ដោយ: គង់ លាងហួរ
តូក្យូ: យោងតាមការស្ទង់មតិសាជីវកម្មរបស់កាសែត Reuters បានបង្ហាញថា ស្ទើរតែពាក់កណ្តាលនៃក្រុមហ៊ុនជប៉ុន ដែលចូលរួមការស្ទង់មតិ មើលឃើញថា ជម្លោះរវាងអ៊ីស្រាអែល និងក្រុមហាម៉ាស់ អាចជះផលប៉ះពាល់ដល់ប្រាក់ចំណូលរបស់ពួកគេ។
ក្រុមហ៊ុនទាំងនោអ បានលើកឡើងពីការព្រួយបារម្ភអំពីការកើនឡើងបន្ថែមទៀតនៃតម្លៃប្រេង និងទំនិញ។ឆ្លើយតបចំពោះបញ្ហានៃការបញ្ចប់ អត្រាការប្រាក់អវិជ្ជមាន ដែលជាសសរស្តម្ភដ៏សំខាន់ នៃគោលនយោបាយរូបិយវត្ថុ របស់ធនាគារកណ្តាលជប៉ុន ស្ទើរតែពាក់កណ្តាលនៃក្រុមហ៊ុនជប៉ុន ដែលចូលរួមក្នុងការស្ទង់មតិខាងលើនេះ បានរំពឹងថា វានឹងអាចកើតឡើងនៅពាក់កណ្តាលឆ្នាំ២០២៤ខាងមុខ។
ការស្ទង់មតិបានបង្ហាញទៀតថា ចំនួន៤៨ភាគរយ នៃក្រុមហ៊ុនជប៉ុនសរុប ដែលត្រូវបានស្ទង់មតិដោយកាសែត Reuters បានលើកឡើងថា ជម្លោះអ៊ីស្រាអែល និងក្រុមហាម៉ាសនឹងជះផលប៉ះពាល់ជាអវិជ្ជមានដល់ប្រាក់ចំណូលរបស់ពួកគេ។
ចំណែកចំនួន៤៩ភាគរយ នៃក្រុមហ៊ុនជប៉ុនសរុប ដែលចូលរួមក្នុងការស្ទង់មតិនេះ មិនរំពឹងទុកថា ជម្លោះនៅតំបន់មជ្ឈឹមបូព៌ា នឹងអាចជះផលប៉ះពាល់ជាក់លាក់នោះទេ ខណៈ៣%នៃក្រុមហ៊ុនជប៉ុនសរុបដែលចូលរួមការស្ទង់មតិ បានមើលឃើញពីឥទ្ធិពលវិជ្ជមាន។
អ្នកគ្រប់គ្រងមួយរូប នៅក្រុមហ៊ុនផលិតសារធាតុគីមី បានសរសេរនៅក្នុងការស្ទង់មតិថា “ស្ថានភាពនៅតំបន់មជ្ឈិមបូព៌ា កាន់តែអាក្រក់នឹងនាំឱ្យមានការកើនឡើងយ៉ាងខ្លាំង នៃតម្លៃវត្ថុធាតុដើម និងតម្លៃឥន្ធនៈ”។
នៅពេលត្រូវបានសាកសួរអំពីទស្សនវិស័យ នៃតម្លៃប្រេងនាពេលអនាគតដ៏ខ្លី គេសង្កេតឃើញថា ៤៦%នៃក្រុមហ៊ុនជប៉ុនសរុប ដែលចូលរួមក្នុងការស្ទង់មតិរំពឹងថា តម្លៃប្រេងនឹងកើនឡើងដល់១២០ដុល្លារក្នុងមួយបារ៉ែល ឬខ្ពស់ជាងនេះ៕
