ដោយ: គង់ លាងហួរ
បាងកក: សម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា គ្រោងបំពេញដំណើរទស្សនកិច្ចទៅកាន់ប្រទេសថៃរយៈពេល១ថ្ងៃ ដើម្បីជួបពិភាក្សាជាមួយនាយករដ្ឋមន្ត្រីថៃ លោក សេដ្ឋា ថាវីស៊ីន ក្នុងគោលបំណងបង្កើនទំនាក់ទំនងទ្វេរភាគី។
នេះបើយោងតាមការចុះផ្សាយដោយសារព័ត៌មាន Thai PBS World កាលពីថ្ងៃអាទិត្យ ទី៧ ខែមករា ឆ្នាំ២០២៤។
សម្តេចធិបតី ហ៊ុន ម៉ាណែត គ្រោងបំពេញដំណើរទស្សនកិច្ច ក្នុងប្រទេសថៃ នៅថ្ងៃទី៧ ខែកុម្ភៈខាងមុខ។ ក្នុងដំណើរទស្សនកិច្ចលើកនេះ សម្តេចធិបតី គ្រោងជួបជាមួយសមភាគីថៃ លោកសេដ្ឋា ថាវីស៊ីន ដើម្បីពិភាក្សាអំពីការបង្កើនទំហំពាណិជ្ជកម្ម និងការវិនិយោគរវាងប្រទេសជិតខាងទាំង២។
ជាមួយគ្នានេះ ពាណិជ្ជកម្មឆ្លងដែន សកម្មភាពរួមគ្នាប្រឆាំងនឹងការឆបោក និងគម្រោងកិច្ចសហប្រតិបត្តិការសេដ្ឋកិច្ច នឹងក្លាយជារបៀបវារៈដ៏សំខាន់ក្នុងកិច្ចពិភាក្សាគ្នារវាងថ្នាក់ដឹកនាំទាំង២។
ពាណិជ្ជកម្មទ្វេរភាគីរវាងប្រទេសទាំង២ សម្រេចបានទំហំទឹកប្រាក់ចំនួន៩,៨ពាន់លានដុល្លារ ក្នុងឆ្នាំ២០២៣ ខណៈលំហូរវិនិយោគពីប្រទេសថៃចូលមកកម្ពុជាមានទឹកប្រាក់ចំនួន១០,១ពាន់លានដុល្លារ។
ក្រៅពីជួបជាមួយនាយករដ្ឋមន្ត្រីថៃ សម្តេចធិបតី ហ៊ុន ម៉ាណែត ក៏គ្រោងជួបជាមួយសមាជិកគណៈរដ្ឋមន្រ្តីថៃផ្សេងទៀតផងដែរ ព្រមទាំងមានជំនួបជាមួយវិនិយោគិនថៃ ដើម្បីផ្សព្វផ្សាយអំពីឱកាសវិនិយោគនៅកម្ពុជា។
កាលពីខែធ្នូ ឆ្នាំ២០២៣កន្លងទៅ លោកសេដ្ឋា ថាវីសុីន ធ្លាប់បានអះអាងថា ប្រធានបទធនធានធម្មជាតិ ដែលស្ថិតនៅក្នុងតំបន់ទាមទារត្រួតស៊ីគ្នា(OCA)នៅឈូងសមុទ្រថៃ នឹងក្លាយជាប្រធានបទដ៏សំខាន់មួយ ដែលត្រូវលើកមកពិភាក្សាជាមួយសម្តេចធិបតី ហ៊ុន ម៉ាណែត៕
