ដោយ: គង់ លាងហួរ
អន្តរជាតិ: លោកស្រី Christine Lagarde ប្រធានធនាគារកណ្តាលអឺរ៉ុបលើកឡើងថា តំបន់អឺរ៉ុបគួរតែត្រៀមខ្លួន ចំពោះការគំរាមកំហែង ដែលអាចកើតមានមកលើសេដ្ឋកិច្ចរបស់ខ្លួន ប្រសិនបើលោក ដូណាល់ត្រាំ ជាប់ឆ្នោតជាប្រធានាធិបតីអាមេរិកម្តងទៀត។
លោកស្រីបានថ្លែងប្រាប់កាសែត CNN នៅក្នុងបទសម្ភាសន៍ផ្តាច់មុខមួយថា “ចូរ! អ្នកក្រឡេកទៅមើលពេលដែលលោក ត្រាំ ជាប្រធានាធិបតីអាមេរិក… វាអាចមានការគំរាមកំហែង និងអាចមានបញ្ហាដែលអឺរ៉ុបគួរតែត្រៀមរៀបចំខ្លួន”។សហភាពអឺរ៉ុប(EU)ពឹងផ្អែកខ្លាំងណាស់ ទៅលើការដោះដូរពាណិជ្ជកម្មជាមួយសហរដ្ឋអាមេរិក។ ដូច្នេះប្រសិនបើលោក ដូណាល់ត្រាំ វិលត្រឡប់ទៅសេតវិមានម្តងទៀត នោះ EU អាចប្រឈមមុខនឹងការបង់ពន្ធថ្មី នៅពេលនាំចេញទំនិញទៅកាន់ទីផ្សារអាមេរិក។
ទំនាក់ទំនងរវាងសហរដ្ឋអាមេរិក និងសហភាពអឺរ៉ុប ជួបភាពតានតឹងខ្លាំង ក្រោមអាណត្តិដឹកនាំរបស់លោក ដូណាល់ ត្រាំ និងបានប្រែក្លាយទៅជាជម្លោះពាណិជ្ជកម្ម តបតគ្នាទៅវិញទៅមករវាងទីក្រុងវ៉ាស៊ីនតោន និងទីក្រុងប្រ៊ុចសែល។ជម្លោះនោះបាននាំឱ្យសហរដ្ឋអាមេរិក ដាក់ពន្ធលើដែកថែប និងអាលុយមីញ៉ូមរបស់សហភាពអឺរ៉ុប ខណៈដែលសហភាពអឺរ៉ុបបានឆ្លើយតបវិញ តាមរយៈការដាក់ពន្ធលើទំនិញអាមេរិក ដែលមានតម្លៃ៣ពាន់លានដុល្លារ ដូចជាស្រាវីស្គី ម៉ូតូ និងខោខូវប៊យ។
តាមទស្សនៈរបស់លោកស្រី Lagarde មធ្យោបាយដ៏ល្អបំផុតសម្រាប់អឺរ៉ុប គឺជំរុញទីផ្សាររួមរបស់ខ្លួន ដែលធានាឱ្យមានការចរាចរណ៍ទំនិញ សេវាកម្ម មនុស្ស និងដើមទុនដោយសេរី នៅក្នុងចំណោមបណ្តាសមាជិកEU ទាំង២៧ប្រទេស។
សហរដ្ឋអាមេរិក គឺជាប្រភពលំហូរវិនិយោគផ្ទាល់ពីបរទេស(FDI)ដ៏ធំបំផុតរបស់សហភាពអឺរ៉ុប។ យោងតាមតួលេខផ្លូវការបានឱ្យដឹងថា ទំហំពាណិជ្ជកម្មទំនិញ និងសេវាកម្មរវាងសហរដ្ឋអាមេរិក និងសហភាពអឺរ៉ុបសម្រេចបានទឹកប្រាក់រហូតដល់១,៣ទ្រីលានដុល្លារក្នុងឆ្នាំ២០២២៕