ដោយៈ គង់ សូរិយា
ភ្នំពេញៈ វិបត្តិសេដ្ឋកិច្ចសកល និងបញ្ហាជាច្រើនទៀត បានធ្វើឲ្យកម្ពុជារងផលប៉ះពាល់ផងដែរ ពិសេសការសងឥណទានត្រលប់ទៅគ្រឹះស្ថានហិរញ្ញវត្ថុនានាមានភាពយឺតយ៉ាវ។
លោក អឿ សុធារ័ត្ន ប្រធាននាយកប្រតិបត្តិក្រុមហ៊ុនក្រេឌីត ប្យួរ៉ូ Credit Bauro Cambodia (CBC) បានមានប្រសាសន៍ឲ្យដឹង កាលពីចុងសប្តាហ៍មុនថា វិបត្តិសេដ្ឋកិច្ចបច្ចុប្បន្ននេះ បានប៉ះពាល់ដល់ស្ថានភាពហិរញ្ញវត្ថុរបស់អតិថិជន ក្នុងនោះវិស័យទេសចរណ៍ និងអចលនទ្រព្យ ជាវិស័យដែលជួបនូវផលលំបាកច្រើន ក្នុងការសងប្រាក់មកគ្រឹះស្ថានហិរញ្ញវត្ថុ។
លោកបានបញ្ជាក់ទៀតថា វិស័យចំនួន២ ដែលយើងតែងតែសង្កេតឃើញ ដូចជា ទី១ ទាក់ទងទៅនឹងវិស័យទេសចរណ៍ និងទី២ ទាក់ទងទៅនឹងវិស័យអចលនទ្រព្យ ដែលមានបញ្ហាក្នុងការសងត្រលប់យឺតយ៉ាវ។
លោកបន្តថា “ខ្ញុំជឿថាវិស័យទាំង២នេះ គឺជាវិស័យដែលជួបប្រទះនូវផលពិបាកច្រើន”។ជាក់ស្តែងក្រសួងសេដ្ឋកិច្ច និងហិរញ្ញវត្ថុបានព្យាករណ៍ផងដែរថា វិស័យអចលនទ្រព្យ និងសំណង់នឹងបន្តងើបឡើងយឺតនៅឆ្នាំ២០២៤នេះ។
រាជរដ្ឋាភិបាលក្រោមការដឹកនាំ របស់សម្តេចធិបតីហ៊ុន ម៉ាណែតជានាយករដ្ឋមន្រ្តី នៃរាជរដ្ឋាភិបាលនិតិកាលទី៧នេះ បានដាក់ចេញនូវគោលនយោបាយថ្មី ដោយគ្រោងបញ្ចេញឥណទានប្រមាណ៥០លានដុល្លារ ដល់ប្រតិបត្តិករ និងអាជីវកម្មពាក់ព័ន្ឋនឹងវស័យទេសចរណ៍នៅខេត្តសៀមរាប សម្រាប់ឆ្នាំ២០២៤នេះ៕
