ដោយ គង់ សូរិយា
ភ្នំពេញ៖ សហព័ន្ធទេសចរណ៍កម្ពុជា រួមជាមួយសមាគមចុងភៅកម្ពុជា គ្រោងជ្រើសរើសទីតាំងរៀបចំវេទិកាតាំងពិរព័ណ៍នៅខេត្តសៀមរាប ដើម្បីបង្ហាញនូវមោទនភាពនៃការរីកចម្រើន លើផ្នែកបដិសណ្ឋាកិច្ច ម្ហូបអាហារ និងភេសជ្ជៈលំដាប់ថ្នាក់អន្តរជាតិ នឹងជាការបង្ហាញដល់ភ្ញៀវទេសចរណ៍ ខណៈដែលវិស័យមួយនេះកំពុងមានភាពទាកទាញ។
ប្រធានសហព័ន្ធទេសចរណ៍កម្ពុជាលោកលូ ម៉េង បានមានប្រសាសន៍ក្នុងសន្និសីទសារព័ត៌មានស្តីពី ការរៀបចំវេទិការតាំងពិរព័ណ៍នៅខេត្តសៀមរាបកាលពីថ្ងៃទី២១ ខែកុម្ភៈ ឆ្នាំ២០១៩កន្លងមកថា វិស័យទេសចរណ៍កម្ពុជាកំពុងមានការរីកចម្រើនយ៉ាងខ្លាំង ព្រោះកម្ពុជាមានតំបន់ទេសចរណ៍ជាច្រើន រួមមានតំបន់ទេសចរណ៍វប្បធម៌ និងតំបន់ទេសចរណ៍ធម្មជាតិ ដែលសុទ្ធសឹងជាតំបន់មានសក្តានុពល ក្នុងការទាក់ទាញភ្ញៀវទេសចរណ៍ ជាពិសេសកម្ពុជាបានបង្កើតជើងហោះហើរ ដោយផ្ទាល់ពីបណ្តាប្រទេសមួយចំនួន ជាការបង្ករលក្ខណៈងាយស្រួលសម្រាប់ភ្ញៀវទេសចរ ដែលចង់មកដើលេងកម្សាន្តនៅកម្ពុជា។
លោកបន្តថា “ការរៀបចំព្រឹត្តិការណ៍ពិរព័ណ៍នៅខេត្តសៀមរាប រវាងសហព័ន្ធទេសចរណ៍កម្ពុជា ជាមួយសមាគមចុងភៅកម្ពុជា មានគោលបំណងគាំទ្រលើការអភិវឌ្ឍនៃវិស័យបដិសណ្ឋារកិច្ច ម្ហូបអាហារ និងភេសជ្ជៈនៅក្នុងប្រទេស”។ លោកបន្តថា ព្រឹត្តិការណ៍ដ៏ធំនេះ ក៏ធ្វើឡើងដើម្បីបង្ហាញនូវមោទនភាពនៃការរីកចម្រើនលើផ្នែកទាំងនេះ នឹងជាការបង្ហាញដល់ភ្ញៀវទេសចរណ៍”។
លោកវិញ សានអនុប្រធានចុងភៅប្រចាំខេត្តសៀមរាបបានលើកឡើងថា វិស័យម្ហូបអាហារបានដើរតួយ៉ាងសំខាន់ ក្នុងការចូលរួមទាក់ទាញដល់ភ្ញៀវទេសចរណ៍ ដូច្នេះការបង្កើតជាសមាគមនេះឡើង គឺដើម្បីពង្រឹងនិងពង្រីកចំណេះដឹង ដល់ក្រុមចុងភៅបន្ថែមទៀត ដើម្បីរៀបចំវិស័យម្ហូបអាហារឲ្យមានស្តង់ដារ ជាពិសេសការពង្រីកនិងផ្សព្វផ្សាយម្ហូបអាហារ របស់កម្ពុជាឲ្យពិភពលោកបានស្គាល់ផងដែរ។
នាយកក្រុមហ៊ុន AMB Tarsus Events Group លោក Andrew Siow បានឲ្យដឹងថា គម្រោងរៀបចំតាំងពិរព័ណ៍ផ្នែកបដិសណ្ឋាកិច្ច ម្ហូបអាហារ និងភេសជ្ជៈលំដាប់ថ្នាក់អន្តរជាតិ គឺគ្រោងធ្វើនៅខេត្តសៀមរាប នឹងចាប់ពីថ្ងៃទី១០ ដល់ថ្ងៃទី១២ខែតុលា ឆ្នាំ២០១៩ខាងមុខនេះ ដោយមានក្រុមហ៊ុនធំៗចូលរួមជាច្រើននៅក្នុងតំបន់អាស៊ី។ ក្នុងកម្មវិធីនេះដែរ ក៏មានការៀបចំចំពិរព័ណ៍ ANGKORCAFFE ២០១៩ ដើម្បីជំរុញការប្រកួតប្រជែង ខណៈដែលវិស័យមួយនេះកំពុងមានការរីកចម្រើន៕
