ដោយៈ គង់ ហ្វីអូណា
ខេត្តកែបៈ អាជ្ញាធរខេត្តកែប និងគណៈកម្មាធិការជាតិគ្រប់គ្រង និងអភិវឌ្ឍន៍ឆ្នេរសមុទ្រកម្ពុជា បានពិភាក្សាគ្នាដើម្បីរៀបចំអភិវឌ្ឍឆ្នេរសមុទ្រក្នុងខេត្តចំនួនបួន ក្នុងនោះខេត្តកែប ត្រូវបានជ្រើសរើសអភិវឌ្ឍន៍មុនគេ ក្នុងការធ្វើឱ្យឆ្នេរប្រវែង២៧០០ម៉ែត្រ ក្លាយទៅជាឆ្នេរលំដាប់ពិភពលោក។
អភិបាលនៃគណៈអភិបាលខេត្តកែប លោកសោម ពិសិដ្ឋ បានថ្លែងប្រាប់ឱ្យដឹងនៅថ្ងៃទី៨ ខែវិច្ឆិកាថា នៅក្នុងកិច្ចពិភាក្សាជាមួយប្រតិភូគណៈកម្មាធិការជាតិគ្រប់គ្រង និងអភិវឌ្ឍន៍ឆ្នេរសមុទ្រកម្ពុជា នាពេលថ្មីនេះៗ ភាគីទាំងពីរបានជជែកគ្នា ពីផែនការរៀបចំអភិវឌ្ឍខេត្តតំបន់ឆ្នេររួមគ្នា រវាងខេត្តព្រះសីហនុ កំពត កោះកុង និងខេត្តកែប។
ក្នុងផែនការរៀបចំអភិវឌ្ឍខេត្តតំបន់ឆ្នេរនេះ ប្រតិភូគណៈកម្មាធិការជាតិបានចាប់ផ្ដើមចុះត្រួតពិនិត្យ និងស្រាវជ្រាវ ដើម្បីអភិវឌ្ឍឆ្នេរនៅក្នុងខេត្តកែបមុនគេ ខណៈដែលក្នុងខេត្តនេះ កំពុងតែអភិវឌ្ឍតំបន់ឆ្នេររបស់ខ្លួនជាបណ្តើរៗហើយ មានដូចជា ឆ្នេរតាមបណ្តាកោះ និងឆ្នេរអង្កោលជាដើម។
លោកសោម ពិសិដ្ឋ បានឱ្យដឹងទៀតថា ក្រៅតែពីមានការអភិវឌ្ឍឆ្នេរទាំងនេះហើយ គណៈកម្មាធិការជាតិគ្រប់គ្រង និងអភិវឌ្ឍន៍ឆ្នេរសមុទ្រកម្ពុជា ក៏បានជ្រើសរើសតំបន់ឆ្នេរ២៧០០ម៉ែត្រក្នុងខេត្តកែប ដែលទើបតែចាក់ដីបំពេញថ្មី ដើម្បីអភិវឌ្ឍឱ្យក្លាយទៅជាឆ្នេរលំដាប់ពិភពលោកផងដែរ។
ទន្ទឹមនេះ វាក៏ជាការទាក់ទាញភ្ញៀវទេសចរ អន្តរជាតិផងដែរ ព្រោះគម្រោងផ្ដួចផ្ដើម កសាងផែនការរៀបចំដែនដីឆ្នេរកែបនេះ ក្នុងគោលដៅធ្វើឱ្យមានភាពទាក់ទាញទាំងភ្ញៀវជាតិ និងអន្តរជាតិ ហើយការអភិវឌ្ឍន៍ឆ្នេរនេះដែរ វាក៏មិនមែនរៀបចំឡើង ដើម្បីធ្វើការប្រកួតប្រជែងជាមួយឆ្នេរសមុទ្រ ខេត្តព្រះសីហនុ កំពត ឬខេត្តកោះកុងឡើយ ប៉ុន្តែការរៀបចំនេះ ដើម្បីឱ្យតំបន់ឆ្នេរសមុទ្រកម្ពុជា អាចមានការប្រកួតប្រជែងជាមួយនឹងប្រទេសនានាបាន។
អភិបាលខេត្តរូបនេះបានអះអាងថា ចំពោះការអភិវឌ្ឍន៍តំបន់ឆ្នេរនេះបែបណានោះ លោកមិនដឹងច្បាស់នោះទេ ដោយសារគណៈកម្មាធិការជាតិគ្រប់គ្រង និងអភិវឌ្ឍន៍ឆ្នេរសមុទ្រកម្ពុជា គ្រាន់តែចុះមកពិនិត្យមើលទីតាំងសិន ហើយក៏មិនទាន់ស្រាវជ្រាវលម្អិតទាក់ទងនឹងសក្ដានុពលតំបន់ឆ្នេរនេះនូវឡើយទេ។ ប៉ុន្តែនៅក្នុងផែនការរៀបចំតំបន់ឆ្នេរ២៧០០ម៉ែត្រក្នុងខេត្តកែបនេះ អាចមានការរៀបចំហេដ្ឋារចនាសម្ព័ន្ធ ដូចជា ធ្វើផ្លូវថ្នើរជើង ផ្លូវជិះកង់តាមបណ្តោយឆ្នេរ កន្លែងសម្រាប់ទុកដាក់សំរាម ដើម្បីឱ្យមានអនាម័យល្អនៅតាមឆ្នេរ។
ប្រធានសមាគមទីភ្នាក់ងារទេសចរណ៍កម្ពុជា លោកស្រី ឆាយ ស៊ីវលីនបានមានប្រសាសន៍ថា ផែនការនេះជាការផ្ដួចផ្ដើមមួយដ៏ល្អសម្រាប់ខេត្តកែប ក៏ដូចជាប្រទេសកម្ពុជាទាំងមូលផងដែរ ព្រោះខេត្តកែបជាខេត្តតំបន់ទេសចរណ៍មួយ ដែលទាក់ទាញទាំងទេសចរក្នុងស្រុក និងក្រៅស្រុក។
លោកស្រីបន្តថា “ក្រៅពីនេះខេត្តកែបក៏មានឆ្នេរស្អាត និងមានគ្រឿងសមុទ្រ ដែលមានរសជាតិឆ្ងាញ់ ជាពិសេសគឺមានព្រៃកោងកាង”។លោកស្រីបន្ថែមថា “បើយើងប្រែក្លាយឱ្យទៅជាតំបន់ឆ្នេរលំដាប់ពិភពលោក វានឹងរួមចំណែកជួយទៅដល់ ការកើនឡើងភ្ញៀវទេសចរក្នុងស្រុក និងក្រៅស្រុក និងការកើនឡើងនៃសេដ្ឋកិច្ចជាតិតាមរយៈអ្នកនៅក្នុងមូលដ្ឋាន គាត់អាចពង្រីកអាជីវកម្មរបស់គាត់បន្ថែមទៀត ដើម្បីទាក់ទាញភ្ញៀវទេសចរមកលេង ហើយស្នាក់នៅបានយូរ ខណៈដែលអ្នកទេសចរក្រឡេកទៅ ឃើញតែបរិស្ថានល្អ សណ្ដាប់ធ្នាប់ល្អ និងសេវាកម្មល្អផងដែរ”៕
