ដោយៈ គង់ សូរិយា
ភ្នំពេញៈ កំណើននៃការតភ្ជាប់ជើងហោះហើរ បាននិងកំពុងកើនឡើង ដែលធ្វើឲ្យកម្ពុជាមានសុទិដ្ឋិនិយម ពីកំណើនភ្ញៀវទេសចរណ៍ និងប្រាក់ចំណូលក្នុងវិស័យនេះ។
ប្រធានសមាគមទីភ្នាក់ងារទេសចរណ៍កម្ពុជា លោកស្រី ឆាយ ស៊ីវលីន បានមានប្រសាសន៍ឲ្យដឹងកាលពីពេលថ្មីៗនេះថា ចំនួនភ្ញៀវទេសចរបរទេស ដែលធ្វើដំណើរមកកម្ពុជា បានកើនឡើងជាបន្តបន្ទាប់ ជាពិសេសមួយរយៈចុងក្រោយនេះ។ ការបើកដំណើរកាន់តែច្រើន នៃជើងហោះហើរអន្តរជាតិត្រង់មកកម្ពុជា និងការរៀបចំព្រឹត្តិការណ៍ផ្សេងៗក្នុងស្រុក គឺជាចំណែកដែលនាំមក នូវភាពវិជ្ជមានទាំងនេះ។
លោកស្រីបន្តថា “សម្រាប់ភ្ញៀវទេសចរបរទេស ដែលមកកម្សាន្តនៅកម្ពុជាភាគច្រើន គឺមកពីប្រទេសជិតខាង និងក្នុងតំបន់អាស៊ី”។លោកស្រីបន្ថែមថា “ការកសាងព្រលានយន្តហោះថ្មី និងការរៀបចំហេដ្ឋារចនាសម្ព័ន្ធកាន់តែល្អ ក៏ជាចំណែកសំខាន់ ក្នុងការទាក់ទាញភ្ញៀវទេសចរ និងអ្នកវិនិយោគឱ្យធ្វើដំណើរ មកកម្ពុជាកាន់តែច្រើនផងដែរ”។
លោកស្រីថ្លែងថា ចំនួនភ្ញៀវបរទេសមកកម្ពុជា បានបង្ហាញពីការងើបឡើងវិញជាបណ្តើរៗហើយ ខណៈបច្ចុប្បន្នទាំងថ្នាក់ដឹកនាំក្រសួងទេសចរណ៍ និងផ្នែកឯកជនកំពុងខិតខំយ៉ាងខ្លាំង ក្នុងទាក់ទាញឱ្យភ្ញៀវទេសចរបរទេស ឱ្យមកកម្ពុជាកាន់តែច្រើនៗ។
សេចក្តីប្រកាសព័ត៌មាន របស់គ្រឹះស្ថានអង្គរបានឱ្យដឹងថា ក្នុងឆ្នាំ២០២៣ មានភ្ញៀវបរទេស៧៩៨,០៦៩នាក់ បានទិញសំបុត្រចូលទស្សនារមណីយដ្ឋានអង្គរ ដោយកើនឡើង១៧៧,៦៣ភាគរយ បើធៀបទៅនឹងឆ្នាំ២០២២។ ចំណែកទឹកប្រាក់ ប្រមូលបានពីការលក់សំបុត្រ មានសរុប៣៧,២លានដុល្លារ កើនឡើង២២២ភាគរយ។
ក្រៅពីចំណូលខាងលើគ្រឹះស្ថានអង្គរ ក៏ទទួលបានភ្ញៀវចំនួន ១៤,៨០៦នាក់ ស្មើនឹងប្រាក់២២២,០៩០ដុល្លារ ពីការលក់សំបុត្រឱ្យភ្ញៀវបរទេសចូលទស្សនា តំបន់ប្រាសាទកោះកេរ និងប្រាក់ចំនួន ៥៦៤,៦៧១ដុល្លារ ពីការលក់សំបុត្រទូកនៅកំពង់ផែចុងឃ្នៀស។
លោកស៊ិន ចាន់សិរីវុត្ថាអនុរដ្ឋលេខាធិការ និងជាអ្នកនាំពាក្យរដ្ឋលេខាធិការដ្ឋានអាកាសចរណ៍ស៊ីវិល បានមានប្រសាសន៍ឲ្យដឹងកាលពីពេលថ្មីៗនេះថា ពិតជាមានកំណើននៃការហោះហើរ មកកម្ពុជា ជាមួយនឹងក្រុមហ៊ុនអាកាសចរណ៍មួយចំនួន ដោយក្រុមហ៊ុនទាំងនោះបានពង្រីក ចំនួនជើងហោះហើរទៅមករវាងកម្ពុជា ចិន និងប្រទេសមួយចំនួនទៀត៕
