ដោយ: គង់ លាងហួរ
អន្តរជាតិ: ឱនភាពពាណិជ្ជកម្មរបស់សហរដ្ឋអាមេរិក បានកើនឡើងលើសពីការរំពឹងទុក របស់ក្រុមសេដ្ឋវិទូនៅក្នុងខែកញ្ញា ដែលការណ៍នេះបានឆ្លុះបញ្ចាំងពីភាពធន់ នៃតម្រូវការរបស់ពលរដ្ឋអាមេរិកសម្រាប់ទំនិញនាំចូលពីបរទេស។
យោងតាមក្រុមសេដ្ឋវិទូ ដែលត្រូវបានស្ទង់មតិដោយសារពត៌មាន Reuters បានព្យាករណ៍ថា ឱនភាពពាណិជ្ជកម្មរបស់អាមេរិកនឹងធ្លាក់ចុះ ដល់៥៩,៩ពាន់លានដុល្លារនៅក្នុងខែកញ្ញា។
ប៉ុន្តែផ្ទុយទៅវិញ យោងតាមទិន្នន័យរបស់នាយកដ្ឋានពាណិជ្ជកម្មអាមេរិកបានបង្ហាញថា នៅខែកញ្ញា ឱនភាពពាណិជ្ជកម្មទំនិញ និងសេវាកម្មរបស់សហរដ្ឋអាមេរិក បានកើនឡើង៤,៩% ដល់៦១,៥ពាន់លានដុល្លារអាមេរិក បើធៀបនឹងឱនភាពក្នុងខែសីហាកន្លងទៅ។
ទំហំនៃការនាំចូលរបស់សហរដ្ឋអាមេរិក បានកើនឡើងដល់កម្រិតខ្ពស់បំផុត ចាប់តាំងពីខែកុម្ភៈ ខណៈពេលដែលការនាំចេញក៏បានកើនឡើងដល់កម្រិតខ្ពស់បំផុត ក្នុងរយៈពេលជាងមួយឆ្នាំផងដែរ។
ស្របពេលដែលអត្រាអ្នកអត់ការងារធ្វើ នៅមានកម្រិតទាប ដូចនេះ តម្រូវការរបស់ពលរដ្ឋអាមេរិក សម្រាប់ការទិញទំនិញ ដែលផលិតមកពីបរទេសដូចជាទូរស័ព្ទ និងរថយន្តនៅតែមានភាពល្អប្រសើរ។
ឱនភាពនេះបានឆ្លុះបញ្ចាំងឱ្យឃើញ ពីការនាំចូលកាន់តែច្រើននៃទំនិញប្រើប្រាស់ ព្រមទាំងទំនិញមូលធន ដូចជាគ្រឿងបន្លាស់កុំព្យូទ័រ ប៉ុន្តែ ក្នុងពេលជាមួយគ្នានេះ ការនាំចេញប្រេង និងផលិតផលកសិកម្មរបស់សហរដ្ឋអាមេរិកក៏បានកើនឡើងផងដែរ៕
