដ្ឋាភិបាលឥណ្ឌូណេស៊ីគ្រោងនឹងយកពន្ធលើភ្ញៀវទេសចរបរទេសនៅក្នុងគោលដៅទេសចរណ៍អាទិភាពកំពូលចំនួន៥បន្ថែមទៀត បន្ទាប់ពីកោះបាលី។
លោក Vinsensius Jemadu អនុរដ្ឋមន្ត្រីក្រសួងទេសចរណ៍ និងសេដ្ឋកិច្ចច្នៃប្រឌិត បានលើកឡើងថា នាពេលខាងមុខ ពន្ធទេសចរណ៍អន្តរជាតិនឹងមិនត្រឹមតែត្រូវបានអនុវត្តនៅលើកោះបាលីប៉ុណ្ណោះទេ តែថែមទាំងអនុវត្តនៅក្នុងគោលដៅចំនួន៥បន្ថែមទៀត ដូចជាបឹងតូបា (ខេត្តស៊ូម៉ាត្រាខាងជើង) ប្រាសាទបូរ៉ូប៊ូឌូរ (កោះជ្វាកណ្តាល) តំបន់រមណីយដ្ឋានឆ្នេរសមុទ្រ Mandalika កោះLabuan Bajo និងឆ្នេរសមុទ្រ Likupang។
លោក Vinsensius បានគូសបញ្ជាក់ថា ការយកពន្ធពីភ្ញៀវទេសចរបរទេសនឹងចាប់ផ្តើមអនុវត្តនៅកោះបាលីក្នុងខែកុម្ភៈ ឆ្នាំ២០២៤ខាងមុខ។
ចំំណែក គោលដៅបន្ទាប់ៗសម្រាប់ការអនុវត្តយកពន្ធស្រដៀងគ្នានេះនឹងត្រូវបានកំណត់ឡើង ដោយផ្អែកលើការវាយតម្លៃលើទិដ្ឋភាពចំនួន៣គឺភាពងាយស្រួលនៃការចូលទៅកាន់សម្រស់ និងភាពទាក់ទាញ។
មន្ត្រីរូបនេះបានអះអាងថា លោកជឿជាក់ថា ការយកពន្ធចំនួន១៥០.០០០រូពី (ប្រហែល១០ដុល្លារអាមេរិក) ពីភ្ញៀវទេសចរបរទេសនៅលើកោះបាលីត្រូវបានចាត់ទុកថា ជាគោលនយោបាយតម្រង់ទិសជាសកល ដូចដែលវាត្រូវបានអនុវត្តនៅក្នុងបណ្តាប្រទេសជាច្រើននៅទូទាំងពិភពលោក ដោយឥណ្ឌូនេស៊ីគឺជាប្រទេសមួយក្នុងចំណោមប្រទេសដែលទើបតែអនុវត្តប៉ុណ្ណោះ។
លោក Vinsensius បានសង្កត់ធ្ងន់ថា ពន្ធលើវិស័យទេសចរណ៍គួរតែដើរទន្ទឹមគ្នាជាមួយនឹងការកែលម្អគុណភាពនៃសេវាកម្ម និងសណ្ឋាគារ។ លោកក៏បានបង្ហាញក្តីសង្ឃឹមផងដែរថា កោះបាលីនឹងក្លាយជាគំរូសម្រាប់តំបន់ទេសចរណ៍ផ្សេងទៀតនៅក្នុងប្រទេសឥណ្ឌូនេស៊ី៕
