ដោយ: គង់ លាងហួរ
អន្តរជាតិ: យោងតាមសារពត៌មាន The edge malaysia បានចុះផ្សាយថា ការលក់ផ្ទះឯកជនរបស់ប្រទេសសិង្ហបុរី បានស្ទុះងើបឡើងវិញ ដល់កម្រិតខ្ពស់បំផុតក្នុងរយៈពេល៤ខែ នៅខែវិច្ឆិកា ស្របពេលដែលការសម្រុកផ្គត់ផ្គង់ថ្មីកំពុងកើនឡើង។
យោងតាមតួលេខ ដែលបានចេញផ្សាយកាលពីថ្ងៃសុក្រ ទី១៥ ខែធ្នូ ដោយអាជ្ញាធរអភិវឌ្ឍន៍ទីក្រុង(URA) បានឱ្យដឹងថា ការទិញអាផាតម៉ិនថ្មី បានកើនឡើងជិត៤ដង ដល់ចំនួន៧៨៤យូនីតក្នុងខែវិច្ឆិកា បើធៀបនឹង២០៣យូនីត ក្នុងតុលា។
ការស្ទុះងើបឡើងវិញ នៃការលក់ផ្ទះឯកជន របស់ប្រទេសសិង្ហបុរី ត្រូវបានគេរំពឹងទុកយ៉ាងខ្ពស់ បន្ទាប់ពីគម្រោងលំនៅដ្ឋានថ្មីៗជាច្រើន ដែលបានបើកដំណើរការកំពុងមានតម្រូវការជាខ្លាំង។
តម្រូវការក្នុងស្រុកដ៏រ៉ឹងមាំ បានបន្តជំរុញទីផ្សារលំនៅដ្ឋានរបស់សិង្ហបុរី ដែលជាប្រទេសមានភាពធន់ និងមានតម្លៃថ្លៃបំផុតមួយក្នុងពិភពលោក បើទោះបីជាមានការដំឡើងអត្រាការប្រាក់ និងវិធានការទប់ស្កាត់ជាបន្តបន្ទាប់យ៉ាងណាក្តី។
ទោះជាយ៉ាងនេះក្តី គេនៅតែសង្កេតឃើញមានសញ្ញាដែលបង្ហាញថា ទីផ្សារកំពុងធ្លាក់ចុះ ជាពិសេស តម្រូវការពីជនបរទេសបានរងផលប៉ះពាល់ ដោយសារកាលពីខែមេសាកន្លងទៅ រដ្ឋាភិបាលសិង្ហបុរីបានដំឡើងពន្ធទ្វេរដង ដល់៦០%សម្រាប់ជនបរទេស ដែលមកទិញអចលនទ្រព្យ ជាលក្ខណៈឯកជននៅក្នុងប្រទេសរបស់ខ្លួន។
អតិថិជនបរទេស បានគ្របដណ្តប់ប្រហែល៤% នៃសកម្មភាពប្រតិបត្តិការសរុប នៅក្នុងទីផ្សារឯកជនក្នុងឆ្នាំនេះ ដោយធ្លាក់ចុះពីជាង៦% នៅក្នុងត្រីមាសទីមួយ។ នេះបើយោងតាមធនាគារកណ្តាលរបស់ប្រទេសសិង្ហបុរី៕
